冇呀，我想講銅鑼灣登龍街又有新舖喇，又有新嘅龍蝦包食，不過今次嘅龍蝦包同大家印象中用兩塊包夾住成隻龍蝦嗰啲個樣有啲唔同，中式少少嘅。



呢個龍蝦包，用金色三腳架裝住，一放上枱已經好有霸氣。中式麵包盛住龍蝦箝，再夾埋沙律菜同蟹子沙律醬，凍食嘅，fusion得嚟又幾夾。

心水清嘅朋友可能都會疑惑呢間餐廳唔係打邊爐嘅咩，點解會有龍蝦包食？嗯，我想講，唔止有龍蝦包呀，就連企鵝包、魷魚卷、天鵝酥、酒鍋獸通通都有得食……晏晝嗰陣。



企鵝包堅係得意，就咁睇都由是可，一夾起，見埋兩隻企鵝腳，得意到一個點，忍唔住要幫佢拍多幾張沙龍都好正常。中間係白蓮蓉嚟嘅，所以都幾甜下。



至於魷魚卷「魷來游去」嘅造型同佢個名都真係幾似，餡係蘿蔔絲、木耳絲等等，好香滑。而天鵝酥呢就係芋頭酥。



呢個emoji是咪好熟口面？有啲似你身邊個buddy？佢叫寸嘴流沙包呀，戴住副超不特止，重點係微微戚起個咀咁，表情我畀十分！內餡同樣都係十分，堅係流沙呀，仲要係大量流嗰隻，食嗰陣小心啲。



而呢隻粉紅色嘅東東叫酒鍋獸，包住嘅係芝士、泡菜、鮮蝦同豬肉，微辣。如果lunch想要啲勁嘅刺激，可以要個麻辣嘅邊爐水煮桂花魚，食完包你醒神晒（飯氣攻心另計）。



仲有個黑麻麻嘅包你估佢唔到，竹炭包住嘅原來係叉燒包嚟。



另外其他點心造型同味道都充滿玩味，就好似小籠包咁，都有好多種味：藥膳、黑松露、沙嗲、墨汁湯、麻辣同灌湯。

呢啲咁cute cute嘅點心，淨係得銅鑼灣呢間分店，仲要午巿先有㗎咋留意返，當然，邊爐控可以繼續上去打邊爐嘅，日頭夜晚都有得打。

酒鍋
地址：銅鑼灣登龍街18號V Point 27樓


文、相：Kar



其他新店介紹：
終於多間冬甩專門店！J.CO進駐灣仔開分店
全港首間churros專門店 變身日系churros衝擊味覺
旺中新店2.0 14款12吋勁長韓國窩夫、靚靚呃like手工特飲





隨時接收最新資訊
讚好OpenRice專頁！