第31屆美食博覽將於8月12號揭幕！上個攻略同大家介紹咗$1優惠同精選福袋，今次就睇下有咩特色攤檔。值得留意嘅係現時有85%受訪展商表示接受電子消費券付款，方便大家掃貨！

必買零食

彰化古早味桂圓蛋糕　香港寶珍香食品公司（3C-B14）

品牌喺1911年於台灣彰化創立，招牌桂圓蛋糕香氣濃郁，鬆軟濕潤咬到粒粒桂圓肉同核桃，仲榮獲2021年比利時ITQI 國際風味評鑑所嘅風味絕佳獎章！蔥軋餅同鴛鴦三Q餅都值得一試，前者嘅梳打餅加咗用台灣蔥，鹹鹹香香同中間嘅牛軋糖好夾；後者餡料有紅豆沙、麻糬、肉鬆，同樣鹹甜交織又好味。

本地檸樂味手工啤　宏展(香港)投資有限公司（3C-D12）

香港製作亦有推薦，呢支手工啤酒嚟自本地手工啤酒廠瘋啤，包裝用已停產嘅玻璃樽裝可樂為靈感，推出全港首創檸檬可樂味手工啤酒！限量500支咋，想試記得趁早去買。

低卡惹味蒟蒻湯河　高格行有限公司（1B-D12）

唔少人為咗Keep Fit都會食蒟蒻麵，但煮得唔好就會有怪味或者腥味。呢個品牌就推出兩款充滿東南亞風味又低卡嘅蒟蒻湯河：越式牛肉湯蒟蒻河粉、泰式船麵湯河粉。兩款嘅湯底都用咗多款天然香料提鮮，配搭爽滑彈牙嘅蒟蒻河粉，而且煮兩分鐘就食得好方便！

手製黑松露薯片　華園食品(香港)有限公司（1C-E30）

嚟自亞聯酋嘅品牌Hunter's Gourmet，佢哋嘅薯片唔單止係亞聯酋航空同杜拜七星級酒店嘅指定薯片供應商，更不含麩質、人工色素、味精或反式脂肪。一打開包裝，濃郁嘅黑松露香氣就立刻湧出。而華園亦有推出迷你豬肉脯，有蜜汁同香辣兩款口味，有辣有唔辣任君選擇。

植物肉碎+吉列素肉扒　清邁百利行環球有限公司（1D-B21）

嚟自清邁公司Let's Plant Meat嘅出品，佢哋專門研究同製作適合亞洲人口味嘅植物肉，支持環保同時又食得滋味。植物肉碎無任何調味，可以畀大家自由發揮。吉列素肉扒就加入大蒜同洋蔥增添香氣，香口得嚟比坊間嘅吉列豬扒更低脂。

西班牙健康素食　Taac Food Limited（3C-E13）

自己整素食版西班牙飯或者意大利飯都可以好方便？皆因呢個嚟自西班牙嘅品牌Trevijano專賣用脫水方法處理嘅料理，有西班牙飯（Paellas）、意大利飯（Risottos）、藜麥（Quinoas）、古斯米（Couscous）等，全部都無防腐劑、人工色素或者加鹽，而且唔使雪藏，方便健康。

月餅推介

純素/檸檬夾心餅冰皮月餅　大班麵包西餅有限公司（1C-E02）

呢間麵包店最出名嘅冰皮月餅今年有兩款重點推介，一個係最啱素食朋友嘅「找素」系列，包括全新嘅杏仁奶燕麥同流沙芝麻燕麥奶，前者加入原片燕麥後者配搭流沙芝麻，都用咗近年大熱嘅杏仁奶製作。另一推介係今年新出嘅檸檬夾心餅，味道成功還原由細食到大嘅檸檬夾心餅乾啊！

馬來西亞班蘭月餅　迪高(香港)發展有限公司（1C-E28）

班蘭蛋糕就食得多，班蘭月餅又食過未？呢間公司引入馬來西亞月滿西樓嘅班蘭蛋黃月餅，用咗味道清香嘅班蘭，配搭淡雅蓮蓉、鹹蛋黃、瓜子仁，以低糖配方製作而成。口感豐富，又有東南亞特色。

優雅朱古力月餅禮盒　正朗星實業有限公司（3C-A08）

MarieBelle係嚟自美國紐約嘅朱古力品牌，今年中秋喺香港就買到佢哋嘅月夜・流心奶黃月餅手提禮盒，禮盒設計優雅，上面仲有品牌絲巾！打開有六個盒，分別裝住手工朱古力海鹽月餅、手工流心奶黃月餅同特級茶葉。月餅都係用日本高級麵粉製作，送禮自用都夠得體。

貓山王月餅+D24榴槤套裝　一方食品亞洲有限公司（1C-E21）

今年亦有榴槤月餅畀各位榴槤迷挑選，呢間更推出美食博覽獨家價，一盒金裝貓山王榴槤冰皮月餅加1kg裝嘅D24急凍榴槤蓉，再送冰袋都係$380！

LINE FRIENDS月餅福袋　奇華餅家有限公司（1D-D02）

自問係LINE FRIENDS嘅粉絲嘅話，就可以留意呢間連鎖餅店同LINE FRIENDS合作推出會場限定嘅奶皇月餅福袋。分別有四個裝同單個裝，分別每日限量100套！四個裝隨附環保袋同防UV雨傘，而單個裝亦有環保袋同冰感毛巾唷。

第31屆美食博覽
日期：2021年8月12至16日
地址：香港島灣仔博覽道1號香港會議展覽中心
購票指南及其他詳情：https://bit.ly/3C64z30
博覽衞生措施：https://bit.ly/3BBRP49

文、相：Cathy.H