憑住布甸包成功爆紅嘅人氣麵包店「嘉多娜餅屋」，最近靜悄悄喺何文田分店同區開新副線，推出一系列蛋糕、生乳卷、水果撻等，甚至仲踩過界賣埋手工雪糕𠻹！試業期間每日大約供應250杯，即睇開飯仔有咩推介啦～

全新甜品屋新品： 手工製軟雪糕

品牌自推出布甸包打出名堂，其後每次推出新品都成為麵包控嘅話題，好似國王布甸撻、開心果燒餅、爆餡泡芙等等。近日試業中嘅副線甜品店，主力供應蛋糕同軟雪糕，以全新形象示人！由賣麵包到賣埋軟雪糕，浩然老闆表示：「本身想做多樣賣埋蛋糕，覺得應該要分開麵包店同蛋糕店，所以選擇喺原區分店附近開多間副線。咁我之前有進修學做雪糕，所以就順便試吓。」

嘉多娜甜點店負責人浩然老闆

店舖環境寬敞，蛋糕櫃整齊陳列各款蛋糕

軟雪糕目前供應開心果同芋頭共2款口味，全部都係由100%原材料加日本牛乳製作，絕對足料㗎～開心果軟雪糕選用美國同意大利產地嘅開心果仁，磨成果醬並混合米糠油，成品係啖啖濃郁嘅開心果味道，雪糕仲見到啲顆粒㗎。特意配埋開心果脆餅，令開心果層次更豐富！

由原粒開心果打磨成開心果醬，100%自家製作，原料比例高

真．開心果軟雪糕配開心果脆餅（$28）每日約供應200杯

芋頭味雪糕都係用原個芋頭由零開始製作，芋頭會先蒸半個鐘左右至軟腍，再攪拌成芋泥狀，最後混合日本牛乳就大功告成啦！入口真係好重芋頭味，淡淡香氣啱晒芋頭控，加埋煙韌紫麻糬粒粒幾夾。

真．芋頭軟雪糕配紫麻糬粒粒（$28）

近15款生乳卷+蛋糕切件

除咗軟雪糕，甜品店仲供應多款切件同原個蛋糕。生乳卷有6款口味，包括原味、檸檬、焦糖柚子、朱古力、櫻桃黑加侖子同士多啤梨，鬆軟卷蛋配順滑cream係無敵組合！開飯仔推介開心果巴斯克蛋糕，$22/件價錢經濟實惠，蛋糕質地實在，配頂層開心果醬層次豐富。

左：士多啤梨生乳卷｜右：朱古力生乳卷，賣相靚仔，$22/件幾抵食

左：開心果巴斯克蛋糕（$24）｜右：另有常溫原味戚風蛋糕（$58）及朱古力伯爵茶戚風蛋糕（$68）

迷你甜點系列 下午茶一流！

喺呢度，你仲會搵到皇牌名物嘅變奏版：麻糬布甸。相比布甸包，呢款用煙煙韌韌嘅麻糬波波做基底，食落更有嚼勁。當日見到有原味、開心果同芋蓉款式，半流心蛋漿勁邪惡！

左：開心果麻糬布甸｜右：芋蓉麻糬布甸（$13/個，$25/2個）

同時仲有貝殼形狀嘅瑪德蓮同法式費南雪金磚蛋糕，前者口感略為濕潤，帶陣陣蜂蜜檸檬香氣；後者呈長方形，因為製作時添加咗杏仁粉同焦化奶油，所以有濃厚獨特香氣。每件獨立包裝，買畀朋友做手信或者小禮物都幾方便。

左：開心果瑪德蓮｜右：紅桑子朱古力費南雪（$10/件，$18/2件）

餅店仲出埋周邊商品，如喜多娜磁石貼同可愛造型蠟燭

嘉多娜甜點店
地址: 何文田梭椏道7號地舖

文：Sharon
相、片：Yan Yan