同好友聚會可以談心之餘，試埋新店自然更加滿足。開飯仔每個月會搜羅各區特色新餐廳，齊齊緊貼潮流打卡嘆美食！12月就有特色主題Fine Dining、居酒屋等，即睇邊款啱你口味啦～
12月更新
海景藏書室主題Fine Dining Bochord 
圖：裝潢以歐陸風藏書室為題，採用嵌入式書架、擺放數百本古典書籍、墨綠真皮沙發等佈置，充滿古典氣息，加上維港海景相伴，晚餐時段設有現場樂隊表演，浪漫氣氛滿滿。而主廚曾於香港頂級酒店入廚多年，炮製嘅Fine Dining融合多國風味，如日式鯖魚做前菜、以哈蜜瓜製作清新西班牙湯、紅蝦意大利麵則灑上本地老字號嘅蝦籽粉等，創意十足。
特色小型圍爐裏 炭兎
圖：灣仔新開咗間居酒屋，特別set up一個傳統圍爐裏，前米芝蓮餐廳嘅日籍師傅會用嚟製作即燒喜之次、燒牛油果等地道同創意燒物。而肉食之中，推介你試招牌名古屋交趾雞，係日本三大地雞之一，加入秘製醬汁用大火炭烤，肉質嫩滑帶煙燻味。另外重有熱辣辣嘅鐵盒燒廣島生蠔、鐵板明太子芝士玉子燒等佐酒料理。
沉浸式藝術雞尾酒吧 The Mansion
酒吧以鮮艷奪目嘅紅色絲絨為設計主軸，配襯酒紅色梳化、手工訂造嘅雲石金屬枱，充滿氣派又富格調；場內更展出唔同嘅藝術作品，或設有感官表演，將藝術同美酒佳餚結合起嚟。主打嘅IG-able雞尾酒之中，「No. 5」混合油脂波本威士忌、朱古力等，入口絲滑醇厚；而源自西班牙San Sebastian嘅經典Pintxos小食，包括肝醬拼魚子醬、伊比利亞黑毛豬、曼切高羊奶芝士等，佐酒一流。
新派港式甜品店 小點角落
想食港式甜品、小食唔一定要掃街嘅，嚟呢間新派港式甜品店就可以坐低慢慢嘆喇～佢嘅招牌雞蛋仔提供8款特色口味，好似「小時候黑森林」就以黑森林蛋糕為概念，加入黑加侖子啫喱、朱古力醬、燴車厘子等做餡料，而「蛋撻三點三」則融入茶記口味，加入蛋撻、奶茶醬、油砂多等。旺角新店亦推出提拉米蘇罐罐、升級版港式街邊小食，例如花膠碗仔翅拼蒟蒻麵、墨西哥芝士脆魚皮等，創意十足。
時尚浪漫西式扒房 New York Cut
圖：or#Tm65273439、foodstalkers_hk
臨近聖誕，想揾間餐廳鋸扒浪漫一下嘅話，不妨試下呢間新開嘅西餐廳～高樓底，以美元造型「金鈔」、瑪麗蓮夢露掛畫等特色佈置打造氣派時尚，又不失浪漫嘅氣氛，好啱約會或慶祝紀念日。主打嘅高質牛肉來自自世界各地，例如有日本A4 Black Tolachi Rump、西班牙Galacia Milk Fed Sirloin等，啱晒食得刁鑽嘅牛魔王，而且大部分款式會提供兩個分量畀你揀，細心照顧唔同食量嘅客人。
韓國政府認證韓牛 Galbitown
圖：wai3aa3
肉味濃郁嘅韓牛一直受牛魔王歡迎，要試到質素有保證嘅頂級1++韓牛，記得bookmark呢間餐廳，皆因每碟肉都會附上QR code小卡，掃一掃就可以睇到韓國政府官方認證嘅「韓牛出世紙」，知道韓牛嘅出生日期、屠宰日期、品種等資料。而招牌「櫻花蜂蜜」特選牛肋骨，特別用韓國櫻花蜂蜜醃製，香甜有咬口；如果鍾意多花款，「韓牛綜合套餐」包括肉眼扒、牛里脊等部位，上菜時重有IG-able嘅煙霧效果𠻹。
11月更新
純白法式甜品屋 Patisserie Millefeuille
圖：餐廳（IG）
中環Soho區一直畀人好chill嘅感覺，同呢間純白法式甜品屋慵懶嘅氛圍不謀而合，而半戶外空間可接待寵物，感覺更加relax。甜點主廚曾於多間米芝蓮星級食府任職，出品有保證，主打嘅迷你拿破崙千層酥有覆盆子開心果、雲呢拿榛果等四款口味；另外亦有蒙布朗、檸檬撻、三明治等甜品同輕食。
韓國富人之家主題 會長之家烤肉
圖：gayoung
以70年代韓國富人會長屋企為題嘅韓式燒肉店，復古佈置走奢華風格，打卡別具特色。嚟到必試招牌牛油熟成五花肉，師傅用牛油包住五花肉再做恆溫熟成，肉質更軟腍多汁，而牛油嘅香氣會滲入豬肉裡面！另外韓牛牛腸、新鮮鰻魚、醬油蟹等傳統菜式亦值得一試。
朝咖夕酒新點 Rootdown
圖：西營盤呢間店內外都以木為設計主軸嘅cafe，自然光充足之外，天花用燈箱設計嘅小天窗，會隨時間調整光暗同顏色，氣氛夠晒chill，而朝咖夕酒形式照顧唔同客人需要𠻹。食物方面必試grilled cheese三文治，半融芝士有拉絲效果，配咖啡或highball都好夾。
日廚坐鎮席前壽喜燒店 壽喜燒 樹
圖：餐廳（FB）
