尖東新商場K11 MUSEA幾乎個個星期都有新餐廳開業，嚟緊最新嘅就有呢間將藝術同飲食完美融合嘅藝術咖啡館！門口有朵大大朵嘅村上隆太陽花，又有多幅嚟自世界各地嘅畫作同藝術收藏品，連杯咖啡都係梵高《星夜》嚟！總之成間由內到外到返內都充滿住藝術嘅氣息。

梵高《星夜》、村上隆《Expanding Universe》……一幅幅鼎鼎大名嘅畫作，居然飲得落肚？點做到？！

客人選定任何嘅畫作、圖案，甚至係相片，send張相畀店員後，餐廳先以由澳洲獨家引入嘅咖啡機製作咖啡，再用藝術打印咖啡機print落厚滑嘅忌廉泡上，一杯個人專屬嘅飲品（可選咖啡或朱古力底，但一定係凍飲）就誕生喇！嗚呀咁鬼靚，完全唔捨得破壞佢囉！畀個小貼士大家，小心地輕輕喺杯邊呷，冇咁易摧毀到佢㗎。

當然有food menu啦，輕食如沙律、主食如意粉，甚至甜品都有得食。慢煮三文魚扒配鹽漬三文魚子賣相吸引，三文魚皮脆肉嫩，連埋三文魚子一齊食，啖啖鹹香。

但講到最推介，一定係甜品Tiramisu，大大件大滿足，食落酒鬼就最滿足！事關佢嘅酒香滲透晒整件嘅tiramisu啊！

至於呢份個樣靚一靚嘅士多啤梨棉花糖榛子醬朱古力多士，個名同樣都咁靚，叫做「斯人若彩虹，遇見方知有」！口感豐富，而且雖然睇落好似多甜嘢喺上面，但食落又冇想像中咁甜喎。

 烤蝦牛油果沙律

食完唔好即刻走，可以欣賞下呢度嘅收藏品同藝術品先呀。例如草間彌生嘅《南瓜》係135版中嘅第45版，有埋簽名㗎，仲有村上隆嘅《Dokodemo Door》、KAWS X National Gallery of Victoria 限量精品等，其中村上隆同Virgil Abloh合作嘅呢個手袋更係全球獨一無二！講樣嘢你知，唔止睇得，有錢嘅話，買埋走都仲得！

CURATOR BY LEX ART CAFÉ
地址：尖沙咀梳士巴利道18號Victoria Dockside K11 Musea B1樓B113C號舖
預計正式開業日期：10月7日

文、相、片：Kar