四年一度嘅世界盃又嚟啦，球迷們要做足準備，邊度睇波、邊度飲嘢食宵夜都要有個list，唔使到時先嚟諗！同班friend睇完波梗係意猶未盡，今次我哋就精選咗五間開到夜一夜嘅餐廳介紹畀大家，最啱睇到半夜一齊去食宵夜講波經。
酒店廚主理 明師傅甜品
圖：雖然呢間糖水鋪門面似街坊小店，但係師傅曾經係多間酒店任職，所以出品一啲都唔失禮㗎。睇波睇到㷫恰恰，食返個「無敵西瓜盅」下火啦。原個西瓜上檯，入面有涼粉、西米同雪糕等配料，口感味道都豐富。想再涼啲嘅可以嗌多個雪糕，on top有棉花糖同爆谷，口感好豐富，營業至凌晨兩點。
牛魔王邊爐 喜鍋 海鮮‧火鍋‧小廚
圖：盡情賽後檢討，咁不如去打個邊爐慢慢傾啦。花膠鯊魚骨膠原湯鍋夠滋補，啱哂睇波捱夜補補佢。鍾意食牛嘅朋友就一定要叫返個「牛魔王塔」，有齊安格斯牛肉粒、本地牛肉同安格斯牛肉片，可以一次過試哂三款。營業至凌晨三點。
海鮮火鍋 倫哥尚品火鍋私房菜
圖：feipig
睇波激動起上嚟，真係會睇到餓，打邊爐俾多間選擇你。主打半任食海鮮火鍋，每日會提供6-9款時令海鮮，好似蟶子、海蝦同龍躉片等。除咗部份食材追加要加錢之外，其他都係任食。唔少食過嘅朋友都大讚海鮮好新鮮，食到攬住個肚走。營業至凌晨一點。
夜茶特色點心 籠太子點心專門店
圖：飲夜茶都係個唔錯嘅選擇，呢間點心專門店嘅食物新舊兼備，好似「不是炸兩」咁，就係以腸粉包住脆脆、蝦膠同西芹，好有創意。而傳統點心例如蝦餃、燒賣同雪山叉燒包等都一樣有水準，食個輕食唔使滯住，營業至凌晨兩點。
創意西菜配雞尾酒 Ember
圖：睇完波想飲返杯賀一賀，一於同朋友去酒吧chill吓。呢個外表黑媽媽嘅burger其實係墨魚餅煙肉菠蘿莎莎漢堡，材料好豐富，要掹大啲個口先可以一啖食到哂所有材料呀。亦有多款啤酒或者cocktail選擇，開到夠夜，營業至凌晨四點。
文：Crystal
