卡通主題餐廳愈開愈多，排隊終於都排到蛋黃哥喇！呢間喺台北大安區嘅主題餐廳，由年中開始講話會開，粉絲就等足幾個月，等到喇！今個月頭開始試業，而開飯仔最近都去咗試喇！

先提一提大家，手機/相機記得要差足電，同埋確保有足夠嘅儲存空間，因為你去到堅係會乜都影一餐。呀，仲有，小心儀態，唔好尖叫。門口位同餐廳入面都有好多隻蛋黃哥，牆紙全部都係就預咗啦，連燈同櫈都係先不得了，仲有枱面嘅擺設呀、cushion呀、廁所呀，總之每個角落每樣嘢都係蛋黃哥！

影完景就到影嘢食，餐廳主廚曾經喺世界各地都做過主廚，每碟菜式嘅造型都好盞鬼，開飯仔最鍾意就係幾隻蛋蛋蛋黃哥集晒喺個鳥巢度呢一款嘢食，好得意呀！係好重雞蛋味嘅雞蛋糕嚟，比較實少少嗰隻口感，好食呀！但食晒3大3細就有啲飽，而鳥巢就係炸牛蒡絲，成碟都食得㗎。

蛋黃哥搖滾炸蛋又係另一樣cute cute嘢，外層炸到脆卜卜，包住火腿同蛋。成嚿雲嗰隻蛋黃哥仲犀利，hea hea der，底下蓋住嘅原來係雲朵山賊雞pizza。另外仲有馬卡龍米漢堡、奶油鮭魚飯、彩虹蔬果沙律等等，全部都唔捨得食第一啖！

綜合水果聖代，應該係萬眾期待嘅甜品，我包保你一定會玩好耐先食！事關佢上面個蛋黃哥布甸實在太太太犯規喇！輕輕搖一搖隻杯佢都會係咁震㗎，好有彈性，其他配料包括日式可麗餅、水蜜桃同蘋果等等，都幾多。

仲有仲有，呢樽彩色水果冰沙，飲完仲可以帶埋個樽返屋企添呀！好開心唷！

餐廳整體嘅食物估唔到都幾有驚喜，水準比同類嘅卡通主題餐廳高，希望佢哋可以一路keep住啦。認真，就算我唔係蛋黃哥粉，去完一轉都覺得被治癒了！

如果你真係去開台灣嘅，仲可以去埋小丸子主題餐廳或者宇宙人餐廳喎，都係早排新開㗎！

餐廳資料：
蛋黃哥五星主廚餐廳
地址：大安區敦化南路一段236巷12號

文：Kar

隨時接收最新資訊
讚好OpenRice專頁！