相信各位對呢間嚟自名古屋嘅珈琲店——KOMEDA’S Coffee一定唔會陌生，喺日本有超過成900間分店，分分鐘你哋都食過好多次。而家終於嚟到香港開店喇！新店由AEON取得特許經營權，首間舖位選址黃埔，除咗有多款招牌之作外，更有幾款香港限定嘅食品！

 香港店嘅裝潢同日本嗰邊差唔多，都係以木同磚作為主調，加上有日光透入，畀人一種舒適休閒嘅感覺。

 冰與火

一嚟就要講咗甜品先，應該絕大部分嘅朋友都會被呢個冰與火所吸引。牛奶軟雪糕配日本KOMEDA自家製丹麥麵包（伴糖漿），由64層酥皮疊製而成嘅丹麥麵包，以日本產小麥包每日自家製作，烘香後再喺面頭唧上勁濃奶香，以九州大阿蘇牛奶製作嘅牛奶軟雪糕，望落好吸引。雪糕溶得好快，要打卡嘅朋友仔留意返。

　炸蝦餅方堡、香辣炸豬扒方堡

餐廳主要以方堡/漢堡同炸物為主，另外都有意粉同主食。幾款方堡都係炸底，包括炸蝦餅方堡、香辣炸豬扒方堡同埋香港限定嘅黃金炸牛漢堡等。其中，炸豬扒方堡更係同新宿中村屋共同研發呢。蝦餅/豬扒等外層係炸得幾脆嘅，前者配特製千島醬，後者則有偏辣嘅辣醬。一份方堡切成3份，份量唔少啊。

　　　炸豬柳拼盤、炸雞

　
　招牌KOMEDA咖啡

當然，咖啡先係呢度嘅主角啦。招牌KOMEDA咖啡絕對係必試嘅item。喺世界唔同地方選取咖啡豆後，自家烘烤、提取同混配，更以特製厚陶瓷杯奉上，濃醇甘香，風味十足。

　紅豆小町 葵

紅豆小町 葵即係紅豆咖啡，無論凍飲熱飲都有大量甜身嘅紅豆喺杯底，令到成杯咖啡都即刻變得甜咗。

多款特飲及果凍牛奶咖啡

香港限定：雪糕抹茶歐蕾

雪糕抹茶歐蕾係香港限定嘅特飲，面層嘅雪糕同樣都係牛奶雪糕，不過可能因為雪糕嘅奶香太濃同太甜嘅關係，以致飲抹茶嘅時候，就覺得相對淡口，只能輕輕嚐到茶香。

コメダ珈琲店
地址: 紅磡黃埔天地黃埔號(第6期)AEON Style地下G01號舖
**預計開業日期：10月21日

文：Kar
相+片：Yan Yan