
繼續溫馨提示,距離情人節進入倒數最後三個禮拜嘅階段,情人節限定產品亦繼續不斷推出。今次輪到Häagen-Dazs,平時有咩限定口味都係日本限定,今次終於香港都有得試!情人節女仔想收花是常識吧,配合情人節推出嘅花味系列,一款夠浪漫,另一款就暗藏心意,共同點就係入手送人都要夠快手!

首先有荔枝紅桑子玫瑰雪糕,清甜嘅台灣荔枝加微酸嘅紅桑子果醬酸酸甜甜,加埋代表浪漫嘅土耳其玫瑰,啱哂熱戀中嘅情侶一齊食!喺街道見到女神同其他男仔一齊食住呢杯粉紅色雪糕嘅話亦唔好太傷心,因為仲有一款雪糕...

另一款係杏桃薰衣草雪糕,薰衣草嘅花語係「等待愛情」同「請回答我」,如果收到呢杯杏桃薰衣草雪糕嘅,是咪即係代表暗示有人等緊自己...?無收到嘅自己買都得,雪糕用咗地中海薰衣草,而薰衣草香味亦有助減輕壓力,簡單啲講,早啲瞓啦唔好咁多FF啦。


日本其實都有花味系列嘅雪糕,分別係紅桑子玫瑰同藍莓薰衣草。雖然都係玫瑰同薰衣草,開飯仔就覺得香港嘅口味好似吸引啲。今次終於唔洗再葡萄日本人啦(跳起Yeah)!
Häagen-Dazs™情人節花味系列(迷你杯及家庭裝)
2016年2月1日於各Häagen-Dazs™專門店開始發售;
2月中7-11便利店優先發售迷你杯;
3月上旬起於各大超市及百貨公司零售點有售
圖:ハーゲンダッツ Häagen-Dazs
隨時接收最新資訊
讚好OpenRice專頁!
