鍾意生酮同純素料理嘅朋友，呢間人氣度高、100%無麩質嘅精品咖啡店，最近進駐中環開第4間分店喇。除咗帶嚟新款蛋糕，重有以自家發酵紅茶菌製作嘅排毒飲品，為注重健康嘅朋友提供多啲選擇。

壁畫主題為「境‧夢」

呢間分店嘅設計以花同國際象棋為主題，一入門口就見到色彩豐富嘅壁畫，3色花卉圖案既代表季節轉換嘅氣溫變化，亦暗喻品嚐咖啡時，唔同溫度帶出嘅香氣都各有不同。

無麩質四國血橙紅茶蛋糕（$72/件，$910/原個）

新店限定嘅無麩質四國血橙紅茶蛋糕，將稀少又珍貴嘅日本四國血橙製成果醬，味道甜中帶酸；加上以斯里蘭卡鍚蘭紅茶製作嘅鬆軟蛋糕，即使外層塗上草飼牛鮮忌廉，都開胃而唔油膩。

自家發酵紅茶菌

新店重有3款排毒凍飲，混埋梳打水，感覺好清爽，其中2杯更特別加入自家發酵嘅紅茶菌。紅茶菌用中式茶發酵，製成汁液後都帶有微微茶香。不過發酵需時，用晒就要等下批菌出產喇。

左：Tropical Fizz（$72）｜中：Kombucha Mojito（$78）｜右：Strawberry Vinegar Spritz（$68）

圖左同中間嘅飲品就係紅茶菌排毒特飲，Tropical Fizz加入檸檬汁，味道偏酸；Kombucha Mojito就以薄荷葉增添清新感覺，味道相對淡口啲。Strawberry Vinegar Spritz混合自家製果醋，酸度適中，配埋原粒士多啤梨更加fresh。

植物肉醬無麩質意粉（$98)

為咗更加支持環保，新店亦推出植物肉醬無麩質意粉，而且選用獲無麩質認證嘅Impossible Meat素肉，佢嘅脂肪含量亦比平時一般豬肉低好多。

Avocado Burger with Crab Meat（$128）

呢度嘅牛油果菜式都值得一試！好似Avocado Burger with Crab Meat用原個牛油果，包著大量蟹肉同火箭菜，鮮甜清香，啱晒鍾意輕食又想有啲蛋白質嘅朋友。

Smoked Salmon Avocado Toast（$118）

Smoked Salmon Avocado Toast可以加$25轉生酮吐司，牛油果醬同煙三文魚肉分量幾多。配埋火箭菜、橙肉、石榴同芝士製成嘅沙律，材料豐富，顏色亦好鮮艷。

Infiniti C
地址：中環德輔道中173號南豐大廈地下G03號舖

文、相：Cathy.C