冇得飛日本，相信大家都會比平時更加想食日本嘢！最近尖沙咀開咗間Omakase，有多款新鮮刺身、壽司同獨家創作料理供應，價錢算係幾親民，新開業期間仲有第2位半價優惠添！

餐廳兩位主理師傅都入咗行15年，一位擅長日式燒物、碗物、煮物等後廚料理，一位則擅於製作壽司、刺身等料理，二人聯手合作，堅持採用日本直運嘅珍貴新鮮時令食材。加上餐廳大部分座位都係圍住張吧枱坐，可以近距離觀賞師傅手勢之餘，亦可隨時同師傅交流！

抵食午巿套餐  Omakase Sun

呢個午巿套餐包括咗12件季節特選壽司，湯品、茶碗蒸同甜品等，一定夠飽！壽司款式會因應時節而轉換，開飯仔去採訪時，就有毛蟹海膽、銀鱈魚、小肌、深海池魚同日振島中拖羅等平時較少食到嘅壽司。銀鱈魚加咗少少蒜香再經火炙，又滑又香；鮟鱇魚肝加入西瓜漬，口感更豐富亦辟去腥味；至於小肌，魚肉幼嫩又富有醋漬香。每件壽司都係師傅即場手握，壽司飯選用魚沼越光米，甜度更見飽滿。面頭嘅魚生，亦落咗唔少心思，一下一下嘅千刀切，多條切痕令醬油更均勻咁滲入魚生內，口感亦較普通一片就咁食嘅爽口滑身。

呢個set原價 $368，喺新張優惠期間，二人同行嘅話每位都只係200零蚊就食到！

高性價比晚巿套餐 Omakase 月

呢個set包晒有前菜、刺身、壽司、湯品、御料理同甜品，款款都食得出師傅嘅心思。

大大隻北海道真蠔固然可以一次過滿足晒視覺同味覺，拖羅三切入口即溶亦係港人至愛，但刺身中嘅富山灣鰤魚亦不能忽視，鰤魚喺舖頭自家熟成咗10日，令油分更香，肉質更軟滑彈牙，加埋少少柚胡椒，仲有微微辛香添。不過由於熟成需時，未必次次去親都遇到呀，睇下你哋運氣了。

平時食開嘅天婦羅，通常都係炸蝦呀南瓜呀茄子等等，呢度食到嘅，居然係南非鮑魚天婦羅同北海道帆立貝天婦羅！師傅表示呢兩款係喺最新鮮嘅狀態拎去製作，帆立貝炸至半生熟，鮑魚天係先經慢煮然後至炸，難怪食落外層香脆得嚟，內裡仲依然能夠保持鮮味同爽口！

最特別嘅係師傅獨創嘅三文魚子海膽瑤柱日式糯米飯，選料採用粘性較高嘅日本直運糯米，口感煙韌。北海道馬糞海膽放入焗爐焗至甘香後再加入煮酒蒸兩三個鐘，鹹鮮味更突出。至於粒粒瑤柱，則預先用昆布木魚湯浸咗成晚，再炒香，用慢火煮一兩個鐘。每樣材料處理細緻，一啖食落口，陣陣鮮味逐層爆發，不過都係嗰句，期間限定嚟，遲下師傅可能就換咗另一款新菜啦~

 花晨便當

花晨月夕
地址：尖沙咀赫德道2號金麟商業中心2樓

文、相、片：Kar