香港人固然識食，但識食之餘都要「惜食」。食得是福，食得晒更幸福呀！為咗大家食得幸福，香港唔少餐廳已做多一步，提供少飯少餸選擇，還會將過剩食材捐畀食物回收及分享機構 。就算你平時無時間捐贈食物，仲有好多方法「食得環保」㗎，一齊睇吓點樣少飯、走塑救地球！

旺記冰室
一句「少飯唔該！」　減少廚餘

為咗減少不必要嘅廚餘，有餐廳會喺店內貼上告示，鼓勵食客嗌少飯，「旺記冰室」就係其中一間喇。雖然冰室係快食文化，但店主喺「惜食」方面就唔貪快喇，除咗鼓勵細食客人嗌少飯，亦會主動為自備飯盒嘅客人減收外賣費，希望多方面減廢。

為環保寧願唔賺盡　每日限量預貨　

除咗鼓勵大家少飯，「旺記冰室」亦唔會預購過量食材，簡單嚟講就係每日限量入貨，賣晒就提早關門，減少食材腐壞同廚餘量，亦減少浪費種植資源同農夫嘅心機𠻹。

店家自製可愛嘅少飯提示，鼓勵細食客人主動要求少飯，避免食剩飯產生廚餘。大家一齊珍惜食物，自然減少浪費啦！

咪做大嘥鬼　湯渣都食埋

其實湯渣都係廚餘嘅主要來源之一，店主就特別將鮮番茄去皮熬製番茄湯，令番茄肉融入湯中。食通粉時，自自然然連埋茄肉食，減少食剩湯渣，我哋平時飲湯都記著要食埋湯渣喔！

特濃番茄湯 午餐肉粒通粉

全店只用日本蛋，唔駛額外落牛奶已經好嫩滑，亦間接減少咗採購同貯存過程產生嘅廚餘。

常餐嘅鮮忌廉雞湯都落足心機整，真係用雞殼熬㗎，熬出嚟嘅雞味更香更實在。其實我哋日常煮食，都可以花啲心思用盡食材，例如將魚骨熬湯，又或者將剩低嘅生果做果醬等，用盡所有食材，為惜食減廢出一分力。

店家善用食材，以雞殼熬製鮮忌廉雞湯。只要平時花啲心思，我哋都可以用盡食材㗎！

愛家素食
捐贈過剩食材　食素有助環保

參與惜食香港嘅餐廳之一「愛家素食」主張純素同環保，開舖以嚟堅持無蛋無奶，連食材生產商嘅生產線都要一樣。純素係食得環保方法之一，全因飼養家畜會排放溫室氣體，影響環境。如果每人行多步，少食肉、多食素就可以逐步減低肉類需求，以協助減低碳排放，紓緩全球暖化。

捐贈即將到期食物　

「愛家素食」有堂食外，亦有售純素食品、食材。若存貨即將到期會捐畀食物回收機構，減少浪費。店家亦會進行廚餘回收、垃圾分類，減少運往堆填區嘅都市固體廢物。如果我哋屋企有即將到期嘅食物，都可以捐畀相關機構，減少浪費之餘，亦幫到有需要嘅人。

「愛家素食」會捐出即將過期嘅食品，減少浪費。

「粒粒皆辛苦」　　暖心分享

店家唔少菜式都煮得香口，食客亦可按自己需要揀少飯、少麵，每人都食晒就唔會有咁多廚餘啦。如果當日無可避免有賣剩飯，亦會主動送畀有需要嘅人，呢個舉動真係好暖心！

（左）鴛鴦扒飯、（右）叉燒拼日式萬如飯

（左）叻沙百頁粉麵、（右）多款炸物小食

一齊走塑！唔用膠飲管．膠餐具．膠袋

膠飲管或一次性塑料餐具都需要好長時間分解，因此「愛家素食」唔會主動提供膠飲管，並將外賣膠袋轉為紙袋，避免製造塑膠垃圾。建議大家平時亦可以自備飲管、環保袋，甚至自攜環保飯盒、餐具，買外賣時就可以主動講「我有環保飯盒同餐具」啦。

打造環保槪念之家！天然品代替化學物

「愛家素食」喺清潔用品都加入環保槪念，以天然品代替化學物，例如用白醋洗食材同水果；用茶籽粉拖地和選用環保洗潔精等。我哋喺屋企都可以用天然產品、減少製造垃圾同污染環境。

改變習慣　一齊愛護環境

其實環保可以融入生活每個細節，由源頭減廢做起、減少製造廚餘、「食得晒先至好嗌」、「食唔晒都唔好嘥」！

旺記冰室
地址: 尖沙咀亞士厘道29-39號九龍中心大廈地舖
電話: 26172616

愛家素食
地址: 九龍灣牛頭角道77號淘大商場二期地下G242-245號舖
電話: 27511321