冬至同新年係一班人聚會「大魚大肉」嘅日子，不過食得多同時食得精明先係保持身體健康嘅上上策。咁點樣食得精明呢？其實中菜館有少鹽少糖菜式畀大家揀㗎，當中不乏精緻擺盤𠻹，即睇呢幾間參加咗「少鹽少糖食店計劃」嘅餐廳有咩推介，令大家食得盡興又健康啦～
圖：太極素菜羹
用上湯煮嘅素菜蓉同豆腐蓉，聽落簡單，但以太極造型上檯即刻令人眼前一亮。加上蝦米作點綴提鮮，烹調時鹽同糖嘅分量減半後，反而更突出唔同食材嘅原味道，清香感更明顯，食落好順喉。
西蘭花泡帶子
蔬菜同海鮮一向都係清新和諧既配搭，仲好啱做節食𠻹。大大隻、啖啖肉嘅帶子本身自帶鹹鮮味，加上西蘭花、紅西椒同黃西椒一齊炒，色彩繽紛引發食慾之餘，時蔬嘅天然甜味令帶子味道更豐富，唔講都唔知落少咗一半鹽同糖呀！
茶樹菇銀線小豆苗
茶樹菇煲湯就聽得多，皆因佢嘅菇菌香氣好突出，但原來做成小菜都一樣咁滋味。茶樹菇加埋爽甜嘅銀芽同小豆苗一齊煮，再以辣椒吊出所有食材嘅天然滋味，喺鹽同糖嘅分量都減半之下，無論口感同味道都更有層次。
大圍分店｜圖：JN Ng
清炒萵苣絲
萵苣本身帶有甜味，亦係一種容易吸味嘅食材，所以只需輕輕調味就足夠。師傅將萵苣切成絲，比平常用少一半鹽同糖，味道更加平衡。
蟲草花炒小豆苗
蟲草花嘅香氣加上小豆苗天然嘅清新滋味，一齊炒令味道相得益彰，只需少許鹽同糖就足夠提味，係盛宴中嘅清泉呀！
馬蘭頭百頁素千卷
想點精緻菜式亦有選擇，馬蘭頭百頁素千卷用薄百頁包裹翠綠嘅馬蘭頭，切件後以松子作點綴，本身就充滿豆品嘅甜、蔬菜同堅果嘅香，烹調時加少少鹽同糖就吊起食材天然嘅味道喇。
九年百合珍菌炒蘆筍
素菜配搭集合多種色彩，未食都令人賞心悅目，呢味菜有齊綠、黃、紅、啡、白咁多種天然顏色，加上蘆筍、百合、珍菌同彩椒各有獨特嘅香甜味，落半茶匙鹽同糖已足夠令味道昇華。
黑金蒜金菇蒸蝦
做節點少得蝦呢！新鮮嘅蝦本身就鹹鮮爽口，無需過多調味，師傅利用已稍微調味嘅黑金蒜同金菇一齊蒸，兩款素材嘅味道滲入蝦肉取代部分鹽同糖，食落更加清香順喉。
上湯浸時令蔬菜
清爽帶甜味嘅時令蔬菜，簡單以上湯浸煮，湯嘅鹹味慢慢滲入蔬菜，伴以少量微鹹嘅金華火腿絲一齊食，減少一半鹽嘅用量依然不失風味。
