racmist的个人专页

話說之前同同事講過呢間店啲奶昔好好飲，咁啱同事話今日個lunch唔夠飽，於是我就帶她去試吓，點知自己嘴饞，忍唔住又買埋一份。我哋買左牛油果乳酪奶昔，淨睇樣已經好吸引，飲落口超冰凍，質地好幼滑，牛油果味非常清新，正。不過食完飯飲好似有啲太飽🙈，下次要留肚飲我至愛嘅芒果乳酪奶昔。…查看更多

我家主子話想食泰國野，俾佢發現左Popcorn原來開咗間泰國菜，難得放假，全家出動，食個靚lunch。我哋叫左個二人餐，選了炸蝦餅、泰式燒牛柳和蟹肉炒飯，跟餐點了芒果沙冰和椰子沙冰（加$20@）。另外再加點了泰式煎蠔餅和牛肉船麵。炸蝦餅好食，外層酥脆，內裡鮮美彈牙。蟹肉炒飯有驚喜，蟹肉鮮甜，米飯粒粒分明，非常美味。牛肉船麵也不錯，湯頭濃郁，牛肉鮮美。 芒果沙冰和椰子沙冰都可以。但好期待嘅泰式燒牛柳和泰式煎蠔餅就有點失色。燒牛肉比較鹹，配白飯食可能會好啲。煎蠔餅粉多蠔少，有點失望。…查看更多

呢間餐廳成日响門口經過，但一次都未食過，因為人太懶，唔係好鍾意去啲要自己serve自己嘅餐廳食，難得同事有興趣試，就試一試吧。門口有點餐機，可以自己點餐又或者去counter搵姐姐落單。我們點了鰻魚丼和牛肉溏心蛋烏冬，跟餐要了沙律。鰻魚丼幾好，鰻魚厚實，口感同味道都唔錯，份量剛好。不過同事對牛肉溏心蛋烏冬卻有些失望。雖然牛肉的質感不錯，溏心蛋也OK，但整體的份量似乎不夠，吃不飽。沙律菜都算新鮮，但醬汁似乎加得有些多，偏鹹。見隔離枱好多人食鐵板餐，下次試下。…查看更多

我家主子來訊話要食大家樂嘅焗豬扒飯，咁放工邊搭車邊碌大家樂個app睇下有咩食啦，都冇咩特別想食，但就俾我發現到而家佢嘅QQ紅番石榴芒果四季春烏龍茶做緊試飲價，只需$9.9就買到一杯。咁抵，咁就買兩個單點焗豬扒飯加呢杯烏龍茶試一試。焗豬扒飯一貫水準，豬扒juicy，有骨嘅豬扒係好食啲嘅，另外好鍾意佢果幾舊菠蘿😋，好開胃，成盒食哂，冇得留低。杯QQ紅番石榴芒果四季春烏龍茶就麻麻哋，我覺得唔夠甜，比較淡口，冇乜野咬，得好少「QQ」。但就好大杯，$9.9係抵嘅，雖然覺得唔太好飲，但應該都會再買，當飲少甜囉。…查看更多

呢間餐廳成日都要排長龍等位，平日Lunch Time好難食得到，難得約左退休舊同事食lunch，梗係叫佢排定隊攞定位等我啦，不過由於限時70分鐘，真係要度啱時間先好入座。我們叫左兩份炭燒安格斯西冷牛扒配熱咖啡，手機落單，選項沒有「叫起」之類，所以如果杯咖啡未飲住，就要同侍應講聲杯咖啡遲啲先上。塊西冷好大塊，熟度適中，外層焦香，內有嚼勁😋，啲薯條亦好好味，仲配埋沙律菜，好滿足😊。如果唔想啲薯條腍哂，記得要「汁另上」。已經約好左舊同事下次再黎食。…查看更多