由日藉主廚主理嘅席前傳統關西風壽喜燒，選用高級和牛入饌，包括日本三大和牛之一嘅近江牛，以及京都姬牛。全部牛肉都由主廚親自人手切割，避免破壞和牛嘅纖維，以確保和牛質素。餐廳主要提供套餐同omakase，分別配以蒸物、炭燒鰻魚等風味料理。裝潢以黑色為主調，12席嘅L形吧枱都可以欣賞到師傅手藝，想私隱度高啲亦可以選擇VIP房間。
抵食海鮮自助火鍋 壹號漁船 
圖：平時靚裝嘅中式海鮮酒家，都係食即炒小菜、點心，但呢間新店就加埋可以一人一鍋嘅任食火鍋，而且性價比高，午市任食$118起，定量火鍋則$68起，配以唔同肉類、海鮮，相當抵食！如果想試海鮮料理，由鑊氣小菜、活海鮮料理到精緻小點都有，如清蒸長腳蟹、香脆蝦多士、蟹肉沙律盞等。
懷舊風中式酒家 歡樂大排檔
圖：westcoast202307、chiuwing123456789
以七、八十年代舊香江為設計靈感，用上戲棚、麻將枱等作裝飾，懷舊氣息滿分，打卡都別有一番風味。酒家日間主打傳統點心，即叫即蒸；晚市則供應大排檔鑊氣小炒同懷舊菜式，如波士頓龍蝦伏麵、香噴噴焗魚腸等，好啱同一班朋友開支大啤暢聚relax下。
可可博物館×Cafe CACAOLAB
圖：朱古力食得多，但你對佢有幾了解呢？銅鑼灣新開嘅可可博物館佔地三層，由可可嘅起源、品種等都有所介紹，會不定期開辦朱古力工作坊外，更將其中一層開埋cafe𠻹。嚟到必試坊間少見嘅Fresh Cacao Juice，係用白色嘅可可果肉製作，味道清新；另外骰子吐司、黑朱古力軟雪糕等烘焙食品同甜品亦係唔錯嘅選擇。當然品牌嘅朱古力，例如無添加糖嘅果味系列都可以喺度買到。
10月更新
釜山燒肉店登港 유명진의 육미정담
圖：來自釜山嘅人氣過江龍燒肉店，主打韓式烤肉同傳統韓國料理，而肉類主要由韓國、日本引入。其中切成薄片半圓形嘅｢花卷五花肉｣，油脂豐盈，烤至略帶焦香再蘸醬汁更加惹味；另外韓牛肉眼、新鮮鰻魚都係唔錯嘅選擇。想淺嚐試下嘅話，午市套餐只係$78起，傳統料理有薯仔排骨湯、烤小章魚五花肉飯等選擇，另外燒肉套餐則按款式包括2至6款肉類，總有一款啱你口味。
和洋風木系Cafe Relish Kitchen by ALOT
圖：一間觀塘起家嘅日式洋食Cafe開分店喇，今次打正旗號同日式傢俬店合作，將數千呎空間打造成簡約舒適嘅木系裝修；加上兩邊落地玻璃無遮無擋，充足嘅自然光令整間店有種閒靜感，非常relax。食物方面以輕食同意大利麵為主，例如蜜糖烤日本南瓜軟殼蟹沙律、鮮海膽蘆筍蟹肉三文魚籽忌廉汁意大利粉；而小食則推介較少見嘅牛小排餃子、酥炸特大多春魚。
泰式火鍋×街頭小食 四面泰•火鍋
鍾意圍爐打邊邊嘅朋友，可以一試沙田呢間最新嘅泰式火鍋店，佢嘅秘製冬蔭功鮮蝦鍋湯底，先炒香生猛海蝦、花甲同辣椒膏，再加入泰國香料熬煮2小時，配埋秘製調料，鮮香惹味。如果想配鴛鴦鍋，以椰子水、椰奶同椰漿煮成嘅椰奶雞湯鍋味道清潤，而慢燉牛板腱清湯鍋則加入泰國嘅香茅、南薑、豆蔻等香料熬煮長達8小時，香氣獨特。火鍋配料首推寶藏海鮮手工金盒，另外手工竹笙蝦卷、炭燒豬頸肉、招牌椰皇凍等配料、小食同甜品都值得一試。
日本過江龍立食壽司 寿司鱼がし日本一
呢間主打立食壽司嘅餐廳，係1989年喺日本創立，首間海外分店就位於啟德新商場AIRSIDE！香港店採用開放式壽司吧枱形式，可以近距離欣賞師傅精心製作壽司嘅手藝。品牌宗旨之一係「不時不食」，標榜選用日本無污染海域、每日由當地市場直送到店嘅海鮮。供應廚師發辦料理套餐、廚師特選壽司十貫配手卷、丼飯、單件壽司以及日本清酒等。
地道墨西哥菜 El Taquero
全港首間餐廳引入傳統直立式旋轉烤肉串架，所製作嘅傳統墨西哥醃烤豬肉，燒製時必順序穿上菠蘿、豬肉同洋蔥，令豬肉吸收蔬果香氣。而一系列墨西哥中部菜式，包括坊間少見嘅仙人掌粟米夾餅、粟米蒸粽等款式，其中夾餅餅皮、粟米脆片於店內自家製作，保證新鮮。試埋加入細細隻脆炸蚱蜢嘅啤酒雞尾酒Michelada，更加風味十足！
IG-able黎巴嫩餐廳 RUE DU LIBAN 
異國情調新餐廳～以搶眼嘅藍色同黃色做主調，加上大量花飾裝飾天花，獨立房間再鋪上富民族色彩嘅地毯，全店每個角落都好啱打卡。菜式方面由曾於知名酒店任職嘅埃及主廚主理，當中包括多款羊肉料理，例如用金色燒爐呈上嘅阿拉伯傳統烤肉、黎巴嫩羊肉腸、中東特色炸羊肉餅等。10月新張期間，晚市全單8折，兼送是日精選甜品一客，想試就把握優惠喇。
韓系休閒風打卡cafe Tamora
圖：韓國有唔少空間寬敞嘅cafe，而大尾篤一間由韓國情侶主理嘅cafe亦跟隨呢種風格，三層嘅座位之間保留足夠距離，以水泥牆、紅磚為設計主軸，加上對住湖景同山景，帶畀人恬靜淡然嘅感覺。食物方面暫時供應croffle、咖啡同濟州茶飲，陸續會加入甜品同brunch，帶嚟更多輕食選擇。
