叮叮點心係開飯仔嘅好朋友嚟架，唔單止係童年回憶，最重要係快捷方便，放入微波爐叮一兩分鐘就食得，醫口痕一流！行過超市發現公仔同淘大都出咗四款新奇口味燒賣，一於買來試試味評吓分先。

公仔點心至尊 鮭魚燒賣 $12.9

呢個公仔點心至尊系列，每包得5粒，比起平時有8至10粒少，但size就大粒啲。鮭魚燒賣加入三文魚肉製作，面層亦有三文魚碎，一叮完魚味都幾突出，不過食落就冇乜三文魚味。賣相看似乾身，但咬落質感彈牙，算唔錯。

好味指數：★★★★

公仔點心至尊 芝士雞肉燒賣 $12.9

每粒燒賣上面都有三粒芝士粒，係以巴馬臣芝士加車打芝士製成。一叮就有一陣陣甜甜哋嘅芝士香，不過食入口芝士味唔算好重，略嫌芝士同燒賣味道分離，亦唔係特別夾，係勝在雞肉燒賣都幾有質感。

好味指數：★★★

淘大黑椒牛肉燒賣 $12.8

平時黑椒點拼都有黑椒牛肉燒賣，不過呢款用淘大黑椒醬，黑椒味香而且辣味比較平均，冇黑椒點拼咁辛辣。選用牛冧肉製作，肉質更加腍滑食落亦juicy，而且燒賣皮唔會叮到乾晒，雖然賣相麻麻但係好味嘅！

好味指數：★★★★★

淘大咖喱魚肉燒賣 $12.8

最伏之選！燒賣加入淘大咖喱醬及七種香料調配而成，叮完出來咖喱味係濃嘅，魚肉呈黃色但又帶透明，係有咖喱味，但質感太膠，又食橡皮嘅感覺！難食指數有五粒，證明咖喱魚蛋同燒賣係唔可以撈埋一齊架…

好味指數：★

試後感：新奇口味都係麻麻哋，開飯仔都係食返正常蝦餃燒賣牛肉算喇...