零食呢家嘢，返緊工又好、行緊街又好、喺屋企hea緊都好，總之就任何時候都想食。而如果「零食」，再加上「日本直送」呢4個字，就更加無可抗拒！最近，有便利店一次過就引入咗16款由日本直送嘅和風小食，朱古力、脆口嘢、果仁等等都有。

杯裝嘅粒粒點心麵，細細粒，一個個麵餅咁樣樣，食得幾方便，冇咁易倒到周圍都係碎。醬油加蛋黃醬味，係幾香口嘅。

粟米脆片有鹽味同芝士味，每粒都由4層疊成，酥脆得嚟亦好濃粟米味，脆卜卜食下食下唔覺就食晒。芝士嗰隻係用咗車打芝士、忌廉奶酪等等3種芝士粉去整，啱晒芝士控。

另外亦有幾款朱古力餅同曲奇，朱古力味都係相當濃郁，甜甜der。

朱古力迷亦有幾款朱古力選擇，花生朱古力呀、法式朱古力脆呀同雙重果仁朱古力呀咁，完全係甜魔至愛。

提子乾、脆酸梅粒、雜錦果仁、同海帶根呢啲輕食類都唔錯，口痕嗰陣想搵啲嘢咬下食下，但又唔使怕太heavy！

售賣地點：7-11便利店

文、相：Kar