9月更新
人氣甜品店回歸 聰。C Dessert
幾年前全線結業嘅聰嫂甜品店，最近嘅選址灣仔重開，大家可以再之食到佢嘅招牌龍眼椰果冰喇！另外重有榴槤水晶珠、芒果奶昔雙皮奶等選擇。如果想試新品，可以考慮牛角窩夫系列，而仙草則換上新配方，口感更嫩滑，配上煙煙韌韌嘅北海道牛奶麻糬增加口感，大人小朋友都鍾意食。
抵食養生米線 花膠雞米線工房
米線控注意～上環開咗間花膠雞湯主題小店，招牌花膠雞米線只需$68，其花膠用老薑高湯浸泡，再蒸煮12小時至腍身；而慢煮三黃雞則嫩滑有肉汁；配埋用老雞、老薑、金華火腿等材料熬製12小時嘅湯底，香濃得嚟富膠質，養生朋友都啱食。而花膠雞湯底外，亦提供胡椒豬肚湯同麻辣湯底畀你揀。留意由即日起至10月31日新張期間，2-6pm設有主餐牌全單9折優惠。
Fusion摩登泰國菜 ASOK THAI GARDEN
圖：餐廳（IG）
人氣泰式船麵嘅姐妹店嘅姐妹店，主打一系列Fusion摩登泰國菜，而荃灣新分店沿用熱帶度假風為設計主軸，其白色牆身、藤製燈罩、木餐枱椅，予人休閒舒適嘅感覺。如果你係咖喱控，推介你試好下飯嘅蛋炒咖喱軟殼蟹同紅咖喱燒雞；甜品方面，焦糖榴槤撻配雪糕同花生椰子雪糕都不失泰國風味。
新派韓式料理 ANJU
韓文안주（安酒）意指佐酒美食，亦係尖沙咀呢間新派韓式餐廳嘅重點美食，除了提供多款手工醃製泡菜，以傳統調味料，如陳年醬油、韓國味醂、韓式辣醬等炮製料理外，更融入西式烹調風格，供應醬油帶子鮑魚、大蝦辣味炒年糕、風味三重煮八爪魚等惹味菜式。配埋有「深水炸彈」之稱嘅燒啤、韓式米酒或韓風雞尾酒，更加滋味倍增。
主打北海道成吉思汗燒肉 羊蹄山
圖：餐廳（IG）
羊肉控福音～銅鑼灣最近開咗間「北海道成吉思汗燒肉」主題店，主打嘅羊肉提供多個部位，其中羊頸柳有咬口兼肥瘦適中；鍾意肉味濃郁又有油香，則推介你試羊臀肉。燒肉時記得將蔬菜圍住圓拱型烤板邊邊，就可以吸收埋流落嚟嘅肉汁。另外重有羊肉餃子、羊肉湯等料理，可以自由搭配全羊宴𠻹。
創意港日Fusion拉麵 新・麺舎
有豬油渣，又有慢煮沙薑豬手粒，講緊嘅唔係粵菜，而係港日fusion拉麵！元朗呢間創意拉麵店現時供應6款拉麵，其中「很膠」拉麵配上帶花雕酒香嘅慢煮沙薑豬手粒，以及用豬皮、雞腳製成嘅骨膠原厚啫喱；另外「很地」拉麵則加入豬油渣，同火炙叉燒一齊食特別香口。而湯底按口味分別配上雞清湯、豚骨白湯、番茄清雞湯同醬油雞清湯，帶畀大家更多選擇。
懷舊風酒吧餐廳 水七木巷
圖：V Chan
又有打卡新店登場喇～位於中環嘅酒吧，裝潢以80年代嘅香港為題，加入城寨舞廳、士多、茶餐廳、理髮店等元素，無論邊個位置打卡都夠晒獨特。食物方面有砵酒蠔意大利燴飯、炸雞腳筋等港西Fusion口味，重有選用復古風中式茶杯盛載紅豆沙等懷舊糖水。而雞尾酒則以手搖飲品、香港特色飲料調製，創意十足！
8月更新
主打北海道湯咖喱 森．湯咖哩
北海道湯咖喱一入份有多款食材，好似觀塘呢間專門店，主菜配上十款香炸時令蔬菜，口感同味道層次夠晒豐富。而主菜提供海陸空口味，例如啖啖肉嘅慢煮嫩滑雞髀、飛驒和牛漢堡扒、日本帶子等；另外湯底加入大量蔬菜熬煮，香辛味適中，拌飯啱晒。
圖：打卡泰國菜 摩登堂
用虹吸咖啡壺煮冬蔭功海鮮湯？！冇錯呀，荃灣呢間新派泰式餐廳，採用萃取咖啡嘅直立式虹吸壺，將冬蔭功湯、泰式香料嘅精華萃取出嚟，味道層次分明亦好啱打卡。另外甜品同飲品，則推介充滿當地特色嘅泰國奶茶雪山刨冰船、班蘭生椰乳沙冰，嘆返份解辣都唔錯、
圖：日本串燒酒吧餐廳 FireBird
品牌以高質食材同創意元素作招徠，一直受大家歡迎，最近進駐東涌，更推出即燒「浜焼き」料理，並正式成為國泰夥伴餐廳。8月期間2間分店都會推出國泰會員尊享嘅「初嚐及二嚐日本酒套餐」，當中包括海鮮珍寶大蝦、甲羅燒同北海道珍寶帆立貝，配襯羽櫻手造大吟釀、久保田千壽、獺祭45純米大吟釀3款日本酒，提升鮮味指數！
新派中式私房菜 星御薈
炸物食得多，炸花膠你又試過未？尖沙咀呢間新派中式私房菜，以蟹膏汁製、黑魚子配襯脆皮花膠，集香、酥、滑於一身。另外外型似粗身臘腸嘅特色黑醋凍豬手、黑汁豚肉叉燒都係坊間少見嘅款式。想試嘅話要留意，餐廳午市設有商務套餐，晚市則只供應私房菜，照顧唔同類型食客。
圖：時尚寵物友善Cafe MOOJOO Lifestyle Cafe
