又到聖誕～又到聖誕～聖誕月又嚟，各式各樣嘅聖誕市集已經陸續開鑼，唔知去邊個好？開飯仔同你遂個睇，睇下邊個啱自己心水，約埋朋友一齊去啦！

太古白色聖誕市集

想提前見到聖誕老人？去白色聖誕市集就啱啦！今年會喺灣仔星街小區同太古坊糖廠街兩個地方舉行，兩個地方都會化身成火車站，另外有泰迪熊聖誕巡遊，仲有聖誕老人照相車卡同巨型聖誕老人汽球比大家打卡影相。市集仲會同唔同酒店、餐廳同埋糖廠街部份餐飲租戶合作推出美食攤位，如韓式五花肉包、墨西哥豆蓉火雞卷餅同特色三文治。仲有一款由嬴得廚藝比賽冠軍嘅太古城居民親自製作嘅酥炸煙肉薯丸加金巴利汁，一於去打卡兼掃美食啦！不過灣仔星街小區已經完咗，想去就要把握今個星期去太古坊糖廠街果嗰啦！

日期：

11月29日：中午12時 – 晚上6時 

11月30日：中午12時 – 晚上8時

12月1日：下午1時 – 晚上7時

地點：太古坊糖廠街

赤柱廣場芬蘭聖誕市集

芬蘭聖誕市集一向都好受歡迎，今年一樣有成過百個攤擋比大家又食又玩，打卡位就有巨型北歐聖誕靈羊同7米高嘅神秘蘑菇形精靈之家。去市集當然要掃街啦，美食方面有唔少芬蘭美食，如芬蘭麵包蔬菜燉肉，芬蘭燴鹿肉芝士薯條等，仲有烤德國肉腸、脆皮燒豬肉肘同蜜糖酒煮梨。酒就有芬蘭伏特加Finlandia飲！最特別嘅係仲有狗狗專屬聖誕市集，帶埋毛孩去都無問題！

日期：2018年12月8 - 9日及15 - 16日 (一連兩個星期六及星期日) 

開放時間：下午12時至8時 

地點：領展赤柱廣場天幕廣場及美利樓地下

德福廣場德國主題市集

想方便啲嘅九龍灣商場都有市集行。市集以德國做主題，場內有過百隻、超過20款造型嘅大小泰迪熊比大家影相，仲有德國脆爆咸豬手、德國腸同全港首賣嘅黑啤蛋糕！詳情去睇：https://s.openrice.com/Qrbc0PHG000

挪亞方舟「玩轉聖誕老人村」

一家大細去嘅話可以去挪亞方舟呢個「玩轉聖誕老人村」，小朋友可以化身成聖誕老人，挑戰「螢光聖誕大歷險」，仲有「童夢聖誕市集」同「聖誕薄餅工房」比佢地學下親手包辦製作糖果、爆谷、冬甩、窩夫、簿餅同招待客人等大小事務，最後仲可以將自己炮製嘅甜品拎返屋企添！

日期：2018年12月8日至2019年1月1日(逢星期六、日及公眾假期)

時間：上午10時 ‑ 下午6時 

地點：香港新界馬灣珀欣路33號

新都會廣場「Christmas Rosemance」

女仔們一定唔可以錯過葵芳呢個商場嘅市集，商場以玫瑰做主題，露天廣場種咗滿滿唔同顏色嘅玫瑰，仲有水晶玫瑰聖誕樹喺中間，每逢星期日三點同五點會有吹雪效果，打卡真係最啱！夜晚仲會有用6萬粒LED燈組成嘅玫瑰燈海，夠哂浪漫！另外商場設有期間限定的歐式Rosy Pop-up Café，有限定嘅玫瑰系列甜品食，如玫瑰岩鹽千層餅、玫瑰草莓滿滿芝士奶蓋同特調果汁維納斯之心，仲同著名甜點品牌合作推出「玫瑰下午茶盛宴」，甜點控千其咪錯過！

日期：2018年11月10日至2019年1月1日

地點：葵芳新都會廣場

「Christmas Rosemance玫瑰花之園」

開放時間：上午10時至晚上11時

玫瑰燈光匯演

開放時間：每晚6時正、7時正、8時正、9時正及10時正

太古坊糖廠街市集

糖廠街呢個市集就同Honestly Green 合辦，市集將環保概念融入飲食，鼓勵市民自備餐具品嚐各個㰙位嘅特式美食，就可以享有唔同折扣優惠，就算唔記得帶都可以借用！市集仲支持本地有機農業，同接近二十個農場合作，首次引入本地有機雞肉、豬肉同新鮮時令蔬菜。今次有24間美食食店參與，如果想過一個Green christmas嚟呢度就啱啦！

日期：2018年11月4日至2019年2月17日（逢周日舉行） （2018年12月2、23、30及2019年2月3日除外）

時間：上午11時至下午5時

地點：鰂魚涌太古坊糖廠街

文：Yanica