牛魔王要注意！旺角呢間用柞木炭火燒烤嘅韓式燒肉店，最近引入一種極珍貴嘅韓牛品種貴妃韓牛，貴妃韓牛特別在於佢係一種從未懷孕嘅年輕母牛，所以肉質特別鮮嫩多汁。而且專業解牛師 Jungun Park話因為韓國四季分明，所以牛隻識得自己喺身體儲存脂肪，所以食落牛味特別重，紋理都會特別啲添！
月見韓牛 $120/片
將頂級西冷切成薄片，油花分佈平均，入口即溶！搭配埋加咗日本雞蛋黃+蛋白泡沫嘅韓式烤肉汁，味道甜甜地，口感又提昇一個層次。燒肉師傅建議先燒至約5-7成熟，再將醬汁拌勻，點埋醬汁，配上附有嘅飯團一齊食就最好味。
厚切韓牛肉眼 $328
厚切韓牛肉眼取自牛肋眼芯，係成隻牛最矜貴嘅部位，屬於1++級別。未燒之前已經好清楚見到一條條打橫嘅紋理，燒呢隻牛時間掌握好重要，見到肉汁開始滲出嚟就可以反面，而且記得要逐件燒。入口牛味濃郁，肉汁豐富，而且果陣牛味仲會停喺口腔一段時間添！
「極品韓牛燴飯」 (5-6人份) $488
1++級別的厚切牛柳粒，煎至7成熟，入口軟腍。白飯用咗有「米中之王」之稱嘅利川米，粒粒分明，而且米香特別重。撈埋牛肉汁、日本雞蛋黃同京蔥絲一齊食，每一啖都有濃厚嘅牛肉香氣！
帶子海膽 $258
將帶子燒熟後，放上紫菜，海膽同細蔥粒食，鹽味紫菜配上鮮甜嘅海膽同帶子，味道好夾！
平時食日本和牛就食得多，其實韓牛集合咗日本和牛同安格斯牛嘅優點，未試過嘅就要去試下啦！
地址: 旺角彌敦道700號T.O.P This is Our Place 5樓501號舖
文：Yanica
相、片：Tom Li