以為酒吧餐廳一定係食西餐？咁又未必，北角最近新開咗間fusion餐廳酒吧，唔係据扒飲紅酒，反而係食各款日式拉麵，而且仲特意邀請到曾於米芝蓮拉麵店工作嘅師傅主理，又幾新奇有趣喎。餐廳裝潢都幾別出心裁，以玫瑰金色為主調，牆壁上都有好多小裝飾，連裝修都好有誠意。

特盛濃厚花膠叉燒拉麵($138)/普通($98)

餐廳所有湯底都堅持無加工湯及味精，由新鮮豬筒骨、雞腳、豬手及多款蔬菜熬製 20 小時而成，湯底杰身呈起膠狀，啖啖都係骨膠源啊；之後加入原塊鯉魚花膠再煮，花膠吸收晒湯底味道，同樣骨膠源爆發。配上厚切秘製叉燒，啱晒大胃王！

特色沙嗲復艷豬潤拉麵($78)

豬潤拉麵配上辣地獄湯，辣味唔係講笑，愛辣人士必食！豬潤都好厚身，有補血功效，冬天食就最啱啦～

獨創大蜆拉麵($118)

湯底用木魚花及昆布熬煮而成，再加入新鮮嘅大蜆，湯底濃郁，同時帶有蜆嘅鮮甜，開飯仔私心推薦啊～

川式辣子雞($178)

喺Restaurant & Bar入面食辣子雞都係一個新體驗！辣子雞用上乾辣椒、花椒及指天椒等五種辣椒，配酒真係一流！

芝士拼盤包括西班牙風乾火腿 及意大利芝士，叫一碟同朋友分享就最開心啦～

講到明餐廳酒吧又點可以唔介紹酒呢，餐廳約有接近六十款酒選擇，有唔少都好打卡able，好似呢杯一見鍾情(右)，外表呈粉紅色，果味濃而且味道清甜。

娜吧   

地址: 炮台山宏安道18號地下17號舖

文: Yanica

相、片: Tom Li