眼見時下foodies肯花時間心機去捐窿捐罅搵美食，咁開飯仔就私伙推介一間位於屯門嘅居酒屋。開業無耐，卻深得foodies們喜愛，究竟點解嘅？

一入餐廳就被當眼嘅牌匾吸引，牌匾上嘅句子係向餐廳老闆嘅偶像周星馳嘅電影《唐伯虎點秋香》致敬，老闆甚至將舖頭名都叫「秋香」添，裝潢卻西日風格，的確好fusion。

向右邊一望，就會見到古銅色威士忌吊酒櫃，所有威士忌都會用鐵鉤吊起，一來無咁佔空間，二來客人可睇到各款威士忌款式，仲好eye-catching添！

食物亦如此有心思，好似呢款招牌白鱔煲仔飯($168)，每日從街市購入新鮮本地白鱔，鱔肉厚身又肥美，燒香後更爆出陣陣油香。

煲仔飯亦用咗煙韌嘅日本珍珠米，加埋傳統黃銅煲去煮，令米飯可平均受熱。

臨上枱前，廚師再依次加入日本烤鰻醬、蔥花、生雞蛋以及櫻花蝦，味道更有層次。

每個白鱔煲仔飯有至少6-7件白鱔，而且白鱔肉件件都好肥美，分量都幾多,亦不太有魚骨。開飯仔最鍾意嘅係，一咬魚皮更會滲出油香，魚皮仲有啲爽口添；飯粒亦幾有嚼頭，有我哋都好鍾意嘅厚厚飯焦呀！另外，蛋漿緩緩流出，令飯粒更香滑，呢個畫面真係百看不厭！

唔食白鱔嘅話，另有牛仔骨煲仔飯($168)選擇，肉質微韌嘅牛仔骨，油香亦落入飯粒之中，好味。而且配料同樣有烤鰻醬、蔥花、生雞蛋及櫻花蝦，口感一樣咁豐富。

前菜方面，必試呢隻來自日本北海道嘅生蠔($78)，蠔肉大隻又鮮甜，海水味亦濃，混和日本昆布湯及用以點綴嘅食用花。進食之前，客人更可噴少少威士忌，令蠔肉多一分麥香。

居酒屋絕對唔少得人人都愛嘅各款串燒，呢度有雞中翼、五花腩 、牛粒，免治雞肉棒等10幾款選擇，價錢由$18-$36不等。廚師會根據不同肉質而塗上醬汁，例如雞肉會搽烤鰻醬，五花腩、洋蔥會搽上自家製辣汁。

相信波板糖五花腩($28)最吸引各位客人嘅眼球。將五花腩捲成蛇餅狀，串埋又真係幾似波板糖嘅，五花腩取自荷蘭豬肉嘅豬腩位，肉質唔會太軟腍，相反仲有啲韌勁、有啲嚼頭添！

另一方面，餐廳亦供應fusion煲仔小菜，好似（左）秋香牛腩煲，參考韓式生菜包嘅煮法，炆好牛腩再配以茴香上碟，口感清新仲帶少許甜味，並跟送1籃生菜、蒜頭及辣椒，價錢為$188。而（右）秋香煮海鮮煲，以泡菜、龍蝦頭、蝦頭、香茅等配料熬成泰式蝦湯，再加入蝦、帶子、青口、芝士年糕等配料，微辛感令人清新醒胃，價錢為$238。

飲品方面自然唔少得酒精啦！雖然感覺上威士忌係好「男人」嘅飲品，不過其實當中都有啲口味無咁辛辣，女生一樣啱飲，好似（左）Tomatin 18 years($110)，飲落有點甜味，幾易入口；偏愛啤酒嘅話，呢度有（右）日本SUNTORY限量生產嘅黑啤($76)，口感豐盈又balance，用嚟配串燒一流。

不愛酒精嘅客人可柯打各款梳打，好似呢杯野莓碟豆花($48)，酸酸哋，口感幾清新，而且仲有會變色嘅碟豆花添！

餐廳仲有呢個小門口，夜晚畀客人自由出入，老闆仲歡迎客人隨便影相打卡添！

特別留意門口前面呢張霸氣小告示，自己參詳啦！

秋香
地址：屯門青善街38號康景花園地下26-27號舖

文：Joy