嚟到年尾，大家係咪都有好多聚會要出席呢？不過聚會唔一定要大魚大肉嘅，今次Nicole帶大家去2間靚餐廳，一齊日、夜都食得精緻啲，過個優雅嘅聖誕節！
大家平時可能會因為忙住返工而skip早餐，放假一於對自己好啲，約埋朋友嚟個法式Breakfast date～
好多人都話All day breakfast源自英國，但係法式餐廳梗係要融入法式風情啦。呢份法式乾魚子醬焗蛋真係坊間少見，少少鹹香點綴焗蛋，味道啱啱好，而且蛋黃仲有流心效果，幾驚喜。
呢個荷蘭迷你鬆餅入面有超多cream cheese，加埋牛油果同楓糖漿味道幾夾。
鹹食方面仲有炒蘑菇、油封番茄、粟米、嫩馬鈴薯、牛仔腸、時令鮮果拼盤等，全部一碟碟擺好，儀式感出晒嚟。
另外輕盈嘅焦糖香蕉配乳酪泡沫，好啱當甜品留到最後食，refresh一下。
HUSO 
地址: 中環皇后大道中74號石板街酒店1樓2號舖
晚餐想食得精緻唔一定要揀西餐，而家好多人都會揀中菜，呢間9月開業嘅多國菜餐廳就以「中菜西造」推出季節限定晚餐。餐廳行政總廚吳夢林曾經喺連續3年攞到亞洲Top 50最佳西餐廳掌舵，亦喺多間米芝蓮星級餐廳工作過，佢表示：「呢個套餐有西餐嘅唔同層次，由頭到尾有高低起伏。」即睇有咩配搭～
餐前小吃有兩款，建議先試汕頭獅頭鵝肝新彊李子吐司，鵝肝用吳總廚自製味噌醃製，然後低溫慢煮、火炙輕燒表面，再放上新疆紅梨子果醬、洛神花汁浸天山雪蓮解膩，配搭新穎，相比平時嘅法式鵝肝輕盈。另外鹹蛋黃蝦滑吐司嘅蝦滑加入飛魚籽增加口感，配上混合鹹蛋黃、青花椒粉嘅醬料，糅合中式元素。
前菜有3款選擇，其中帶子刺身配四川魚子醬以上海菜醉花雕海鮮風味為靈感，配搭法式酸奶油、四川魚子醬、新鮮小冰菜同埋茴香片，最後淋上橄欖油增加香氣，味道複雜得嚟平衡得好好。
嘆埋時令湯品（現時為雲腿清湯）就到主菜喇，提供福建黃魚配貴州酸湯醬汁、甜醋燴豬後腿肉配新疆烤饢，以及大連雪龍3A牛腹心肉配蘿蔔3款選擇。當中牛腹心都係牛腩部位，油脂少啲但肉味較濃，配上牛骨熬製嘅牛汁更加香醇；伴菜則參考蘿蔔燜牛腩嘅概念，先以高湯燴蘿蔔，配上吳總廚親手發酵嘅酸黃蘿蔔平衡油膩感。
主食醉雞湯燴飯選用五常珍珠米，口感有啲似risotto，加入雲南野生牛肝菌同蟲草花、台灣剝皮辣椒，以醉雞湯燴好後充滿菇菌香氣，又帶點酸辣味道；上菜時灑上米通，口感更有層次。
手工甜品「山竹雪葩．桂花」亦帶上中式色彩，雪葩以山竹同馬蹄製作，配上爽脆桂花燉梨子，再以雲南雪燕同野生蜂蜜熬製「中式糖水」做底部，整體感覺好清爽。
MULAN沐瀾
地址: 尖沙咀廣東道3-27號海港城海運大廈3樓OTE303號舖
主持：Nicole
文：Cathy
相：Michael
片：YanYan
