休息咗一排，拉麵哥又出動啦。不過佢今次唔係帶大家食拉麵，而係分別為男生、女生推介一間佢嘅心水餐廳，等大家可以同閏蜜/男女朋友/女神兵仔……去開開心心食好西，唔食唔熟，愈食愈熟咁話。

根據拉麵哥嘅觀察同分析，佢認為女生通常鍾愛去café，而男生就喜歡豪邁地食burger！於是，佢帶埋一個識咗唔係好耐嘅囡囡去咗尖沙咀一間主打法式多士嘅café，再去金鐘食爆多肉汁嘅burger。介紹好西之前，先為大家介紹，呢位係嚟自台灣嘅馬拉小姐，Juby，佢今次特登由台灣飛過嚟香港架！

漲卜卜French Toast

呢間麵包店，係嚟自日本表參道，喺首爾、香港等地都有分店，惟獨係Juby平時身處嘅台灣就冇分店咯。

Juby點評：呢度嘅French Toast同平時見嘅有啲唔同，漲卜卜，外層鬆脆、甜甜地，裡面好綿密。

拉麵哥點評：佢哋會用冷嘅忌廉奶浸住方包一晚，第二日再拎出嚟煎同烘，所以食落有好濃cream同奶味，外脆內香。

溫馨提示一句，每日限定30份咋。

Bread, Espresso &
地址：尖沙咀漆咸道南115號達成商業大廈地下舖

Juicy 雙層芝士牛肉漢堡

原來burger係拉麵哥嘅第二至愛，呢間西餐廳嘅double cheese burger，仲被佢評為係佢食過全港咁多間burger（佢真係食過好多間）入面，最好食嘅三甲之一！

Juby點評：牛肉邊邊有啲脆脆地，入面有好多汁，外面煎到成個包住啲肉汁咁。啲肉汁同芝士多到流出嚟，但又唔會影響麵包嘅口感。

拉麵哥點評：勁就勁在佢個配搭exactly係我哋食過嘅雙層芝士漢堡，厚身版，但咁簡單嘅配搭都可以做到咁好食，係因為每個環節都做得盡好。塊肉啱啱好煎到5成熟，個包香得嚟有微熱，好有誠意。

BTW，呢個漢堡真係幾有份量，Juby話自己個口比較細，拎住一啖係咬唔晒成個㗎，而拉麵哥雖然都好豪邁，但要佢一手拎起個burger都有啲難度啊。

Commissary
地址：金鐘金鐘道88號太古廣場4樓405號舖

文：Kar
相：Calvin Kwok