香港人生活節奏忙碌，少不免會去茶餐廳食個快飯。但咪以為去茶餐廳就只得重口味菜式，其實今時今日選擇比以前多，爲配合大家注重健康嘅潮流，唔少茶餐廳更提供少鹽少糖菜餚。今次介紹呢3間參加咗少鹽少糖食店計劃嘅港式茶餐廳品牌，分店遍佈港九新界，大家可以更容易食到具本地特色嘅少鹽少糖健康菜式。
番茄湯鮮牛肉通粉
講到茶餐廳嘅麵食，番茄湯鮮牛肉通粉一定走唔甩。為咗令番茄湯味道更天然鮮甜，師傅特別揀選體型較細小、顏色較紅同成熟嘅番茄，因為味道同水分會更豐厚；煮嘅時候先將番茄略炒，逼出香氣之餘，質感亦更濃稠，比以往用少1/3糖都仍然夠晒香甜。而嫩滑嘅鮮牛肉片加埋洋蔥、薯仔一齊食，美味又飽肚。
鮮蝦揚州炒飯
炒飯多配料又有鑊氣，係唔少人鍾意嘅菜式。呢味鮮蝦揚州炒飯用上冰鮮大蝦之餘，更增加蝦嘅分量以突出鮮味，加上少許火腿同叉燒粒本身味道已很足夠，咁只需要用以往1/3分量嘅鹽就足夠提味；而雞蛋、菜芯同蔥花則為炒飯添上天然嘅香氣同清甜味道。
海鹽欖油菜芯
用上湯浸菜比炒菜可以落少啲調味料，又可以令鮮味滲入蔬菜之中。師傅更加入少量海鹽同橄欖油浸菜芯，再配上爆香咗嘅蒜頭，為浸菜加添一點鑊氣。
鮮茄濃湯稻庭麵
番茄湯麵除咗配牛肉，其實做成素菜都同樣吸引。將鮮番茄去皮煮成濃湯，令稻庭麵易於掛滿湯汁，再加入金菇同秀珍菇做餸料，提升天然蔬菜嘅甜味，無需落糖，而且減至用1/8茶匙鹽提鮮就得，好啱輕食同素食朋友。
元貝肉鬆蒸水蛋
茶餐廳都有家常菜，好似元貝肉鬆蒸水蛋，用肉碎同元貝令鮮味層次更豐富，而元貝本身略帶有鹹味，即使減至用1/8茶匙鹽，仍然夠晒入味。蒸好灑上蔥花，令蒸蛋更加清香。
西蘭花油泡花枝片
鍾意食海鮮又想有蔬菜平衡下嘅話，西蘭花油泡花枝片係唔錯嘅選擇。師傅先爆香薑片同蒜蓉，再加入韭黃同草菇片逼出香味，以天然蔬菜嘅香甜代替添加糖，而且只需減至用1/8茶匙鹽提味就夠；然後將輕炒過嘅花枝片回鑊，大火兜均，埋茨後鋪喺灼熟嘅西蘭花面，充滿鑊氣又不失鮮味。
番茄蛋鮮牛肉湯泡飯
番茄炒蛋係好普遍嘅家常菜，但加啲材料就可以變成湯泡飯。以鮮味濃郁嘅魚湯做底，先用薑片辟腥，再加入番茄、蛋漿同牛肉片，令泡飯吸收番茄嘅甜味、蛋香同肉香，味道層次更豐富，比平時落少一半鹽同糖仍然鮮香味濃。
冰鎮芥蘭
炒芥蘭可以令口感爽脆，但其實用滾水快速將芥蘭灼熟再冰鎮，可以保持爽口口感之餘，又食到蔬菜本身嘅清甜味道，而且零油同鹽，更加健康。如果想多啲味道層次，亦可以蘸少量芥末醬油。
