放題！好多人聽到放題兩個字，就已經會雙眼發光、口水直流，仲要係$38嘅雪糕放題，直情要即刻 衝去啦。由澳藉華人創立嘅呢間精品咖啡及意式手工炒雪糕店，最近除咗做雪糕放題優惠之外，仲一炮過出咗幾款夏季限定甜品！
呃like首選非「美人魚雪糕窩夫」同「美人魚Crazy Shake」莫屬。前者波浪形窩夫上嘅係Blue Vanilla意式炒雪糕、 鮮忌廉，同埋美人魚造型嘅白朱古力；後者嘅底則係淺藍色奶昔，一顆顆少女心要爆發了。
榴槤意式雪糕 – 中環店限定
榴槤控必試呢度新出嘅榴槤意式雪糕，超香濃嘅榴槤味就唔使講喇，仲要爆多果肉，係巿面嘅3倍呀，好滿足！師傅每日親自去果欄揀新鮮貓山王返嚟整㗎。不過每日限量50杯，同埋只係得中環分店先有。
梳乎厘班戟 – 荔枝角店限定
由上年紅到今年嘅梳乎厘班戟，口感鬆軟，仲有多款口味。想有啲新鮮感，可以試「日式花嫁果子」，靈感嚟自日本四國「幸福花嫁果子軟雪糕」，淋上士多啤梨果醬、唧埋鮮忌廉，再舖滿粒粒花嫁果子三盆糖，女生們又要尖叫多次喇。至於「New York Times Square」，則放上大大粒朱古力球，再淋上熱嘅比利時朱古力，當朱古力波遇熱時就慢慢溶化，原來內有乾坤——馬卡龍呀！
大家最期待嘅應該就係任食雪糕放題啦~~~ 中環店夏日限定優惠，凡係晚巿惠顧正餐，加$38就可以有雪糕放題，最新仲有伯爵奶茶雪糕同紅火龍果雪葩添。意式手工炒雪糕原價$68㗎，所以一食就可以即刻回本！
供應日期：即日起至8月31日
Holly Brown
荔枝角店地址：荔枝角長順街15號D2 Place二期地下1號舖
中環店地址：中環士丹利街22號地下
文：Kar
相、片：Kenna