平時夜晚去熟食中心都係食大排檔多，北角渣華道市政大廈呢度嘅餐廳雖然都係以中菜為主，但菜式設計同用料的確幾有特色。而且氣氛特別熱鬧，唔介意環境差啲啲嘅話，同一大班親朋戚友嚟食團年飯就最啱！
特色私房菜全包宴 渣華軒
圖：甜三點
嚴格嚟講呢間餐廳唔喺熟食中心裡面，而喺五樓室內體育館隔離，所以環境相對亦比較舒適，似一般中菜館格局。而晚宴只有套餐選擇，分6位或12位同唔同價位。當中包括古法滋補桑拿蝦同回疆熱石火焰羊鞍等啱哂相機食先嘅菜式，亦有清蒸生猛大海斑同阿拉斯加大蟹粥等海鮮，唔同口味都照顧到。
馳名南乳炸豬手 東寶小館
圖：Iva_an
落返去二樓熟食中心，最旺場嘅一定係呢間小菜館，最出名嘅菜式係南乳炸豬手同風沙雞，基本上無論外國遊客定香港食客嚟都一定會嗌呢兩碟。另外餸多飯少又香口嘅敗家仔炒飯，要自己DIY嘅肉餅漢堡包，夠滑身嘅賴尿蝦肉炒蛋白配多士都可以一試。重點當然係要用戰鬥碗飲啤酒！不過因為老闆非常熱情嘅關係，環境都幾嘈下，想靜靜地談心就難啲喇。
保持水準姐妹店 店小二
如果東寶小館太多人，唔少人都會選擇嚟姐妹店呢度食，招牌南乳炸豬手同風沙雞一樣有得食。再介紹多幾碟小菜畀大家，香草炸豆腐賣相麻麻地，不過食落外脆內嫩，再加淡淡香草味。燒牛仔骨上枱見到中間仲Keep到粉紅色就知夠嫩，而花鵰荷葉蒸花甲就勝在花鵰同荷葉香夠夾。不過呢度一樣比較嘈雜呀留意返。
更多【熟食中心尋寶】： |
重口味麻辣雞煲 竹園重慶雞煲
天寒地凍想打邊爐，咁就要嚟呢個主打雞煲嘅檔口啦。招牌係麻辣霸皇惹味雞煲，雞煲足料而且醬料調校得宜，就算之後加湯灼其他配料都相當夠味。辣度可以揀大、中、小或微辣，想再惹味啲嘅可以加埋豬大腸！或者想要另一種重口味？介紹返呢度仲有一個冬天限定嘅麻辣牛喜喜羊腩煲，除咗羊腩之外仲有牛鞭同牛鮮子。夏天就會換泰南椰青雞煲㗎喇。
平實鑊氣小炒 財記小廚
圖：man131
比起其他檔口，呢間的確無乜招牌特色菜，但勝在水準平均，無太大驚喜之餘都唔會有咩驚嚇位嘅。想送啤酒嘅話可以嗌椒鹽瀨尿蝦、豉椒炒蜆、金牌蒜香骨等惹味香口小炒。想食清淡啲嘅話，亦有海鮮雜菜煲、涼拌豬手、胡椒豬肚雞煲等小菜。
自家製滷味外賣店 鼎留香新潮滷味專門店
最後介紹多間畀大家返屋企食飯加餸嘅外賣店，喺街市開業近十年。最出名嘅係滷鵝，幫大家起骨之餘仲切好哂片，返屋企一打開盒就食得。鵝片肥瘦得宜而且相當入味。仲有爽脆嘅滷豬耳、Keep到Juicy嘅滷豬頸肉、同嫩滑又食到豆香嘅滷豆腐都係推介。
文：Cathy