中秋都過埋，又係時候約埋班friends去BB蕉喇！不過，年年唔係去大尾督就係去城門水塘或者大欖之類度燒，都燒到有啲悶。嚟緊介紹嘅呢4個燒烤場，有啲有靚景，有啲就好腳，搞手可以睇一睇做下功課。

無敵海景燒乳豬 白石燒烤

圖：味蕾之旅、愛吃達人

呢個場喺馬鞍山，靚景到一個點，可以望住個無敵海景嚟燒嘢食。如果人多嘅仲可以卜埋個活動房，燒燒下嘢食入去嘆下冷氣唱下K打下牌都幾爽。講返重點，即係嘢食，呢度提供嘅食物種類都幾多，丸呀腸呀扒呀梗係唔少得，仲有好多海鮮添，例如帶子、青口、龍蝦等等通通都有，最屈機嘅係，仲可以用個架掛住隻乳豬或者燒雞嚟燒，好有霸氣！燒完仲有專人幫手切添，皮脆肉嫩。

煲仔硯殼成煲嚟    巴希雅海灣重慶燒烤

圖：nicolechau20、义燒包

大埔都有唔少燒烤場，其中呢個就提供重慶燒烤。大部分嘢食都用竹籤拮好晒，一串串肉、一串串腸咁拎去燒好鬼方便。嚟到唔好齋食肉、腸喎，有個煲仔硯殼一定要留肚食，成煲嚟放上個爐度都唔係好激動啫，可？最後仲可以燒香蕉同菠蘿，香蕉燒完可以拎去加埋朱古力醬先食㗎！

燒豬大腸是王道  勁嘆燒烤場

圖：tracyho2004、Heiditwo

喺元朗嘅燒烤場，一樣提供好多丸類肉類同海鮮類嘅嘢食，唔使自己買完再一袋二袋咁拎入去燒，的確比以前方便得多。呢個場仲有啲其他場好少提供嘅食材，例如日本廣島蠔、帆立貝等等，識得燒真係可以燒到好好食，特別係帆立貝，一定要加牛油蒜蓉咁去燒。呀，連豬大腸都有得燒呀！

出旺角燒嘢食  旺角天台燒烤

圖：tomchai2009

想燒嘢食，唔使下下都入到大纜西貢之類咁遠嘅，近近地旺角都有場。有時收工後成班同事一齊去都幾方便，而且提供嘅嘢食種類都唔少㗎，基本嘅腸、肉、丸、菜都會有，當然，質素就未必有自己預備嘅咁高啦，但貪方便嚟計都OK。