要喺尖沙咀呢啲地段，搵間平平地，性價比高嘅日本壽司店，原來都唔係完全冇可能！早排同大家報道過，有間新開嘅壽司店，做緊98蚊10件壽司嘅午巿優惠。

而除咗午巿優惠之外，呢間店嘅其他款式，CP值都幾高呀。就好似活鮑魚壽司咁，都係$28件。新鮮鮑魚嚟㗎，師傅切嗰陣佢仲曉郁。口感唔似得平時食開嘅煙韌，反而係幾爽口。

另外主打嘅仲有多款一式三味嘅壽司，例如好似松葉蟹咁，就分咗做蟹肉、蟹棒同蟹膏螫司，全部都好鮮甜呀。

至於吞拿魚就有拖羅、中拖羅、大拖羅，係師傅特地喺日本揀貨返嚟嘅，指定要40-50kg重嘅吞拿魚，因為呢個重量嘅吞拿魚，啲筋較少，油脂亦分佈平均，鮮味十足。

特選壽司拼盤有三款揀，其中有款，又海膽又三文魚子，仲有條勁長鰻魚，係大滿足嘅。

最後不能不介紹嘅，係呢道蟹膏沙律。雖然就咁睇個賣相就好似一般，但食物同人一樣，不可貌相呀。大堆頭嘅松葉蟹膏混入咗糖等等嘅調味料，吊出更鮮甜嘅蟹膏味。而被蓋住嘅就係蟹肉，啱晒蟹迷呀！

十和田總本店
地址：尖沙咀金馬倫道42號華懋金馬倫中心地下

文、相：Kar