放工經過糧友見到要排隊俾錢，於是停低望下，原來逢星期五都做八折優惠，咁抵，買買買。問咗店員，原來蛋糕也有八折，放是買左兩個麵包同埋一個原味巴斯克芝士蛋糕。麵包一如既往咁好食，外酥内軟，未開飯就同屋企人一齊K.O.左。佢哋嘅巴斯克蛋糕就第一次試，好香焦糖同芝士味，嫩滑醇厚，口感綿密，可以再買。下次試埋個開心果味先。…查看更多

星期六要一早去拎護照，難得早起身又落左街，拎完梗係食埋個早餐先返歸。原本想去Table的，但排哂長龍咁，屋企人唔鍾意等，於是周圍搵，經過呢間王牌冰廳，見唔太多人等就攞咗飛，好好彩咁等左唔夠五分鐘就有位了。好少出黎食早餐，清清地叫左火腿通粉配煎雙蛋同牛油多士，飲凍檸茶。火腿通都幾好食，火腿都算多，通粉軟硬適中，個湯佢餐牌寫係金寶忌廉雞湯，唔識分，但味道唔錯。杯凍檸茶係我鍾意嘅味道，夠凍，夠甜，有檸檬味👍🏼。屋企人叫左沙嗲牛肉麵同熱奶茶，佢話兩樣都ok。食品OK，但環境就有啲迫，要搭枱，好耐未試過了。唔坐得耐，對手唔可以放低，碗通粉都未食完就差啲俾阿姐收走，好彩叫得住同埋冇插到啲手指落去。…查看更多

今日放假去咗藍田搵朋友食lunch, 食完就緊係响附近行吓先啦，行下行下見到呢間食店，個Menu都幾吸引，而且價錢相宜，仲有我最鍾意嘅酸菜魚，一於買返去做晚餐。由於樣樣都好似好好味咁，諗左成五分鐘，最終買左酸菜魚米線同埋藥膳黃酒雞飯。酸菜魚好足料，好多酸菜，唔太鹹，好味，係米線冇平時食開果啲咁滑。藥膳黃酒雞同樣足料，個湯好濃，好香黃酒味，啲雞亦唔錯，食完個人暖笠笠。呢個價錢有咁嘅質素，絕對抵食，下次去開藍田可以再試下其他。…查看更多

之前經過發現呢間餐廳除左炸雞，原來仲有set lunch，今日同事冇帶飯，所以便決定出去試下。點知去到餐廳，同事俾啲炸雞吸引住，於是就放棄左啲lunch set, 兩個人叫左一份Corn-so Amazing雞翼雞槌加兩杯drinks。呢間餐廳啲炸雞我外賣就食得多，堂食都係第一次，果然即刻食係好食啲，但就太心急，燙到了嘴。食過咁多款，我覺得Corn-so Amazing係最好食的，不過得一隻味食食下好似有啲悶，下次要叫半半好似好啲。可惜嘅係粟米得兩舊仔，有少少失望。我哋叫咗菠蘿梳打同西柚梳打，味道OK, 但最大問題係沒有冰，餐廳响商場open area, 冷氣好似唔多夠，兩杯野飲好快就同室溫冇乜分別😒。…查看更多

上次試了布甸狗金菠蘿新地，今日經過見到有Kuromi巨峰提子新地，忍不住又買了來吃。酸酸甜甜的巨峰提子雪糕，搭配提子味爆炸糖，口感獨特，非常有趣。值得一提的是，店員在我接過雪糕時，特別細心提醒「小心爆親」。起初我以為他是在開玩笑，但他解釋說爆炸糖可能會突然彈出，還真有點嚇到我，沒想到會這樣，真的很感謝他的提醒。如果不喜歡爆炸糖的話，還可以要求他們不加，非常貼心。期待下次再來的時候又有什麼其他口味！…查看更多

