喺春天呢個充滿生機嘅季節，當然要接觸下大自然，同陽光玩遊戲啦～今次帶大家嚟到西貢一日遊，享受由兩間社企為大家帶嚟動靜皆宜嘅體驗，有得食又有得玩，啱晒一家大細，或者想約埋幾個朋友一齊chill下嘅你。

聰鳴茶座 親親大自然嘆美食

想遠離繁囂，輕輕鬆鬆去郊遊兼野餐？咁社企聰鳴茶座就啱晒你喇！聰鳴茶座位於西貢蕉坑獅子會自然教育中心，市區有多條巴士、小巴路線多條巴士、小巴路線途經呢度，交通方便；而自然教育中心內設有五個展覽館同多個戶外特色展區，提供各類自然教育嘅資訊，環境好relax。

茶座設有室內外座位

聰鳴茶座以支援聽障人士為目標，提供多元嘅工作機會，店內一半員工有唔同程度嘅聽障，但茶座會按佢哋嘅興趣同能力，安排樓面、水吧同廚房等工作。茶座亦會為聽障員工提供在職培訓，鼓勵佢哋融入社會，同時讓大眾了解聽障人士嘅能力。最近茶座保送一位聽障員工考取國際咖啡師證書，由於聽障人士所用嘅句子結構同一般文書唔同，所以健聽同事幫佢解讀同溫習以作支持，實踐社企和諧共融嘅精神。

露天座位面向自然教育中心嘅田園，空氣清新

聰鳴茶座供應嘅食物大份足料，以西式口味為主。好似美式牛肉芝士漢堡採用紐西蘭西冷牛肉，拌入洋蔥碎同多種香料，製成厚身嘅漢堡扒。另外佢哋亦配合注重健康嘅潮流，所有薄餅餅底都係少鹽少油；其中瑪格麗特薄餅用上車打芝士、Mozzarella芝士同新鮮番茄，鹹度適中幾開胃。鍾意多菜嘅朋友，可以試試日式烤雞沙律，包括青瓜、車厘茄、沙律菜等，配埋嫩滑嘅烤雞肉同芝麻醬，味道清新。

美式牛肉芝士漢堡配炸薯條（$108）

12”瑪格麗特薄餅（$148）、日式烤雞沙律（$78）

Americano、Latte、Mocha等咖啡飲品（$38-42）

茶座仲備有野餐墊以及英式野餐籃，供借用或租用，咁大家就可以坐喺茶座外面嘅草地野餐，打卡影靚相。

外賣消費滿$500，即可免費借用野餐工具；如未達指定消費額，可付$50租借 

今個4月尾開始，聰鳴茶座會提供「無聲點餐」體驗，客人可以戴上店內提供嘅耳罩，按手語圖示嘗試點餐，感受聽障人士日常生活面對嘅情況。另外茶座亦會接辦15-20人起嘅團體活動，如果想約幾個家庭一齊嚟玩，不妨先向茶座查詢。

聰鳴茶座推出「無聲點餐」體驗

茶座運作屬自負盈虧，除咗喺度用餐，亦可以買散裝花茶/咖啡包、預訂手工曲奇支持佢哋。

用餐時可以留意店內嘅裝飾品，全部由聽障人士製作㗎

聰鳴茶座
地址：西貢蕉坑獅子會自然教育中心
電話：27910834
營業時間：星期一至日：08:30-16:30（逢星期二休息）

西貢獨木舟訓練中心暨水上活動園地 獨木舟體驗旅程 

西貢獨木舟訓練中心，原為政府資助嘅綜合青少年服務單位「西貢區社區中心」於七十年代開始推行水上活動訓練，其獨木舟訓練更曾培育青少年成為香港獨木舟代表健兒。現時中心邀請昔日健兒、經驗豐富嘅前輩加入，以社企形式營運，推廣獨木舟運動，同時結合綠色生態旅遊概念，帶大家認識西貢海岸自然環境。佢哋會舉辦唔同嘅獨木舟體驗旅程，適合一家大細唔同年齡人士參加。

中心提供適切水上運動培訓計劃

此外，中心會免費或以優惠價提供水上運動訓練畀低收入家庭兒童、失學或有就業困難嘅青/中年人士；亦會同學校合作，提供適切嘅水上運動培訓畀有特殊學習需要嘅兒童/青少年，讓佢哋發展個人潛能、建立自信同學習團隊精神。 

小朋友可從活動中學習水上安全意識

活動過程可加強青少年嘅獨立能力

獨木舟體驗旅程推介
對象：8歲或以上，適合初學人仕、親子活動，歡迎公眾人士報名或團體包團（參加者穿救生衣/助浮衣時，可輔助游泳約50米）
指導：每1位教練/助理教練全程指導8位參加者 

1. 獨木舟橋咀洲體驗旅程
日期：逢星期六/日/公眾假期 
地點：西貢海岸（橋咀洲）
行程：4小時
路線旅程：沙下>白沙洲>橋咀洲>沙下
路線介紹：橋咀洲係香港聯合國教科文組織世界地質公園景點之一，擁有獨特嘅自然風光同地質遺跡，多種奇形怪石之中，菠蘿包石深受遊客喜愛；此路段與連島沙洲都係特色景點。另外中途點白沙洲水清沙幼，景色怡人，可在沙灘上小休。
路線特色：生態地質
費用：新張優惠價$300/位 (適用於2023年5月舉辦的相關體驗旅程） 

2. 獨木舟鹽田梓體驗旅程
日期：逢星期六/日/公眾假期 
地點：西貢海岸（鹽田梓旅程）
行程：4小時
路線旅程：沙下>白沙洲>鹽田梓>沙下
路線介紹：鹽田梓係具有300多年歷史嘅村落，其鹽田、古教堂聯合被列為國教科文組織非物質文化傳統，小島周邊嘅紅樹林生態亦值得遊覽。而中途點白沙洲水清沙幼，景色怡人，可在沙灘上小休。   
路線特色：生態及歷史文化
費用：新張優惠價$300/位（適用於2023年5月舉辦的相關體驗旅程） 

沿途會介紹海岸生態環境

西貢獨木舟訓練中心暨水上活動園地
地址：西貢沙下路近迴旋處，WM Hotel旁
查詢：（電話）2798 9283（許先生）/ 2792 1762（周先生），（WhatsApp）9343 8647
Facebook：（按此）

為咗令大家更容易辨認同支持社企，民政事務總署推出咗「社企Tree嘜標誌」計劃。只要大家見到貼有「友建樹」嘅「Tree嘜標誌」店舖，就知道佢哋係社會企業一分子，可以多多支持社企。快啲去www.sehk.gov.hk了解更多計劃詳情同參與計劃嘅社企，大家可以同時追蹤「社企友建樹」Facebook同Instagram，緊貼最新嘅社企資訊啦。社企有建樹，你我都支持 !

「社企Tree嘜標誌」計劃：凡貼有呢個「Tree嘜標誌」嘅鋪頭，都係社企一分子