港式麵店同Cafe好似風馬牛不相及，但旺角呢間新店就正正主打港式、Fusion湯麵同單品咖啡！而且對原材料非常講究，例如五款湯底分別用雞殼加藥材、或者幾十斤牛骨每日新鮮熬製，啖啖鮮甜無味精。咖啡採用單一莊園、高海拔無公害嘅咖啡豆。仲有素食選擇啊！
 

負責人Ernest表示希望支持香港製造，選用本地烘焙咖啡，枱面亦放上本地悅和醬園嘅辣椒油同芝麻油供客人添加

麵賜園位於旺角通菜街，睇到店內霓虹燈就會知道係同區老字號越興園越南菜館嘅姐妹店，就好似餐廳英文名「Noodles Dimension」咁，希望將湯麵帶到新次元！呢度就係一個畀大家享受湯麵，食得開心嘅空間。湯底有五款選擇，從鮮甜嘅「大補雞湯底」、香濃嘅「濃豬骨湯底」到素食嘅「素昆布湯底」都保證新鮮足料、營養豐富。
 

牛隊長湯麵（$88）

招牌湯麵之一，其「鮮牛骨湯底」用嘅牛骨以數十斤計、熬六個鐘以上，而且加入腩肉同藥材炆燉，令湯頭充滿牛香、同時鮮味突出，濃郁而唔油膩。
 

配料當然亦有考究，一碗有齊五香崩沙腩同澳洲和牛封門柳，前者係牛肚皮嘅腩位，帶膠質而且肥瘦適中、口感鬆化；後者係牛橫膈膜嘅膜肌肉，每隻牛只得一條，脂肪唔多但牛味最為濃郁，口感嫩滑。加上清甜無渣嘅蘿蔔，無得輸。湯麵仲會配埋伴菜，例如拍攝呢日有中華沙律同糖心蛋，約二至三星期會轉一次款式。
 

鐵三角蠔蝦蟹海鮮湯麵（$118）

鍾意海鮮嘅必點！首先「海鮮盛湯底」係師傅每日到魚檔揀最新鮮嘅海魚，加埋蝦頭蝦殼熬足三個鐘，既有魚嘅鮮甜又帶蝦香，就算放涼咗少少都絕對無腥味呀。
 

配料就有外脆內軟嘅炸日本生蠔、肉質爽口嘅海中蝦、啖啖鮮甜嘅松葉蟹肉、鮮嫩彈牙嘅新鮮元貝。難怪Ernest都話呢碗鐵三角蠔蝦蟹海鮮湯麵因為用靚食材而定價相對略高，但食過嘅客人都會食得出分別！
 

 

賣一碗蝕一碗湯麵（$78）

照顧一般素食者，同時希望推廣素食，呢度無論湯麵、飯定小食都有素食選擇。咁呢碗素湯麵點解會叫賣一碗蝕一碗？Ernest話原來因為不惜工本選用日本舞茸，唔單止有獨特嘅甘味同爽脆口感，仲有研究指舞茸有助抗癌，亦對糖尿病、高血壓、高血脂等有改善效果！
 

湯底就係用日本昆布、豆腐熬製，加入赤味噌調味嘅「素昆布湯底」，濃郁鮮甜。配料就以菇菌為主，有上面介紹過嘅日本舞茸，配搭竹笙、雞髀菇同草菇。竹笙非常爽脆，吸滿湯底精華；雞髀菇亦夠厚身，口感彈牙。順帶一提拉麵亦相當掛湯，另外亦可以轉為扁拉麵或者日本稻庭烏冬（+$8），仲有得揀軟硬度呀。
 

（前）黃金炸生蠔（$38/3件），（後）牛油果蝦多士（$48/2件）

炸日本生蠔上面嘅黃金其實係鹹蛋黃蓉，一啖食到惹味鹹蛋黃嘅沙沙口感、麵衣薄身香脆，同日本生蠔嘅鮮甜Creamy！
 

牛油果蝦多士（$48/2件）

懷舊蝦多士本身已經唔常見，Ernest更特別改為牛油果蝦多士，加入健康元素之餘，軟滑嘅牛油果蓉又會襯托出蝦肉嘅爽彈，增加口感層次。蝦肉亦調味得宜，唔會完全蓋過牛油果味道，加上香脆嘅麵包，幾過癮。
 

搖呀搖烘焙（$50）

Ernest留意到坊間唔少麵店嘅飲品選擇嚟嚟去去唔係茶就係汽水，本身佢又鍾意食麵同飲咖啡，就將呢兩個元素一齊放喺新店裡面。咖啡豆由本地咖啡師主理，挑選嚟自尼加拉瓜、海拔1450m高嘅卡杜拉咖啡，然後喺香港以低溫紅外線烘焙，帶出咖啡烘焙香、同微微似葡萄嘅酸味。

呢杯係咖啡加上厚奶泡，因為倒嘅時候咖啡會喺杯底搖下搖下，就將個名改為「搖呀搖烘焙」。厚奶泡上面仲會撒上砂糖同少少岩鹽再燒成焦糖，甜鹹交織更可以帶出咖啡香！加上奶泡口感厚滑，後韻帶黑朱古力甘香。
 

麵賜園 
地址：旺角通菜街36號地舖

文：Cathy.H
相、片：Wilfred Chui