西營盤呢間新店嘅主廚由英國回流，食物都帶英式風格。加上唔少食物都係手工製作，例如意粉用嘅香草喺舖頭自己種，甜品用嘅英式Butterscotch亦係自家熬煮，心機同細節好加分。小店亦放滿植物擺設，綠意盎然感覺悠閒。
 

From Scratch其中一位店主兼大廚喺英國出世同長大，回流返嚟香港同拍檔開咗呢間位於西營盤嘅小店。店名嚟自Start from scratch由零開始嘅意思，無論係食物定裝修都係店主們親手做嘅，包括喺舖頭種植百里香、九層塔、薄荷等香草。長遠希望可以自己種埋沙律菜同菇！
 

Funghi Pie（$58）

腸仔卷同蘑菇批都係英國常見小食，而呢度嘅蘑菇批嘅餡料會用兩款時令菇，例如拍攝當日用嘅就係珍珠菇同白玉菇，加上忌廉炒成菇香濃郁又Creamy嘅餡料。而且所有批都係即叫即焗，同坊間一般先焗好再翻熱相比口感更香脆！裡面嘅兩款菇都非常飽滿多汁，同忌廉嘅奶香都好夾。而伴碟嘅薯仔沙律調味帶酸，所以食落一啲都唔膩。
 

Vodka Rigatoni（$98）

呢款意粉會用到伏特加，喺慢煮焦糖洋蔥嘅時候加入提取香味，所以大部分酒精都會因為加熱而揮發。醬汁亦會加入蕃茄同辣椒仔，秘訣係醬汁煮完會放至少一日，等材料味道融為一體。而意粉就用Pipe Rigate煮至爽口Al dente，意粉坑紋更掛汁，食落味道相當酸辣醒胃，加上香草嘅清新香氣，好啱夏天食呀。
 

 

Butterscotch Mochi（$48）

店主形容佢哋嘅自家Butterscotch有啲似樂家杏仁糖，就係因為其中一位店主嘅媽媽好鍾意食，佢就自己研究食譜，得出而家呢個兼具朱古力、焦糖，同杏仁香嘅版本。有杏仁顆粒口感Butterscotch嘅加上軟糯嘅小丸子，口感有啲似迷你版嘅糖不甩，甜度適中。
 

Sicilian Lemonade（$38）

飲品同樣花咗唔少功夫，例如呢杯嘅靈感嚟自一位店主喺意大利飲過嘅Lemonade，簡單用檸檬、薄荷同少少糖就做到，但秘訣係要用新鮮檸檬自己榨汁。再加上檸檬皮、青檸皮，同即摘嘅新鮮薄荷增添柑橘同清涼香氣，酸味自然清爽。
 

Espresso Tonic（$45）

咖啡就由本地Redback Specialty Coffee調配適合香港人口味，又配搭到餐廳食品嘅House Blend，係巴西、肯尼亞同埃塞俄比亞嘅拼配，味道同口感都比較平衡，唔少客人都話同Tonic Water最夾，入口微酸清爽帶柑橘香。
 

室外露台種植多款香草，即摘即用以保留最多香氣

From Scratch
地址：西環西邊街21號地舖

文、相：Cathy