第一次來這間新開的燒肉店，抱著試新的心態，我們四個人選擇了LV2的美國和牛海鮮放題，不想選太貴的。首先上桌的是充滿「仙氣」的澳洲穀飼原塊牛板腱和美國和牛肩胛肉眼，打卡用，但吃起來感覺一般。不過，水果醬封門柳和煙燻壺漬封門柳（醬油味）卻非常美味，肉質鮮嫩且多汁，讓人忍不住一口接一口。胡麻豆腐的口感和味道也相當不錯。至於其他的肉類、熟食、飲品和甜品，就沒有特別的驚喜，印象不深😅。服務方面還有提升空間，上菜速度稍慢，偶爾也有漏單的情況發生。…查看更多

同朋友經過東海棠見好多人，咪走埋去湊下熱鬧囉，原來佢而家做緊多種優惠，但我哋眼中只係見到軟雪糕買一送一🤣，天氣咁熱，就緊係食雪糕啦。除咗駐場嘅牛奶味外，而家做緊金菠蘿味，難得今次嘅買一送一可以搭配唔同口味（當然係送平啲果款），朋友食返佢嘅最愛牛奶味，而我就試左有可愛布甸狗裝飾嘅金菠蘿味。朋友話佢個牛奶雪糕一如以往咁好味，好滑好重牛奶味。而個金菠蘿雪糕好香菠蘿味，酸酸甜甜咁好好食，可惜冇左啲菠蘿乾粒粒，呢下係有少少失望。…查看更多

平日行過都見到呢度有舊式西餅賣，但款式都唔係好多，唔係好吸引到我。今日行過，咦，我俾佢吸住左，點解呢，因為有我最愛嘅款式，就係有塊菠蘿响面果款。唔知係咪因為做promotion，今日款式好似特別多咁，有成十款。$20/6件，驚六件太多，掙扎左一陣，總果都係買左六件，其中四件係菠蘿😋😋😋。返到屋企即刻拎左件菠蘿蛋糕黎食，爽口嘅菠蘿加埋香甜嘅蛋糕，好好味呀，係細個嘅回憶🤭。細個時次次都要爭先食到呢款，今次我應該可以一個人食哂四件🤣。另外果兩件屋企人話都好好食。四蚊件都唔使，抵食。…查看更多

記得第一次食呢間麵包店嘅千層蛋撻係同事買回office請我食的，當時一啖咬落去，即刻變左心心眼，好好味，層皮好酥脆，啲蛋漿香甜滑溜、蛋味突出，一試難忘。今日公司搞食品展銷竟然有呢間麵包店嘅出現，見佢有呢隻千層蛋撻賣，即刻買左一打，最重要就緊係唔使排隊、唔使特登搭車出去買啦。返到上office忍唔住偷食左一隻，keep到水準，仲係咁好味。返到屋企雖然隔咗咁多個鐘，但用氣炸鍋輕輕焗返熱，就好似剛出爐咁，依然美味，屋企人個個都食到bling bling眼，讚不絕口，叫我下次再買。…查看更多

朋友話我知傷心酸辣粉而家有放題食，咁我哋一行三人就走去試一試佢。佢有麻辣烤魚、胡椒豬肚雞煲、椰子雞煲、羊蠍子煲等，而我哋就揀左酸菜烤魚。揀完湯底就可以出去攞其他野食同飲品。個酸菜烤魚條魚烤得好香，個湯都唔錯，仲有好多酸菜😋。食物款式唔算太多，但百幾蚊位都算抵食。有肥牛、腸仔、雞件、芝士魚腐、豬皮、魷魚串、響鈴、金菇…… 仲有薯粉同三款手工麵。薯粉就一定好食架喇，我嘅至愛，但估唔到啲手工麵都唔錯喎，好彈牙，配埋個酸菜魚湯👍🏼👍🏼👍🏼。飲品除左一般汽水同茶飲，仲有特別少少嘅自家品牌粒粒葡萄、粒粒菠蘿同桃汁，我就試左個桃汁，都幾好飲。不過呢，張枱同啲座位對於食火鍋放題黎講就太迫，放完個爐基本上都冇乜位放其他野😅😅。…查看更多