大圍新商場有唔少特色餐廳進場，好似呢間時尚寵物友善Cafe就提供選擇多元化嘅餐單，包括中、英、印、台等口味，如英式早餐雞蛋仔、印尼巴東牛肉飯都係餐廳推介菜式。想簡單啲嘆個甜品chill下嘅話，朱古力控必試Valrhona黑朱古力焦糖蛋糕；另外雪糕雞蛋仔配手工果醬都係唔錯嘅選擇。
圖：健康概念文青Cafe Bischofia by Mood
如果你鍾意健康餐飲或想keep fit，不妨試下呢間健康概念文青Cafe，部份菜式由營養師推介，更提供卡邦尼蒟蒻麵、糖養奶昔等較低卡嘅食品，致力推廣咖啡慢活文化，同時將健康飲食融入生活。
圖：7月更新
廣角海景Cafe Umi
銅鑼灣呢間西式Cafe位於商廈高層，面向維港嘅一排大玻璃窗可以飽覽無敵海景，日夜景色都相當怡人，夠晒浪漫。食物方面大份足料，好似炸軟殼蟹咖喱蛋包意大利飯面層，放上原隻香脆軟殼蟹；自家手打和牛漢堡則啖啖肉，配埋薯條更加惹味。另外甜品同飲品都著重細節，例如伯爵茶蛋糕配上香橙乾做裝飾、香蕉朱古力咖啡重飲到香蕉粒，誠意十足。
圖：日本人龍丼飯店登港 日本橋海鮮丼
東京起家、將於7月17日正式登港嘅日本橋海鮮丼つじ半，連續6屆榮獲日本全國海鮮丼金賞，出品有保證。佢哋嘅丼飯係「一丼二食」，首先淺嚐兩片配襯特製胡麻醬嘅魚生片，再品嚐拌勻秘製醬汁嘅海鮮丼飯；當丼飯剩餘約1/3分量時，加入來自日本嘅三葉芹、鯛魚高湯等變成「湯漬飯」。而招牌「海鮮の山」丼當按級別配上金槍魚蓉、鮭魚子、象拔蚌、赤蝦等海鮮，師傅會將各種海鮮切碎拌勻，砌成「海鮮山」放喺飯上，帶嚟震撼視覺效果。
日本和牛+豚肉放題 梅吉涮涮鍋
一個價錢任食幾十款食材，啱晒有選擇困難嘅朋友。西灣河呢間涮涮鍋放題店，主打北海道十勝和牛唔同部位、以及數量珍稀嘅千歲豚肉，而自助區則供應鮮美海鮮、香港有機蘑菇、蔬菜等，如如青口、海螺、元貝、日本海藻等。湯底必試招牌「梅吉鍋」，以鰹魚、豬骨、日本紅咖喱等熬煮而成，微辣香噴噴；另外所有湯底都會配上牛牛冰造型清雞湯，混合起嚟味道層次豐富。
傳統×創意中菜 龍莊
人氣創意點心店「龍點心」開副線！主打嘅新派粵菜款式新穎，好似以懷舊小吃蜆蚧鯪魚球為靈感，製作蜆蚧魚肉燒賣；又選用皮厚多肉嘅荷蘭茄子，炮製魚香原條荷蘭茄子；而招牌菜「龍蟹膳」重可以一蟹兩食，整成鮮味嘅蟹王煎腸粉同上湯煮肉蟹！餐廳佔地約2,000呎，裝潢沿用懷舊復古風，如馬賽克磚牆、霓虹招牌、古典屏風等，帶老香港情懷得嚟又唔老土。
非一般靚景酒吧餐廳 Intervals
上機前飲返杯？！香港機場禁區嘅Sky Bridge天際走廊，最近新開一間超級IG-able嘅Cocktail Bar，可以飽覽停機坪美景，加上高樓底，睇日落更加浪漫有特色。餐廳可按旅客上機前剩幾多空閒時間而量身調配專屬酒品，另外精緻嘅西班牙佐酒小食Pinchos，以麵包或脆餅配上芝士、海鮮、蔬菜等，未到目的地都已經好relax！
圖：lonicole
6月更新
澳洲打卡軟雪糕登港 Aqua S
今個夏天食手工軟雪糕消暑，不妨試下來自澳洲嘅軟雪糕品牌。雪糕以歐洲奶源製作，質感幼滑，而每月1號、16號都會推出新口味𠻹。由即日起至6月30日就有意大利開心果、香濃黑芝麻味。如果想多啲變化，可以夾常駐皇牌海鹽味做扭紋配搭，加埋自選toppings之一嘅「經典棉花糖雲」，打卡度滿分！品牌透露嚟緊會陸續推出港式懷舊雪條、脆皮雪糕珍寶珠等款式，帶畀大家更多新鮮感。
唯美感親子餐廳 Jello & Mellow
提到親子餐廳，可能你會諗裝修走Q版風格，但鰂魚涌呢間新店就走唯美路線，即使大人自己嚟都可以融入其中。裝潢糅合北歐簡約風、童真感覺，例如以啡、白色波波注滿波波池；「Secret Garden」則設有彩色花牆，打卡啱晒。而食物亦充滿創意，好似「炭燒海鰻芝士煲仔薄餅」會喺客人面前即席點火，令海鰻增添焦脆口感；鍾意惹味小食嘅朋友，則推介你試「韓瘋炸魚薯條」，其實係串燒版Fish & Chips，將鱈魚裹上天婦羅炸漿脆炸而成，非常脆口。店內會不時舉辦互動工作坊，讓你同小朋友邊食邊玩。
日本人氣二郎系拉麵 岡山一番店
樂富店係呢間日本岡山二郎系拉麵店首間海外分店，來到試到招牌拉麵、豚骨醬油沾麵、芫荽辛辣拉麵等。濃厚豬骨湯熬煮8小時以上，配搭自家製叉燒、太麵同大量蔬菜，而蒜同油脂就可以按喜好選擇分量。另外麵嘅分量有4種，最細嘅小盛為150g，最大嘅特盛則有450g。餐廳更設有關東煮自助吧，蒟蒻、日本豬軟骨等每款$9起，當加配菜都唔錯。
圖：韓燒放題 韓燒大叔
