冇，又有朱古力下午茶推介啫。尖沙咀有酒店新推出咗個tea set，係同Godiva合作嘅，有多款朱古力甜品食之餘，仲可以無限任食Godiva朱古力軟雪糕啊！

呢個三層嘅下午茶，兩層鹹點一層甜點都各有5款，先睇大家最關心亦最喜愛嘅頂層啦。朱古力muffin係用70%嘅朱古力做，食落唔會太甜。朱古力士多啤梨外層再黐埋一粒粒風乾咗嘅raspberry，甜甜地又酸酸地咁，好夾。

至於雞蛋造型嘅甜品原來係芒果奶凍，拮穿粒「蛋黃」流汁出嚟一齊食啦。仲有粒圓咕碌嘅朱古力係mousse嚟，咬開中間係軟心嘅，有啲creamy嘅朱古力漿流出，配埋粒酸酸地嘅raspberry幾醒胃。

兩層鹹點就有蘇格蘭煙三文魚、香檸蟹肉沙律、無花果parma ham、鮮茄芝士同忌廉蘑菇酥，全部都係水準之作。

英式鬆餅配奶油忌廉、果醬口感鬆脆，帶有牛油香，千其唔好漏咗佢呀。

重重重點係…走動多啲啦。出面設有無限量供應嘅Godiva朱古力軟雪糕呀，師傅會即場由Godiva雪糕機度唧出軟雪糕喺muffin上面，朱古力味超香濃呀，仲好軟滑。行多幾轉，食多幾轉啦，不過記住唔好淨係食雪糕，要食埋個muffin呀！

加多少少錢，仲可以無限任飲香檳或者氣泡酒，又或者嘆返杯由vodka、baileys等調製嘅chocolate coffee martini都係一種享受。

期間限定：即日 至 4月30日

GREEN
地址：尖沙咀科學館道17號唯港薈地下

文、相：Kar