親，唔使飛法國都可以望住巴黎鐵塔，嘆返個法式下午茶？尖沙咀有酒店推出咗個tea sea，好靚靚㗎，12款鹹甜小食圍住艾菲爾鐵塔層架，打卡一流，每款食物仲有驚喜小變奏，啱晒閏蜜邊影邊傾邊食。

紅藍白嘅巴黎鐵塔層架好鬼sharp，7款鹹點之中，建議食咗口感脆脆der番茄慕絲威化筒、法式軟芝士夾餅同三文魚他他墨魚汁米通先。成個閃電泡芙咁樣嗰件就係法式軟芝士夾餅啦，爭啲畀佢個樣呃咗，食落芝士味香濃，btw面頭嗰啲係食用花嚟。至於三文魚他他墨魚汁米通，係餐廳廚師最新自創嘅菜式，米通加入西米再用鮮墨汁焗製，底下加多塊炸洋蔥，一啖食落口，卜卜聲好鬼脆。

另上嘅蟹肉魚子醬仲有夢幻雲霧效果，想打卡嘅朋友仔記得上菜前準備定部手機啦。蟹肉香甜，底層仲有芒果汁。
法式下午茶通常都會有嘅三文治，呢度都有，係黑松露迷你火腿蛋三文治，賣相精緻。留意返，隻迷你蛋係鵪鶉蛋嚟。另一道爭啲又被誤會係甜品嘅鹹點，係望落好似焦糖燉蛋，但查實係鴨肝醬法式燉蛋，入口滿滿都係油脂香。

甜品方面，必須特別介紹下個馬卡龍。淡黃色餡你估下係咩味？

三、二、一開估，係鹹蛋黃啊！微鹹中帶甜嘅鹹蛋黃味，是咪有啲衝擊？科科，點諗到平時甜到漏嘅馬卡龍居然可以變鹹咗。

Cute cute 花盆係榛子甜品嚟，脆脆「泥」底下有甜甜mousse，仲有粒焦糖朱古力餅專為甜魔你哋而設。另外當然唔少得酒店本身嘅signature 蝴蝶酥同拿破崙酥啦。

Tea set本身包每位一杯咖啡、法國香濃熱朱古力，或者法國著名Dammann茶（有4款口味揀），但如果想chill盡佢嘅，就加錢要杯香檳啦，夠晒法式享受啦。

J's Bar Bistro
地址：尖沙咀麽地道69號帝苑酒店2樓

文、相、片：Kar