呢間餐廳，可以話係美食與美術結合，每道菜式都擺到靚一靚，成件藝術品咁先上枱，特別係呢碟甜品，Cheese cakeCrunch（芝士脆）。就咁睇個樣，點睇都睇唔出佢係一件芝士蛋糕，因為佢真係好似一幅畫咁，完完全全突破咗芝士蛋糕固有嘅傳統框框，唔係一個個、唔係一件件、唔係一樽樽，而係一！堆！堆！講真，我都係第一次見。芝士蛋糕同餅底係徹底分離嘅，師傅將啲芝士蛋糕當成顏料咁，喺塊黑板上任意揮毫，再灑上餅底碎，然後喺上枱嗰陣，再由侍應淋上加入液態氮嘅朱古力乾冰，製造煙霧效果，係有新鮮感嘅。而食落cheese味就唔算太重但就好軟滑，所以都唔會話太膩，囡囡們唔使驚呀。啲「朱古力」幾dark同幾重bailey嘅香味，要趁早食喎，會融㗎。
小食方面其實都唔小，雞翼釀餃子伴黃莓蜜餞汁、黑松露薯波伴洋蔥沙律醬兩樣其實都係幾飽肚。雞翼拆骨再釀入韮菜豬肉餡，配埋醬汁，甜甜酸酸。後者亦都有香濃嘅黑松露味，薯蓉亦夠幼滑，令到呢碟六粒嘅炸波波，畀人雖然感覺有啲熱氣，但依然無懼爆瘡咁忍唔住食完一粒又一粒。
Mocktail方面，首推Raspberry Tea Party，說穿了即係Earl grey茶加紅桑莓加菠蘿再加新鮮玫瑰花瓣喺面，成杯酒紅色咁其實幾靚，請囡囡飲最啱~ 味道酸酸地，都幾fresh嘅，但如果你係為earl grey而嗌就可能會有少少失望喇，茶味唔夠出﹐被鮮果蓋過咗。另一杯都好啱囡囡飲嘅係You Complete Me，淨係個名都夠晒型，係電影Jerry Maguire嘅經典對白嚟，老闆話係想每個客人食完嘢都有種被complete嘅感覺喎。粉紅色，仲要加咗件水玄信餅，淨係個look都已經夠晒呃like，不過呢杯係有酒精成份嘅cocktail嚟留意返，留意多樣嘢，cocktail暫時係未有得飲住嘅，要等到7月頭正式開業先有，等下啦。
詳情：
Jerry Maguire
地址：銅鑼灣蘭芳道23號地舖
文：Kar
隨時接收最新資訊
讚好OpenRice專頁！