踏入九月食慾之秋，特別多時令食材，其中一樣就係產自歐洲嘅生蠔喇，相估蠔迷一定好期待！法國蠔一向受歡迎，位於紅磡嘅九龍海逸君綽酒店The Promenade，啱啱推出咗全新「秋蠔滋味」主題自助晚餐，有五款法國蠔任食！
第一時間梗係要衝去生蠔區啦，本來只供應美國生蠔，而家upgrade 到五款法國生蠔，有Fine de Claire、Speciales de Claire、Brittany Flat、Normandy同Bouzigues，款式暫時唔會轉換。味道同質感各有不同，雖然大部分選用最細的No.4 size，九月剛入季未算最肥美，但食落都唔算太奀。所有生蠔都係廚師喺面前即叫即開，篤吓條邊仲郁架！
韓籍大廚教路，五款生蠔由淡至濃味順序食，可以先由產自法國北部嘅Bouzigues食起，質感偏爽，帶微甜及少量金屬味。之後食同樣metallic及nutty嘅Brittany Flat，然後輪到富海水味及蠔身較大嘅Normandy。最後可以食味道較鹹鮮的Fine de Claire，同最濃的Speciales de Claire。
（左）Bouzigues、（右）Brittany Flat
Normandy諾曼第生蠔係個人心水，海水味及蠔味平衡。
（左）Fine de Claire同（右）Speciales de Claire屬同一蠔種，但Speciales鹹鮮味更強烈。
生蠔杯有四款味，有傳統番茄汁嘅血紅瑪莉、微酸開胃嘅柚子汁、清新嘅青檸羅勒香草同藍色嘅藍伏特加。唔鍾意蠔味太濃，飲杯shooter都係好選擇，但藍伏特加酒味都幾勁架！
焗蠔有四款口味，包括煙肉、莧菜、莧菜芝士及芝士，選用半殼廣島蠔製作，不過每晚只會出兩款。用光波爐即場製作，熱辣辣，醬汁唔會太濃蓋過蠔味。
就算唔鍾意食生蠔，都仲有周打蠔湯、燒蠔壽司同炸生蠔可以選擇。
其他凍海鮮有松葉蟹及鱈場蟹腳、小龍蝦、翡翠螺、大蝦、青口等等，好多人拎但都refill得幾快幾密。個人覺得鱈場蟹腳肉質及味道都相當唔錯，食咗幾round 。
刺身區選擇多，大路嘅三文吞拿鯛魚固然有，仲有針魚、赤貝同北海道帶子先係驚喜！北海道帶子真心推介，大隻厚肉，每次拎都係原隻上！
芝士、火腿都新加咗唔同款式，熱盤選擇中西日韓印式都有，仲有兩款即切燒肉、即煮粉麵等。
甜品都有十幾款，以一口一件嘅甜點為主，亦有切餅、朱古力噴泉、即炒雪糕同movenpick雪糕任食。
供應日期及時間：1/9-30/9，6:30pm-10pm (星期六、日及公眾假期6pm-10pm)
價錢：
星期一至四 成人$568，小童及長者 $368
星期五至日及公眾假期 成人$608，小童及長者 $408
酒店eshop訂位有75折：http://bit.ly/2r5msOD
文、相、片：Perrins