呢個夏天真係有唔少台式飲品等大家慢慢試，嚟到元朗搵到呢間開咗無耐，就已經儲落唔少街坊熟客嘅飲品店。主打水果茶同芝士奶蓋，最特別嘅係有士多啤梨奶蓋、芒果奶蓋同榴槤奶蓋等選擇，用新鮮水果加上落足材料，消暑的確一流！
 

夏茶雖然唔係台灣過江龍，而係由店主幾兄弟姐妹一齊努力創立，好快就得到元朗街坊賞識。舖仔細細但花嘅心思絕對唔少，由每日去買新鮮水果，選用台灣品種茶葉，到將唔同飲品調校至少糖少冰配方，飲得出有Heart呀。
 

特色奶蓋系列

芝士芒芒綠（$38） 

呢杯芒果茶用咗台灣水仙芒，大大粒之餘有恍如水仙花嘅清香。飲品拎上手已經聞到芒果香，飲落芒果蓉嘅甜味同綠茶嘅甘亦相當夾，分量十足但飲完亦唔會覺得太膩。
 

上面淡黃色嘅係芒果奶蓋，所有奶蓋都選用紐西蘭品牌原塊Cream cheese同Cream去打，而唔係貪方便用奶蓋粉，味道有芒果甜香之餘，芝士鹹香亦相當突出，甜鹹平衡而且口感特別滑。
 

草莓芝士四季春（$33） 

另一款水果奶蓋推介就係淡粉紅色嘅士多啤梨奶蓋，食到一粒粒果肉㗎！味道就酸酸甜甜咁，唔會似藥水味。芝士味唔太重，不過口感都夠厚夠Fluffy。而四季春係台灣一種烏龍茶，有烏龍茶嘅餘韻同時又有綠茶嘅清香，所以配士多啤梨奶蓋就唔會互相蓋過味道啦。
 

Oreo芝士紅玉（$32） 

鍾意甜食多過水果嘅話，Oreo奶蓋就啱哂你喇。Oreo碎落得夠重手，加上芝士奶蓋本身嘅鹹味同奶香，建議配紅茶減低膩度。而且飲奶蓋茶記得先打開蓋飲一半，之後先用飲管搞勻飲埋剩底嘅一半呀。
 

 
鮮果茶推介

鮮果青霧綠茶（$32）

另一主打係水果茶，見到西瓜、橙、青檸、檸檬等果肉感覺已經相當消暑。而開飯仔揀咗綠茶底，清香甘甜感覺更清爽。最特別嘅係飲落會食到一粒粒百香果籽，增加咬口。最抵讃嘅係揀咗正常甜度，飲落似坊間嘅半糖甚至微糖，但水果香味依然突出。
 

檸檬多愛玉（$28） 

另一夏日清新推介，呢杯其實係用青檸、檸檬同益力多打成，下面再加寒天（白色珍珠）同檸檬愛玉。愛玉係一種台灣特有水果，通常會整成愛玉凍，口感軟滑Q嫩。而寒天就咬落比較實，帶少少彈牙，所以有唔同咬口幾得意。雙檸益力多味道酸甜，夠哂醒胃。
 

芋頭奶茶（$26）+金珠（+$4） 

呢度亦有大家飲開嘅珍珠奶茶，想特別啲嘅話不妨嗌紅豆奶茶或者芋頭珍珠再加金珠（即係平時食開嘅珍珠）。特別係芋頭係自家熬製嘅芋泥，唔係落粉溝出嚟，甜味自然討喜。
 

雖然開咗無幾耐，但佢地已經開始推出唔同期間限定嘅飲品，好似榴槤奶蓋、香蕉雪沙等等。佢地亦話之後大概每2-3個禮拜就會轉期間限定口味，希望為大家帶嚟更多新鮮感。
 

夏茶
元朗康樂路8號康樂廣場地下3號舖

文、相、片：Cathy