旺角呢間新店主打韓式燒肉任食，由韓國直送濟州豬肉、慶州千年牛（韓牛）等食材，另外亦有美國或者澳洲安格斯牛嘅唔同部位，以及多款韓式熱食例如炸雞、泡菜煎餅、魚片串等。午市除咗任食亦有韓式套餐，$78起包自選主食、小食、飲品同湯，性價比唔錯。
圖：冰涼椰子甜品 Komorebi Komo Komo Coconut Dessert
冰凍嘅椰青清甜又透心涼，夏天食就最啱～九龍城呢間外賣小店就主打椰子甜品，其中原個椰子裝住嘅椰子凍，用椰子水製作而成；唔同口味嘅配料各有特色，鍾意果香嘅可以揀榴槤、芒果，另外紅豆麻糬、桂花味都唔錯。而飲品則有抹茶椰椰、桂花酒釀椰、榴槤雪沙等消暑口味。
圖：工業+懷舊風打卡Cafe Badgers Cafe
薄荷綠色窗框，為呢間懷舊風Cafe增添一份典雅嘅感覺，而店內嘅工業風裝修再加懷舊傢俬都充滿特色，裡裡外外都好啱打卡。食物以西式輕食為主，其中All Day Breakfast特別配自家製紅菜頭鷹嘴豆抹醬，顏色鮮艷；另外重有牛肉布里歐三文治、自家製芝麻脆餅配咖啡等選擇，好啱鍾意輕食或打卡同時嘆杯啡嘅朋友。
圖：為食小那星
5月更新
寵物友善+法式Cafe Le Gouter
近排又有唔少寵物友善餐廳登場，好似西環呢間法式cafe，連室內都可以帶寵物入內。小店走優雅法式路線，而設有傘形簷篷嘅戶外座位更加係打卡必影。主理人於烹飪學校Escoffier畢業生，製作嘅烘焙品同輕食之中，必試圓碌碌、充滿牛油香氣嘅Le Roll，唔同口味會配上太陽蛋、蛋白霜等；另外法式檸檬撻、Canelé等都值得一試，好啱tea time、假日嘆返份chill下。
圖：寵物友善+新派韓國菜 Cafe Joo
另一間寵物友善餐廳，戶外座位可以接待寵物外，更提供狗仔啱食嘅餐單。而主菜牌既有韓式街頭小食，亦有Cafe風格嘅自家製甜品，選擇幾多，加上主廚以擅長嘅西式烹調手法炮製炸韓式紫菜飯卷、招牌濟州島炒八爪魚配墨魚汁意粉等菜式，風味獨特。如果你係甜品/雪糕控，必試自家製牛奶軟雪糕配烤法國窩夫牛角包。
浪漫泰式酒吧餐廳 Nafafa Thai Cuisine & Lounge
食泰國菜都可以有浪漫感覺嘅～銅鑼灣呢間新店，用餐區嘅裝潢以泰式同現代風格為主，而酒吧區則走西式酒店風，就連餐具都充滿民族色彩，成個感覺幾relax。餐廳請嚟泰國廚師，以當地嘅烹飪手法、新鮮食材同香料，炮製炭燒泰國大河蝦等美式。如果想飲杯嘢chill下，亦有一系列以花為題嘅泰式雞尾酒，帶女伴嚟打卡都唔錯。
圖：餐廳（FB）
墨西哥酒吧餐廳 Uncle Miguel
想感受墨西哥民族風情，而家可以去中環呢間新墨西哥酒吧餐廳。店內以手工馬賽克，拼出富當地色彩嘅飾牆，打卡一流。而主廚係墨西哥原住民，以自行調製嘅新鮮食材，展現墨西哥北部、中部地區嘅地道風味，如經典嘅墨西哥芝士餡餅、墨西哥烤肉等，配埋墨西哥地道特飲Horchata更能凸顯風味。
新寵物友善Cafe Vive Cake Boutique
精品蛋糕品牌以全新Cafe形象回歸中環，並加入唔同元素，包括寵物友善區、西日式料理同茗茶系列。裝修方面走優雅風格，近店門嘅前半部空間可以接待寵物。菜式包括Roasted Eggplant、Fish & Chips等輕食同惹味款式；甜品方面必嘆用自家製開心果味Mascarpone芝士製作嘅Tiramisu；而茶飲可選擇中、西、日口味，選擇幾多元化。
圖：四川小菜+火鍋 山止川行
銅鑼灣呢間木系裝潢嘅四川菜餐廳，以供應川式小菜同火鍋為主。小菜必試招牌辣子雞，香辛惹味；而火鍋嘅湯底同食材走高質路線，提供騸牯牛吊龍、鮮管廷、四川臘腸、活蟶子等配料，有選擇困難嘅話則推介牛肉海鮮拼盆，讓食客一次過品嚐唔同鮮味，而家試業期間有9折優惠㗎。
圖：Andy Tan
4月更新
咖啡渣整牛扒 CARVER
各位鍾意鋸扒嘅朋友，銅鑼灣新開嘅酒店炭烤扒房，特別自家製「美國20日咖啡渣乾式熟成西冷牛扒」！師傅將來自巴西產區嘅阿拉比卡咖啡渣混合多款秘製材料，令牛扒風味更獨特。另外重有多款美國、澳洲、日本等地嘅高質牛肉，包括美國極佳級金標牛板腱、日本宮崎A4牛柳等。而牛肉以外，亦有真空慢煮鹿兒島黑豚豬扒、冰鎮海鮮、特濃朱古力蛋糕等款式。而家至5月31日期間，經OpenRice網上訂座，可享全單9折，想試就把握優惠喇。
英式甜品專門店 Crumbled
來自英國嘅Crumble甜品專門店，裝修跟隨總店嘅粉紅色設計，少女感十足又夠晒吸睛。Crumble可以自選配料，如Oreo、M&M、小熊軟糖、麻糬等，面層則淋上custard醬或配雪糕，而注入針筒畀你慢慢唧嘅醬料，則提供朱古力同焦糖味，砌成滿滿一碗後，視覺效果好澎湃，打卡啱晒！小店亦有幾款回定組合，每款口味有7-8種材料，方便有選擇困難嘅朋友。
