富豪雪糕車－解構童年回憶 | OpenRice 香港開飯喇

數唔清有幾多次，喺大街聽到「do-do-mi-so-so……」呢個熟悉嘅音樂，總係會欣喜若狂咁跑向紅白藍小貨車，排著隊買雪糕食。付款嘅一刻，你會發覺當初要踞起腳尖，先可以勉強將鈔票遞俾雪糕叔叔嘅你，今日已經生得比佢仲要高。富豪雪糕車除咗係夏日最好嘅落足點，仲承載著香港人一個又一個嘅回憶。

Photos by 中國國旅
富豪雪糕係美國最大嘅雪糕公司。特德·德魯、何敬源同唐學元三人喺英國旅遊時，受當地雪糕車啟發，於是就爭取富豪雪糕嘅香港特許經營權，將富豪雪糕車引入香港。第一架富豪雪糕車喺1970年年卅晚於荃灣大河道球場開業，當時一杯軟雪糕只係5毫子，但就喺一個鐘內做咗800蚊生意，本地雪糕車就咁殺出一條血路。

Photos by 嘉義市民管絃樂團暨合唱團
如果講念舊，雪糕車一定係數一數二。三十幾年嚟，雪糕車播嘅音樂一直都係《藍色多瑙河》。其實當年英國雪糕車製造廠俾咗好多選擇，作雪糕車嘅「主題曲」，但老闆何敬源只係對《藍色多瑙河》熟啲，所以就用咗這首名作，一用就係三十幾年。

Photos by 道後少爺．小恆 & 5pit
至於雪糕嘅種類，亦都係十年如一日：軟雪糕、果仁甜筒、蓮花杯、珍寶橙冰，而軟雪糕只有雲呢拿味。其實軟雪糕曾經推出過朱古力同芒果味，但銷量同雲呢拿味差太遠，而且一架車只擺得落一部雪糕機，所以軟雪糕就淨係得雲呢拿味。

Photos by Soldier 的世界 & 5pit
而大部份雪糕車嘅「打扮」都係無乜變化，車身被塗上紅白藍三種顏色，寫上「每日新鮮為你製造」嘅標語，好有懷舊感覺。但有啲公司就會用雪糕車落廣告，為佢哋換上新裝，最經典係有年書展為咗宣傳，喺雪糕車落咗周秀娜嘅廣告。

Photos by 荆楚網
自從政府停止發出流動小販牌照後，香港富豪雪糕車淨番碩果僅存嘅14架。雖然有政策嘅阻力，但集體回憶嘅存亡，始終視乎本地人嘅意願。近年日式、義式雪糕大受歡迎，所推出嘅雪糕琳瑯滿目，但只要我哋仲記得嗰首輕快音樂、紅白藍車身同簡簡單單四款雪糕，香港嘅富豪雪糕車就可以一直留下。

文: 段

隨時接收最新資訊
讚好OpenRice專頁！