麵包控注意，又多一間烘焙店選擇喇！尖沙咀呢間近期嘅話題新店試業僅一個月左右，已經吸引唔少愛包之人幫襯，透明櫥窗放滿各式各樣嘅歐陸麵包，不時仲會出現人龍，皆因由前五星級酒店烘焙主廚主理（亦係老闆啊），款式幾新穎𠻹。
設即食咖啡區 必試酸種蛋撻
店舖由裝潢到出品都係走西式風格
麵包店愈開愈多，要突圍，由質量、款式到口味都要吸引大家。小店主打西式麵包——甜撻、冬甩、牛角包、丹麥酥、英式鬆餅等應有盡有，賣相吸引。店內更設有咖啡區畀大家即買即食，一邊嘆包，一邊嘆啡，係早餐或下午茶嘅好選擇。
酸種蛋撻（$16/件）每人限買3件，每日於12:30pm同4:30pm出爐
每層酥皮都好薄身，口感好似薯片咁脆卜卜；滑嘟嘟嘅內餡蛋香頗突出
開飯仔喺平日下午到訪，大部分麵包款式都有貨，惟未見人氣酸種蛋撻嘅蹤影，原來原味酸種蛋撻每日有2段固定出爐時間，而另一款鹹牛肉酸種蛋撻就冇指定出爐時間，賣晒就冇。花形酸種蛋撻，明顯見到一層層酥皮，加上蛋漿焗至金黃焦香，單睇賣相已經令人好有食慾。啱啱出爐新鮮熱辣，一啖咬落去酥皮非常脆口，而內裡則質感滑溜，層次感好突出。整體酥皮同蛋心好夾，甜度啱啱好唔會過甜，值得一試！
融入大熱+新派元素
開心果忌廉包（$30/個）夾上微甜嘅忌廉
開心果熱潮有增無減，呢度自然都有佢嘅蹤影～開心果忌廉包選用質感柔軟富彈性嘅法式布里歐麵包（Brioche），內餡夾滿creamy嘅忌廉，表面再加上開心果醬同果仁碎，食落開心果未唔算好重，不過可以滿足到忌廉控。
花生曲奇牛角包（$36/個）內裡呈蜂巢孔狀，口感鬆軟
英式鬆餅（$28/個）口感紮實，濕潤度適中，煙燻紅椒粉芝士味則坊間少見
另外仲有受歡迎嘅牛角包同英式鬆餅，兩者都有多款鹹甜口味㗎。其中牛角包結合曲奇創作新組合：面層加入軟曲奇，包內更混入鹹香嘅花生醬，可以一口氣食齊兩款甜品，配擱搭新鮮，邪惡又滿足。
原圖：店舖（IG）
Puff Bake
地址：尖沙咀堪富利士道3號地下
文、相、片：Sharon
編：Cathy
剪：Tony