圖：親民價越式湯麵 越湯
通常用A5和牛製作嘅菜式都貴啲，但呢間越式小店，就以親民價製作招牌火車頭日本A5和牛湯粉，幾十蚊就有日本A5生和牛肉片、手打牛丸、牛筋等5款餸料。餐廳更推出用料十足嘅海鮮麵食，好似火炙香草蒜蓉龍蝦湯粉，將龍蝦蝦身抹上香草、蒜蓉再火炙；另外辣味香草蒜蓉牛油焗牡蠣湯粉，則選用日本蠔，兩款都鮮味十足。
融合關東、關西風味 壽喜燒 伊勢熊
尖沙咀呢間專門店由日籍師傅主理，午市、晚市同廚師發辦都主打壽喜燒，其醬汁結合關東醬汁燉煮概念，以及關西糖烤風格，口味獨特；配搭嘅生雞蛋汁提供傳統款式外，重有將蛋白打成泡狀嘅雲朵造型，好啱打卡。牛肉主打日本橄欖和牛（以橄欖為飼料）同京都姬牛（黑毛和牛），亦有試期間限定特別款式；另外亦提供阿波酢橘雞、北海道四元豚等選擇。餐廳更選用產自日本岩手縣嘅壽喜燒鍋具，以及老字號窯廠「瀨貞製陶所」嘅碗碟，讓食客享受佳餚，同時欣賞日本傳統工藝。
台灣夜市風味 麻吉灶咖
將於4月11日開業嘅台式餐廳，店名都充滿台灣風格，「麻吉」係當地人形容好朋友關係嘅講法，而「灶咖」嘅台語則意指廚房。食物以台灣夜市風味為主，供應麻吉蚵仔煎、紅燒牛肉麵、特色刈包、蚵仔麵線等。另外惹味嘅麻吉鍋包括鴨血、臭豆腐、台灣香腸、墨魚丸等11款食材，湯底可以揀豬肉雞湯，或以台灣辣椒醬製成嘅麻辣牛肉湯，而番茄湯則啱晒鍾意清甜口味嘅朋友仔。
新派雞肉×辣味主題 辣雞製造
自問嗜辣嘅朋友，必定要bookmark大角咀呢間新派雞肉主題餐廳，佢同本地辣椒粉品牌合作，炮製香辣料理同自家創作辣味醬料盤！醬料分成10級辣度，如微辣嘅薑蔥蛋黃醬、特辣辣油、煙燻辣椒鹽等畀辣控挑戰。餐廳選用無公害雞隻來自日本等地，其中需預訂嘅皇牌烤爆汁雞經醃製、風乾1晚後，等客人到場再即時焗製，皮香肉滑；另外重有酒糟杞子雞子、香辣雞腎等選擇。而雞肉以外，特色雞尾酒辣蠔、麻辣豬手都值得一試。
圖：懷舊裝潢×精緻手工粵菜 粵饌
餐廳走中高檔路線，以深色巴西酸枝木配意大利黑白雲石作佈置，再結合典雅、復古同現代設計，有種上海灘嘅感覺。菜式專注傳承廣東菜風味，由前菜、主食、海味、湯羹、甜品等都有供應，其中招牌點心之一嘅原條花膠浸灌湯餃，灌湯餃內藏嘅上湯凍拌入鮮蝦、瑤柱絲等材料，配上富膠質嘅花膠，夠晒鮮味。另外珊瑚龍吐珠、香煎灌湯牛肉餅都係唔錯嘅選擇，同親友聚餐，甚至接待商務客戶都大方得體。
圖：餐廳（FB）
熊仔主題Cafe Cakebearbear
由蛋糕網店做到開餐廳都以熊仔做主題，皆因造型可愛嘅招牌「睡眠熊芝士蛋糕」深受大家歡迎。餐廳嘅店門打卡牆、擺設到食品都加入熊仔元素，例如擺放bear bear公仔、供應一人份熊仔蛋糕、熊仔冰甜品/特飲等。主食提供西日口味，有香草燒汁羊架、阿根廷紅蝦龍蝦汁意粉、蒲燒原條鰻魚飯等選擇。加埋鳥籠造型卡位、捕夢網主題牆畫等設計，食物同環境都充滿少女感，好啱打卡。
圖：餐廳（FB）
3月更新
雞煲火鍋×冰室主題 尚上下夏2.8 - 養生雞煲火鍋x冰室
尖沙咀人氣雞煲店最近進駐灣仔，更加入冰室主題！朝早供應冰室食品，如招牌芫荽餐蛋三文治、特色雞煲包、足料老火湯湯底麵餐等。晚上則變身為雞煲店，推出四重火燄芝士雞煲，當中包括莫薩里拉芝士、巴馬臣芝士、藍芝士同車打芝士，保證「芝」味無窮；另外爆辣死神辣椒雞煲用上大量有「死神辣椒」之稱嘅Carolina Reaper辣椒，自問食得辣嘅朋友不妨去挑戰一下。
英國人氣龍蝦+漢堡主題店 Burger & Lobster × OZONE
唔使飛都食到！首次登港嘅英國人氣龍蝦、漢堡主題店，今次以期間限定店形式同OZONE合作，由即日起至3月18日，將主打嘅漢堡、龍蝦料理同龍蝦包帶畀大家。你可以喺尖沙咀全球最高嘅天台酒吧，享用香港限定嘅避風塘風味龍蝦、期間限定嘅脆炸包配雲呢拿雪糕啊～
圖：餐廳（官網）
摩登菲律賓菜 BARKADA
呢度供應招牌香辣蝦醬椰子麵、鐵板炒豬腩肉碎等菜式，估唔估到主打咩料理呢？係摩登菲律賓菜呀～餐廳由飲食集團Singular Concepts、美籍菲律賓人以及飲食網紅Jen Balisi合作開設，裝潢亦色彩繽紛，又混合園林、優雅、民族色彩等元素，充滿熱情同親切感，即使嚟飲杯嘢輕鬆下都好relax。
圖：中環打卡居酒屋 Yurakucho
