鍾意飲兩杯嘅朋友對環境都有要求，中環呢間5星級酒店經過第2階段翻新工程之後，以溫室為靈感，用上大量鏡面打造帶新古典味嘅海景酒吧。由理念到選材都秉承「創意載體」為中心，好似首張雞尾酒酒單就用上6種將來因為環境轉變，可能絕跡於世嘅日常食材；配合埋多款西式輕食，同朋友嚟chill下氣氛真係一絕㗎。
呢度7月15日開業，暫時只有12:00-14:30嘅午市自助餐就可以訂座，早餐自助餐（主要供應畀酒店住客）同17:00開始嘅晚市時間都係walk-in。
話晒呢度係酒吧，當然先睇下有咩特色酒款啦！用「Here Today, Gone Tomorrow」為雞尾酒酒單命題，係咪有種發人深省嘅感覺呢？因為當中嘅雞尾酒分別用上蜂蜜、可可、雲呢拿、咖啡、白米同蘋果呢6款未來可能絕跡於世嘅日常食材，而每款都有原味同進化版可以揀；加上搜羅各地優質原材料，每一杯都充滿故事性㗎。
Single Origin Negroni（原味-$140）
呢杯Single Origin Negroni 以可可做題材，用上馬來西亞當地部落種植嘅Single Origin白可可豆，雖然唔係專登以公平貿易為理念，但支持呢類非商業化而大量創造嘅出品，都係酒店想帶出嘅信息。Negroni嘅酒底先加入可可豆陳釀幾日，入口濃烈順滑唔太甜，男士都啱飲；加上果肉面頭都配上馬來西亞白可可，令味道由頭至尾更加一致。
BARK, Leaf & Love（原味-$140）
香港有唔少蜂場，酒店特別同米埔嘅香港原蜜合作，喺蜂場內設置酒店專屬嘅蜂箱，每年大約有10kg蜂蜜產出。由於龍眼同荔枝樹環繞蜂場，所以酒店會按季節得到單一嘅龍眼蜜或同荔枝蜜。BARK, Leaf & Love主要用上今季嘅龍眼蜜、特製奶油配上原粒荔枝果肉，味道清新微甜富果香，但仍然畀到你飲烈酒嘅感覺。為咗令大家由視覺到味覺更加融合，仲特別訂製呢款手造陶瓷杯，帶出「Raw」嘅感覺。
左：ARGO Martini（$150）| 右：Hotel Juarez（進化版-$140）
呢度唔止對特調雞尾酒有要求，連一杯聽落好大路嘅Martini都搞搞新意思！飲酒之前先食用好似粒玉嘅Magic olive，佢係用液體轉化成球體技術，將橄欖汁、海藻酸鈉同調味料晶球化而成，一咬開就化成水，味道好似意式橄欖，再呷一啖Martini 令成杯酒味道更加實在。
店內有本「天書」，特別詳列酒櫃上數十支酒嘅故事同獨特之處，就連由A.I.研究配方，再經人手改良嘅氈酒都可以揾到，啱晒鍾意試新奇口味嘅朋友。
ARGO burger （$190）
晚上供應嘅食品有9款，冷熱小食同甜品都有。想大份啲有ARGO burger，安格斯牛肉漢堡扒差不多成寸厚， 配上香脆洋蔥 、煙燻芝士同自製蕃茄醬，酸酸甜甜好開胃；加上炸到香脆嘅幼薯條，絕對令人食指大動！
Carabinero tartare（$238）
平時嘅他他都係牛肉，Carabinero tartare就特別用出名鮮甜嘅西班牙紅蝦將其取代；用糯米脆餅承載，配埋魚子醬提鮮，集合甜、脆、清新3種滋味。
Mac ‘n cheese （$98）
芝士控必試Mac ‘n cheese！外層炸到金黃鬆脆，切開有滿滿嘅芝士，質感凝實仲有長長嘅拉絲，鹹度適中唔怕蓋過酒香。
ARGO
地址：中環金融街8號香港四季酒店大堂