挨過成個月都冇假放嘅3月之後，4月頭就係復活長假啦。多間唔同餅店都開始陸續推出復活節限定蛋糕，全部嘅造型都好精美呢，大飽眼福之餘亦可以同朋友一齊分享「復活」嘅喜悅。

賓尼兔尾巴紅蘿蔔蛋糕   La Viña

相信一眾鍾情巴斯克芝士蛋糕嘅朋友，實有聽過呢間cake shop嘅大名。佢哋最近推出兩款季節限定口味，分別係柚子紅豆同日本櫻花，前者以日本柚子皮同新鮮果汁、北海道紅豆醬等製作，係幾清新嘅但略為酸咗少少，仲有隻可愛雞仔復活蛋喺頂，so cute！後者以TWG品牌嘅櫻花茶葉精華製作，帶有淡淡清香嘅花香。

另外，佢哋亦同一樣鍾意烘焙嘅前港姐陳凱琳（Grace）合作，研發咗賓尼兔尾巴紅蘿蔔蛋糕，以海綿蛋糕、朱古力同椰子等為裝飾原料，再加入新鮮紅蘿蔔、黑糖等製作，味道甜香。

Love Egg-splosion Bomb　Bombshell

 時下好興扑扑蛋糕，呢間創意藝術糕餅店亦趁復活節推出多款內藏驚喜嘅蛋糕，例如以可愛小雞為造型嘅Love Egg-splosion Bomb，同復活兔Ears-ter Bunny Bomb，揮動魔法權杖扑開蛋糕，就有超過16款朱古力、糖果同曲奇等湧出嚟，大人細路見到都一樣咁開心。

紅桑子朱古力松露蛋糕   帝京餅店

復活節蛋糕不外乎都係復活蛋、雞仔或者兔仔，呢間餅店嘅設計都幾得意呀，係兔仔努力想跳入個花盆入面。以朱古力無粉蛋糕為主，內層係朱古力軟心，同紅桑子白朱古力脆片，一脆一軟口感獨特。至於個花盆則係朱古力殼，而啲蘿蔔原來係士多啤梨嚟，仲有扮花嘅朱古力復活蛋，成個設計都充滿創作力量同幻想。留意返個cake要兩日前預訂呀。

Around The World 蛋糕  當文歷餅店

以前啲復活節長假，好多人都鍾意請幾日就去個十日嘅旅行，不過今年冇呢支歌仔唱咯。有餅店知道大家掛住旅行嘅感覺，特地推出一系列旅遊熱點嘅地道美食系列蛋糕，5個地方包括日本、法國、美國、泰國同墨西哥，各自代表嘅蛋糕分別係：梳乎厘班戟、法國軟芝士、蝴蝶脆餅、芒果糯米飯同墨西哥捲餅。不過當然都係一貫餐廳嘅創作風，造型盞鬼，而味道則有另有驚喜呢。例如墨西哥捲餅咁，就係以牛油曲奇「粟米餅」，夾住濃郁嘅朱古力海綿蛋糕、焦糖醬、黑朱古力慕絲、粟米奶油同啫喱。

文：Kar