中環最近開咗間IG-able嘅居酒屋，以東京站（火車站eki）周邊環境為設計靈感，加入石牆、鐵絲網等元素，時尚又型格。餐廳供應一系列爐端燒食品、炸物、甜品等，同時搜羅特色清酒、日本威士忌等酒類飲品，讓大家放鬆身心享受美食。
圖：kacti.foodi、餐廳（FB）
Whisky啡酒Cafe 一刻
尖沙咀呢間啡酒Cafe注入威士忌元素，更聯同The Whisky Library，將5款來自蘇格蘭3大獨立裝瓶商嘅出品，以Tasting Set形式配搭鹽酥雞、迷你雜菌盛同炸蓮藕片，畀大家試唔同風味。想飽肚啲嘅話，日式叉燒流心蛋漢堡都值得一試，Muffin包底同叉燒都係自家製㗎。Cafe全店採用水泥牆設計，配襯木製傢具，環境幾chill，重好啱打卡𠻹～
圖：餐廳（IG）
2月更新
Jer@MIRROR與好友開樹木主題Cafe 根
人氣男團MIRROR再有成員開餐廳！今次係同樣為食嘅Jer柳應廷。新店概念源自出道作品「物語系列」同之後嘅「重生系列」，以樹木重生為主題。特別同本地機構香港木庫合作，用被颱風吹塌嘅大樹做成長櫈，更將800塊樹皮砌成Cafe裡面嘅打卡大樹。食物方面除咗Jer同一眾柳柳粉一致推介嘅辣蒜香烤春雞之外，亦有一系列呼應大自然主題而創作嘅植物造型甜品，例如栩栩如生嘅苔玉蛋糕。
圖: YoKeeYeung
特務主題華麗裝修中菜館 花圖
而家嘅中菜廳越開越多唔同主題，好似尖沙咀呢間新店就以王牌特工為靈感，豪花千萬打造「特務神秘角度」酒廊區、「特務神奇道具衣櫥」用餐區等，入去可以幻想自己係James Bond！餐廳主打重新演繹嘅經典粵菜，好似爵士湯、鹽酥脆皮雞、和牛寶盒等。午市供應點心，晚市另有火鍋選擇。
全港獨家研發AI智能泡茶器 活在茶下
科技點樣可以同傳統飲食結連？有茶師團隊用咗兩年嘅時間，研發咗全港首個AI智能泡茶器，以人工智能根據各種茶葉嘅特性，自動調校水溫同浸泡時間，增加沖泡出嚟嘅茶葉嘅穩定性。除咗莓果滇紅茶、香茅茉莉等，更有利用燕麥奶沖嘅普洱茶，面頭仲有八角，茶香回甘，微甜消脂又健康。新店仲有輕食menu，例如加入宣威火腿同芝士嘅雞蛋仔，則帶有pairing嘅元素。芝士同茶接觸後，會產生淡淡嘅榛果香，層次多變。
性價比高任食台灣火鍋 好呷台灣火鍋
又一間任食台灣火鍋店開業！新店位於銅鑼灣，晚巿可以任食120分鐘，供應18款湯底選擇、53款食材包括台灣製特產，同埋豬雞羊牛等肉類，澳洲M5和牛都係任食唔嬲呢。輕奢華盛盤食物更以三層架盛載，新鮮生蠔、鮑魚、美國SRF和牛牛肋粒、手切牛下肩胛翼板等都可以食完再食。澳洲M5和牛肉味較濃，牛肩胛則油脂軟滑，各有捧場客。性價比高在除咗火鍋配料外，自助區更有多款台灣小食，甚至連手搖茶都有得飲。
中式商務自助早午餐 永8舫
西式早午餐食得多，想特別啲不如試下中式。灣仔新開嘅新派高質中菜館，新張期間推出自助早午餐，可以任食逾30款精緻點心同小菜，如啤梨鹹水角、兔仔餃、油爆蝦、芝士焗豬扒飯等；而每位享用自助早午餐嘅食客，都送上秘製天宮翅及波士頓龍蝦半隻（優惠暫定由即日起至2月28日）。加上裝潢結合藝術感同優雅風格，又設有2間提供卡拉OK設備嘅貴賓房，同親友聚餐或招待商務客人都大方得體。
現場即製手工意粉×澳洲菜 Man Mano
手工意粉梗係愈新鮮愈彈牙啦！東薈城呢間糅合現代風味嘅新意式餐廳，店內特設Pasta Corner，每日以優質小麥粉同美國雞蛋，現場即製逾6款手工意粉，炮製牛臉頰肉醬闊條麵、越南大蝦慕斯意式雲吞、澳洲羊肩通粉等款式。餐廳以優雅嘅淡粉色系作主調、碎花大理石檯、木等元素佈置4,000呎空間，重有少量戶外座位，氣氛寫意溫馨，好啱約會、一家人嚟放鬆身心享用美食。
圖：餐廳（FB）
Farm-to-table+肉店概念意式扒房 Macelle
Soho區呢間意式扒房，2月3日起開始試業，其店名靈感來自意大利文「macelleria」，即係「肉類切割專員」或「屠夫」（butcher），皆因餐廳糅合肉店概念，食客可以自行喺扒櫃選擇直接從農民購入嘅進口肉類。招牌菜係分量十足嘅1kg Angus Fiorentina Steak，另有坊間少見嘅1.5kg M5和牛牛臀蓋扒，而Steak of the Day則每日供應唔同部位，啱晒鍾意新鮮感嘅朋友仔。
鐵板上熟成阿根廷牛扒 La Parrilla Steakhouse
中環呢間懷舊風阿根廷扒房，採用紅磚牆、仿木屋假天花設計，嚟到仿佛去咗外國咁，氣氛好chill。餐廳設有自家熟成櫃，將來自阿根廷唔同地區嘅牛肉熟成最少7-14日，令肉質更軟腍。而牛扒上菜時亦好吸睛，皆因大木盤中間有鐵板熱住牛肉外，兩旁分別放上6款醬料，如阿根廷青醬、芥末醬，讓你一次過試到多種口味，其中主打肉眼扒、封門柳都值得一試。
