講到荃灣香車街街市，當然唔少得要提到排隊熱店老闆娘雲南米線，但其實街市同熟食中心裡面仲有唔少檔口都一樣有水準又非常用心。好似充滿回憶嘅撈粗麵，選擇豐富嘅素食自助餐，仲有當然唔少得嘅鑊氣小炒！
入味鳯爪上海麵 江記
平時鳯爪排骨飯就食得多，原來夾上海麵一樣得。呢個檔口最出名嘅就係蠔油鳯爪麵，鳯爪會炸過再用蠔油燜至入味，口感軟腍充滿膠質，而且佢地嘅上海麵無乜鹼水味又彈牙。另外Bite-size嘅手包菜肉雲吞同鹹香啱啱好嘅榨菜肉絲都係受歡迎嘅配料。
健康素食自助餐 香積廚素食
圖：小步舞曲
街市都有自助餐？皆因呢間店畀大家用一個價錢，任食小菜、炒麵、湯同糖水等，而且全部都係素食，最啱需要跑「素」嘅朋友。菜式選擇都算豐富，好彩嘅話仲會食到店員即煮嘅手打麵！雖然碗碟任拎，但請大家盡量用一碗一碟，用完嘅餐具亦要自己放返落回收桶呀。
那些年嘅車仔撈麵 肥媽屋
圖：Kan Lee
老實講，呢間車仔麵又未至於好食到一定要試，但如果你鍾意食撈粗麵，又或者係附近街坊，自然就會過嚟開飯。由幾十年前嘅車仔檔到入熟食中心，依然由人稱肥媽嘅老闆娘主理，釀豆卜、魷魚同豬大腸都係推介配料，最重要嘅係撈咗咖喱汁嘅粗麵，係以前嘅味道。
更多【熟食中心尋寶】： |
食人渣麵+小菜 老四火鍋小廚
咩叫人渣麵？其實即係蝦子麵上面再加包鮑片、花膠、蝦、魷魚等材料，味道唔算驚喜。唔少食家都比較推介其他菜式，好似用熱辣辣砂鍋上枱嘅砂鍋桑拿鱔，新鮮鱔肉簡單加蒜蓉豆豉等調味已經夠哂惹味。黑醋涼伴凍豬手嘅皮夠爽口，配黑醋醬最開胃。
抵食正宗泰國菜 泰好味
圖：小連
由一對泰國夫婦經營，放心餐牌上面有齊中文名同相，睇相落單就得。或者都可以參考各位食家嘅推介。泰式炸蝦餅夠分量又香口，生蝦刺身新鮮彈牙，泰式燒雞入味而且Keep到肉汁。而如果叫咖喱嘅話記得嗌埋蒜蓉包，牛油蒜香滿分，啱哂點咖喱汁食。
經典大牌檔風味 和記廚房
根據非正式統計，每個熟食中心都有一兩間小炒檔，而香車街街市嘅代表就係呢間。招牌脆皮炸豬手嘅豬皮的確酥脆香口，不過記得盡量趁熱食，凍咗就會大打折扣。因為樓下就係街市嘅關係，海鮮菜式都有一定水準，好似豉椒炒蜆、蒜蓉粉絲開邊蒸中蝦，同粉絲大蝦煲等。
文：Cathy