之前開飯仔喺Facebook預告過啟德郵輪碼頭即將有間親子餐廳，近日佢地開始試業，到底有咩咁特別？大小朋友有咩好食？睇下面介紹啦！
 

紙飛機親子空間嘅名一方面係同餐廳位於前啟德機場互相呼應，另一方面係希望小朋友嘅玩樂空間可以好似摺紙咁有無限可能性。餐廳由香港著名設計師陳幼堅操刀，室內面積近4,000平方呎。以木為主題，加上三面落地玻璃，同簡約自然嘅風格，感覺特別舒服。
 

而且開放式空間特別設計成中間係用餐區域，周邊係唔同主題嘅兒童玩樂區，換言之家長可以安心坐喺度食飯，同時睇到小朋友嘅行蹤。
 

大師油爆河蝦（$158）

五色淮山水彩（$68）

講到食飯，唔少親子餐廳都係食西餐或者輕食，呢度就非常創新地主打摩登江浙菜，仲請嚟出身於香港米芝蓮一星酒家嘅主理修建林師傅主理，質素值得期待。
 

脆香苔條豆瓣、靈隱尋味素鵝、爆汁話梅番茄、入味雞油浸雞（前菜六選四）（$88）

餐牌上除咗手作蒓菜魚圓（$98）、大師油爆河蝦（$158）、返璞歸真蔥油拌麵（$48）等招牌菜之外，當然亦有為小朋友而設嘅兒童餐（$128），款式仲係每日更換。另外仲有有機Baby Food，好似豌豆菠菜蘋果泥（$20）同有機米粉（$20）畀BB。寶寶奶泡Babyccino仲係免費供應㗎。
 

食飽飽又有動力繼續玩，餐廳室內有唔少活動空間，好似大型玩樂區、繪本區、廚房區等等。全部設施都選擇木材同自然物料，好似沙池就選用韓國訂製嘅木粒。仲有幼兒區專畀14個月以下嘅BB，同舉辦工作坊或者Party都得嘅多功能房。
 

之後到夏天嘅話，佔地230,000平方呎嘅戶外平台公園將會擺放喺外國非常受歡迎嘅Big Blue Blocks，畀小朋友盡情發揮創意。預計仲會有滑板車賽道，同舉辦親子主題嘅市集！
 

最後提提大家注意返餐廳收費係採取計時制，小朋友星期一至五$138/兩小時（每小時追加$60），週末同公眾假期$198/兩小時（每小時追加$80），12個月以下BB同大人就免費。

不過試業期間有特別優惠，小朋友星期一至五$98/兩小時；週末同公眾假期$138/兩小時！而且最重要嘅係，小朋友玩得開心係無價㗎嘛。
 

紙飛機親子空間
九龍灣承豐道33號啟德郵輪碼頭B區北面平台

文：Cathy