平時gathering飯局諗食咩都已經好頭痕，遇著生日飯局就更加頭痕！通常你問主角想食問，佢都會答你冇所謂。但冇所謂之中，生日飯總不能夠求其，環境氣氛、食物質素、生日驚喜等，通通都係考慮因素。就等開飯仔畀啲建議你哋參考下。同有返咁上下份量嘅人慶祝，餐飯當然都要有返咁上下份量，如果壽星仔女係海鮮迷，不妨諗諗呢幾間。
shake shake海鮮 The Captain's House
圖：環境：★★★★☆
尖沙咀，幾方便，地利位置先贏一仗。餐廳內部裝修以黑、白為主，幾有格調。早卜枱嘅話應該有窗口位揀。
食物：★★★★☆
呢度最出名就係食海鮮袋，即係自選三、五或八種海鮮再揀醬汁，然後就會全部入晒落個藍色網袋度，嚟個shake shake海鮮咁搖勻啲汁就食得。雖然賣相唔算太靚，但簡單方便又入味，每件海鮮都可以索晒汁。唔好怕醜，戴手套之後用手直接拎嚟食，最有風味。
而除咗海鮮，都有唔少甜品同蛋糕款式，有得預早要求畫碟寫生日祝福呀。
超肥美生蠔 The Oyster House
圖：環境：★★★☆☆
灣仔地舖，地方坐落係窄窄地，但係以木為裝修主要材料，枱面仲有燭光仔，係情調呀。
食物：★★★★★
唔想諗嘅可以直接嗌個海鮮拼盤，齊晒生蠔、黃金螺、帶子、鮑魚同青口，全部都好新鮮。如果係生蠔怪，慶生就梗係食盡佢，一於散叫。呢度有成7個國家10幾種生蠔，美國，法國，愛爾蘭，南非，西班牙，蘇格蘭、紐西蘭，要海水味重嘅又有，要creamy啲嘅又有，隻隻都好肥美同鮮甜。
而甜品香蕉拖肥批就可以當生日蛋糕，忌廉底下有幾條香蕉，最底係拖肥焦糖醬嘅餅底，夠晒甜。（生日就豁出去，唔好諗個肥字住喇。）
麻辣卜卜蜆煲 為食仔海鮮火鍋專門店
圖：環境：★★★★☆
呢間喺旺角嘅火鍋店，環境當然冇西餐廳嗰啲咁舒適啦，有啲窄窄地。但係佢哋有幾間VIP房，由5人細房到24人大房都有，其中兩間仲有電動麻雀枱添，開到凌晨兩點，搞個青春生日P係幾啱。
食物：★★★☆☆
明明係夏天但潮流興食卜卜蜆，呢間仲要有麻辣卜卜蜆煲，成煲都係鮮紅色咁好刺激，確認成枱都食得辣嘅先好叫。啲蜆冇沙，辣得嚟又幾清甜。不過如果唔想由頭到尾都淨係蜆蜆同埋蜆嘅，龍蝦海鮮鍋或者龍蝦湯水煮龍躉鍋都唔錯。原隻上啊，肉質爽口彈牙；龍躉仲好大條下，呢兩個湯底更見鮮甜，啱啱滾起未係淥咗太多嘢嗰陣記得飲返幾啖先。呀，最近仲新增咗芫荽餃添呀。
【生日飯局】： |
全海鮮宴 御膳
圖：環境：★★★☆☆
私房菜嚟，不過係兩個人都可以食嘅私房菜，彈性幾高。裝修簡單，木製餐枱。
食物：★★★★☆
鍾意食海鮮嘅朋友仔嚟到實好開心，蟹可以揀煮法，避風塘炒、薑蔥炒、定四川香辣炒都冇問題，最開心當然係花雕蛋白蒸，酒味夠香呀，蟹肉亦新鮮。仲有蒜蓉粉絲蒸蟶子、白胡椒爆炒鮑魚、生煎東星班等等全部都鮮味同驚喜十足。
之但係想有生日蛋糕嘅就要自己買上嚟喇，呢度只係得幾款紅豆糕、布甸等簡單甜品，不過，好就好在唔收切餅費。
海鮮蒸氣鍋 正宗水上人氣鍋專門店
圖：環境：★★★★☆
位於旺角中心地帶，算係幾寬敞，有卡位有圓枱，仲有大魚缸，睇住啲海鮮好生猛咁游嚟游去，好想食晒佢哋。
食物：★★★★☆
海鮮都有好多種食法，呢間就食蒸氣鍋嘅。蝦呀蟹呀蜆呀呢啲就梗㗎啦，美國生蠔蒸完都係大大隻，而扇貝上面會加咗調校過嘅黑松露醬，味冇咁濃但依然香，繼續食得出扇貝嘅鮮味。另外，成餐精髓查實係壓軸出場嘅粥，料唔使多，南瓜同豬骨，但吸收晒海鮮嘅精華，鮮甜到一個點。
西班牙私房菜 Sabor Spanish Touch Private Kitchen
圖：環境：★★★★☆
餐廳格調以紅、黑為主，燈光暗暗地，係幾有feel嘅，但如果想影靚相就似乎有啲難度。
食物：★★★★☆
如果壽星仔女係旅行成癮嘅話，呢間西班牙私房菜都幾適合，喺香港都可以食到正宗西班牙嘢呀。食開清酒煮蜆嘅，嚟到會幾有新鮮感，呢度用魚湯煮，湯底煮到奶白色，好溶啊，記住要飲埋。帶子又大隻又鮮甜，蒜味烤墨魚帶微辣，一份份tapas食食下都幾飽。當然唔少得西班牙名菜，海鮮飯啦，仲有墨魚汁底揀，唔怕食到啲牙同個嘴黑麻麻嘅可以揀。
同餐廳夾菜單嗰陣講聲係生日飯，就會有個一人份量嘅朱古力蛋糕，可以講埋想寫咩祝福字句上去，而其他人就有會有其他甜品。
文：Kar
