提到廣東菜館，就一定要請教夠鑊氣火炮兵Artilleryman，事關廣東菜入面有佢最愛嘅鑊氣小炒，相信佢平時一定食唔少！以下落嚟，一於等鑊氣火炮兵為大家介紹一下今次入圍嘅廣東菜館啦。大家睇完食完之後記得要去投票喇，你嘅一票係好重要嫁！
 

禾桿冚珍珠風味小炒　煮打菜打冷小菜館

圖：Kan Lee、Glacierz

筲箕灣呢間煮打菜打冷小菜館，名符其實係唔少港島人心目中嘅主打菜。舖頭門面低調簡單，當你食完之後就會發現大有驚喜。招牌菜籠仔荷香蒸爆牙肉餅係大部分食客嘅必叫之選，食客可以自己揀鹹蛋、土魷、鮮魷、銀魚、鹹魚同梅菜當中兩款配料同肉餅一齊蒸，口感爽口彈牙，同其他地方食到嘅蒸肉餅與別不同。蜜汁吊燒骨肉質鮮嫩，外層以香濃蜜汁同果仁包圍，只係賣相已經令人垂涎三尺。
 

工廈入面嘅健康住家菜　新蒸武門

圖：鬈毛妹

平日出街食嘢好難避免食到味精，係時候要食返餐健康嘅住家菜清下腸胃。新蒸武門位於觀塘嘅工廈入面，主張唔落味精，誓要為食客提供住家感覺嘅健康菜色。點菜前，店員會為每位客人提供一杯養生八寶茶，味道清甜自然，為平日繁忙工作嘅自己降一降火。籠仔蒸班頭腩魚身結實多肉，配上蒜蓉清蒸，下面嘅粉絲同豆卜吸收晒魚嘅鮮味同蒜蓉香，撈飯食一流！雞肉煮得夠滑，味道清淡而且唔多脂肪，健康又滋味。
 

睇得又食得嘅Kitty迷天堂　Hello Kitty 中菜軒

圖：Sonata.J

有去過其他卡通人物主題餐廳嘅人一定會明白中伏嘅機率係有幾高，但係Hello Kitty 中菜軒入面嘅菜色就唔只係得個樣，味道亦非常安全。入到去，你會發現依到嘅裝修、食物同餐具都佈滿咗Hello Kitty嘅蹤影，就算你唔係Kitty迷，相信都會忍唔住瘋狂影相，重拾童真。愛心釀豆腐同Hello Kitty流沙包兩款賣相都好cute，令人唔捨得食，雖然味道唔算非常突出，但單靠食物外表相信已經加晒分。
 

老師傅功架私房菜　御膳

圖：eat_eat_everyday

同新蒸武門一樣，御膳同樣位於一座觀塘工廈內，開業已經三年有多，仍然可以喺云云競爭者入面突圍而出，絕對係唔簡單。一味看似簡單嘅士多啤梨骨，醬汁濃稠度調得恰到好處，配上啖啖肉嘅嫩腍豬肉骨，兩者竟然係出奇地夾，再加上新鮮士多啤梨，十分開胃。蒜蓉粉絲蒸大蟶子口感彈牙、鮮味十足，上面再放上炸蒜，成個配搭非常美味可口。
 

新潮型格點心　飲茶

圖：為食MoJil

今時今日傳統飲茶已經唔足以滿足到追求新鮮嘅香港人，即使係飲茶都要飲得夠「潮」夠「型」先架勢。飲茶就係一間新派廣東菜館，包保同時滿足你嘅眼球同味蕾。流心奶黃包外表趣怪得意，咬落去香濃嘅奶黃流晒出嚟，無得彈。陳皮燉梨用上桂花、杞子、陳皮煲成糖水，再加入原個雪梨，都好難唔滋潤，味道清新脫俗，唔會覺得甜膩。
 

古色古香氣派中菜　城寨風味

圖： Eating King、wendy.ng

城寨風味嘅裝修古色古香，具有中國古代傳統建築嘅感覺，單係氣派已經令人拍案叫絕，但係依到嘅菜色亦不容忽視。招牌糯米蒸頂角膏蟹以蟹蓋蟹身鋪滿蒸籠，糯米飯放喺底部蒸，將大部分蟹膏蟹汁嘅精華吸收，食完真係令人有身處天堂嘅感覺。而且蟹肉飽滿鮮甜，整個菜色嘅好食到令人難以忘懷。
 

 
睇完上面六間入圍嘅廣東菜館之後，唔好唔記得廣東菜館組別仲有樂天皇朝、唐宮小聚、名館依三間入圍嘅餐廳啊。各位揀完自己嘅心水餐廳就去以下網站投票啦！

投票網站：https://www.openrice.com/info/awards2017/index.html

文：Dap


隨時接收最新資訊
讚好OpenRice專頁！