食飯嗰陣成日心大心細咩都想食？咁尖沙咀呢間新開嘅日本菜係一個唔錯嘅選擇，餐廳以海鮮浜燒為主打，超過25款海鮮供應。另外有海鮮丼、火鍋、燒物、沙律、刺身、小食及甜品等，價錢抵食之餘，仲有唔少嘅創新食法，啱晒咁多位貪心嘅開飯仔囡們！

龍蝦浜焼盛合($528)、特選浜焼盛合($268)

香港人咁鍾意食海鮮，當然唔可以錯過現場浜焼各款生猛海鮮。龍蝦浜焼盛合有啖啖肉嘅波士頓龍蝦、鮮甜嘅活帆立貝等；如果預算無咁高，特選浜焼盛合都係一個唔錯嘅選擇，包括魷魚、赤蝦、黃金貝、北寄貝仔及生蠔。餐廳更有芝士燒呢個食法，富有芝士鹹香又唔會蓋過海鮮鮮味。

漁師特上丼飯(前) ($218)、漁師特選丼飯(後) ($168)

見到呢個丼飯已經心心眼啦～漁師特上丼飯會附上原板韓國海膽，而漁師特選丼飯則附上來自日本嘅松葉蟹肉，而丼飯都有三個食法，分別係就咁食、以紫菜包魚生飯，自製手卷及加上茶漬湯變成嘅茶漬飯。一碗飯就有三個唔同味道，抵食呀！

日本海膽吞拿魚蓉手卷($68)、黑松露帶子手卷($46)、蟹子墨魚麵手卷($34)

手卷有別於坊間嘅手卷，以未包裹好方式呈上，客人可隨意以不同方式享用。例如近日東京流行嘅三文治狀食法， 捲成卷物或手卷形等，好食又好玩。

火焰漁師野菜鍋($138)

先放蜆同魚骨入湯底熬製，野菜盆包括免治雞肉、青蔥腐皮卷及多款蔬菜，清甜嘅蔬菜吸收晒鹹鮮嘅湯底。

海之幸炊飯($98)

先將白蜆放入高湯煮出鮮香湯底，再加飯、蛋液同蟹柳煮出炊飯，最後加入魚生、飯素、紫菜粉同芝士碎等拌勻，味道夠晒豐富啊～

鋤燒牛肉壽喜燒($88)、鋤燒蒜香牛脷($98)

平時見到嘅壽喜燒都係以鍋呈上，而呢度嘅就以鐵板上，甜甜之餘仲特別香口。另外燒牛脷加炸上蒜片同蔥，亦值得一試～

岸久巿場

地址: 尖沙咀厚福街8號H8 11樓

文: Yanica

相、片: Tom Li