以日本和牛做主打嘅壽喜燒，唔只啖啖肉，嚟到銅鑼灣同尖沙咀呢兩間日式餐廳，前者配上時令刺身、免費升級甜品；後者則佐以即炸天婦羅等，炮製美味嘅席前料理。而兩個套餐都選用4個高質和牛部位，即睇有咩分別啦～
套餐以是日自家製酒肴、自家漬番茄開啟味蕾，味道偏清新酸爽。而時令日本生蠔會精選中至大隻嘅品種，務求畀到飽滿嘅口感大家，加埋4款季節性刺身，如爽口嘅牡丹蝦、帶子等，鮮味十足。再嚐入晒味嘅磯煮鮑魚，就可以開始嘆壽喜燒喇！
A5和牛包括西冷、沙巴當、三筋肉同牛柳，不過建議大家先試爽口嘅日本豚梅片，再品嚐和牛。其中沙巴當為較少見嘅部位，比濃味嘅牛柳爽口富油香。
A5和牛西冷油花最豐富，煮起後蘸用日本雞蛋製作嘅月見汁，口感更加滑溜！
而家透過OpenRice訂座同時訂呢個套餐，唔只有7折，甜品會免費升級為日式千層酥！千層酥即焗再輕微燒一燒，散發牛油香氣，夾住嘅吉士、士多啤梨醬配鮮果，甜度適中。另外伴以迷你馬卡龍，一份甜品試到唔同口味。
餐廳設有兩個用餐區，同樣以月亮做設計主題，打造柔和舒適嘅用餐環境。
昼月 
地址：銅鑼灣謝斐道535號Tower 535 3樓301號舖
呢間席前料理店著重同客人之間嘅交流，師傅除咗喺客人面前炮製各種料理，帶嚟視覺衝擊之外，亦會介紹當日嘅食材來源、特點等，讓大家you know what you eat。拍攝當日嘅前菜、蒸物有白梅貝、牛蒡免治雞肉煮物、水云等款式，味道以清香醒胃為主。
天婦羅方面，炸漿特別加入軟性嘅日本水，令天婦羅炸起後口感脆啲。而三款海鮮同兩款日本野菜，款式按當日貨源而定，有機會試到北海道海膽、鮑魚配肝醬、北海道草蝦、春天先有嘅獨子蒜、番薯等款式。其中番薯用上3個品種製作，經過繁複工序呈現雙色效果，別具特色。
呢個關東口味嘅壽喜燒，先用牛骨煲一個汁底再調味，令牛肉肉味更濃厚。而月見汁嘅蛋黃，用已炒香嘅洋蔥、甘筍等醃製1小時以上，味道層次更豐富。
主角和牛依次由西冷、肉眼、肩肉順序享用，淡味到濃味咁品嚐每個部位，而且每片都大大塊呀～
最後到肉味最濃嘅十勝和牛腹心肉，呢份係一客200g，前後嘅肉量加起嚟絕對滿足到和牛控。收尾嘅甜品係自家製木糠檸檬奶凍，味道偏酸以解和牛嘅油膩感。
餐廳裝潢大氣有格調，設有十多個座席，想確保嚟到可以慢慢嘆，記得經OpenRice訂座廉訂餐喇～
炑
地址：尖沙咀中間道15號H Zentre UG樓1-3號舖
主持：Nicole
文：Cathy
相：Michael
片：YanYan
