GODIVA 一向都受朱古力迷追捧嘅GODIVA，首次喺香港開GODIVA cafe，粉絲們肯定引頸以待！為咗幫粉絲們止渴，開飯仔專程走到入元朗踩場，睇下GODIVA cafe 嗰4款最新甜品係乜料先！
1. 金緻典藏下午茶
4款新出甜品之中，最搶眼嘅當然係呢個tea set！外形好似一個木造燈泡或者熱氣球咁，簡單又搶眼，係粉絲們必影item！小食包括：迷你歌劇院蛋糕、迷你白朱古力藍莓蛋糕、朱古力雪糕(自選口味)、迷你鬆餅、macaron、法式鹹派、朱古力草莓，再搭兩杯飲品。價錢為$368/2位用。
喺GODIVA難得一見嘅鹹食──法式鹹派。
朱古力草莓以及迷你白朱古力藍莓蛋糕。
2. 朱古力火鍋
用GODIVA朱古力做成嘅朱古力火鍋喎，粉絲們應該更加開心！相比起一般朱古力，GODIVA朱古力唔會一味死甜，或者好苦，而係比較有層次啲！火鍋跟送6款小食，有香蕉、草莓、莓果、果乾、macaron以及迷你蛋糕！如果你非常鍾意朱古力，建議你先食迷你蛋糕，因為質感好似brownie咁，未食晒已經大滿足！價錢為$288。
我就比較鍾意草莓，味道清新啲。
朱古力同macaron味道都幾夾，能減輕macaron嘅甜膩，好balance。
3. 朱古力球
以暖暖嘅朱古力漿，倒落大大個嘅朱古力球，每次都睇到少女們眼定定，視覺效果一流。入面有GODIVA香草白朱古力雪糕、忌廉以及草莓等鮮果，味道又酸又甜，仲有幼滑嘅朱古力添！價錢為$138。
4. 比利時窩夫
經典比利時窩夫甜品，設兩款選擇。一款窩夫配GODIVA雪糕，開飯仔推介呢個窩夫搭配鮮果、忌廉，味道清爽啲，亦無咁易膩！價錢為$88。
Cafe座位不太多，但尚算闊落。
GODIVA 時尚生活咖啡館
地址：元朗YOHO Mall形點1樓1043A舖
文：Joy