圖：jbyc
1月更新
集合歐洲4國美食 F.I.G.S. Bistro Mediterranean & Apéro Terrace Bar
太古城中心最近開咗間地中海餐廳，主打法國、意大利、希臘同西班牙菜式，而店名亦取自呢4個國家名嘅第1個英文字母。餐廳全日供應法國海鮮燉菜、新鮮自製嘅意粉、希臘風味烤肉同經典西班牙菜式，如煙燻烤雞肉串、巴斯克風味烤八爪魚、鮮嫩烤蟹肉捲等。其裝修則走玻璃屋風格，又有戶外露天座位，環境好休閒寫意。
創意日式風味 ROOM 3
鍾意邊嘆美食邊飲返杯嘅朋友，可以試下尖沙咀呢間新開Gastrobar。主打嘅日式料理同和風雞尾酒不乏創意元素。好似仿海膽造型嘅「流心海膽」，用太刀魚手工魚蛋包著北海道海膽，再沾上紫菜炸成；而8款招牌雞尾酒之中，The Fiction混合日本特有甲州葡萄酒、琴酒同香檳，上檯時會加入煙霧效果𠻹。加上店內3個用餐區分別用上竹林、鏡面等設計，啱晒潮人嚟打卡。
日本×歐陸風味 iza’bis by city’super
銅鑼灣人氣日式超市第2間餐廳，以日本居酒屋同歐陸酒館為題，食物款式多元化。必試以獨家引入乙女A5和牛製作嘅燒肉同吉列菜式外，另有慢煮有機羊膝、冰鎮海鮮塔、鱘魚魚子醬配香檳及Tous Palais迷你薄煎餅。而店內所用嘅魚子醬，係超市聯乘法國百年歷史品牌Petrossian旗下生產線製作㗎。
人氣麻糬波波專門店 Silver Mine Bake
點解呢間小店一開就有唔少人捧場？皆因佢哋之前喺喺梅窩嘅士多寄賣時已經有唔少Fans，最近更衝出離島落戶中環！麻糬波波有原味、肉鬆、芝士、朱古力同抹茶紅豆味，最多人推介嘅係肉鬆味，肉鬆落得夠多、鹹鹹甜甜咁估唔到又幾夾。而且麻糬波波外脆內煙韌，口感QQ。
圖：美式德州漢堡 b.o.t.h By Texas Burger 
主打美式潮流漢堡嘅呢間餐廳，最新去到九龍灣開分店。新店室內設計以美式欖球運動場館為藍本，並有多款新菜式。為咗漢堡而去嘅朋友仔記得試小龍蝦牛肉漢堡，小龍蝦先以牛油同香草慢煮過，另外特調溶岩芝士醬亦由Velveeta cheese同墨西哥煙椒混合而成，好惹味！厚切咖啡豬鞍扒係另一推介新菜，選用加拿大天然無激素、無污染嘅豬鞍，面層舖滿秘制醃料同偏堅果味嘅咖啡粉，再配埋以Kahlua 咖啡酒調配嘅醬汁，肉味更突出。
新派潮州打冷 鬼滷
打冷畀人感覺偏麻甩，但呢間新店則展示精緻嘅打冷都啱撐檯腳！餐廳裝潢集懷舊風同西式酒吧元素，更選用風格雅致嘅餐具，例如2人份蠔仔粥會連埋蔥粒、榨菜同芫荽3小碟，用木托盤呈上，整齊美觀；潮式滷水火鍋則用龍紋圖案小鍋，配搭滷水湯底，配上牛小排、潮汕牛丸等5款火鍋料，另外亦供應雞尾酒等西式飲品，風味獨特又充滿格調。
圖：黑色魅力×席前鐵板燒料理 夜。鐡板燒
呢間日式鐵板燒餐廳以暗黑為題，但係指裝修風格，唔係料理呀～店內特別用多盞背光燈打造陰影效果，令天花滿佈日式風格嘅投影，增加神秘感，同時不失高貴氛圍。食物方面，餐廳特別製作創意十足嘅「色彩醬汁」，如綠色（日本青海苔醬汁）、紫色（藍莓製成水果風味醬汁）等，炮製店內喺魚缸放養嘅海鮮、宮崎牛等高質食材，配搭重會隨季節更新㗎。
圖：TMG22
高級鐵板燒×壽司 赤の匠
銅鑼灣呢間高級日式餐廳，裝潢以火同赤色為靈感，呼應店名以及主打嘅高質鐵板燒，另外壽司都係呢度嘅重點菜式。餐廳選用來自日本同世界各地時令食材，如飛驒牛、澳洲活鮑魚等。其中招牌清酒蒸鮑用清酒蒸煮7個鐘至軟身，再席前用日本訂製嘅玻璃蒸壺煮幾分鐘；而冬季限定香箱蟹壽司，則以雌蟹松葉蟹炮製，每年11月至12月尾期間捕捉，非常矜貴。
高級炸豬扒 低温揚げ 白とんかつ 白桜
中環呢間餐廳由日籍師傅主理，主打白炸豬扒嘅白色麵糊用低糖製作，經低溫油炸後，吉列皮顏色較白，內裡肉質粉嫩；而調味料亦有好多款，例如黑松露鹽、岩鹽、芝士、用紫蘇葉整成嘅紫紅色醬汁等，一餐試到多種滋味。另外裝修參考現代日式建築美學，更選用日本優質木材，打造既簡潔又高雅嘅感覺。
圖：日本特色品牌三合一 天心
集合日本3個餐廳品牌係呢間新店嘅賣點，其中まるみつMarumitsu嘅鮟鱇魚肝湯拉麵、鮟鱇魚肝鍋；空海Kukai嘅白Groove拉麵；人氣芝士店Runny Cheese用法國芝士製作嘅甜品都值得一試。留意返餐廳日夜供應唔同食品，中午主打拉麵，晚市有火鍋，而甜品同串揚則全日供應。
圖：文：Cathy.C，Cathy.H，Kar
