KYp2010的个人专页

見有好多人都讚呢間船麵地道，所以同老公特登去試一試，我地平時都好鐘意食船麵，試過好多間，亦都經常會去泰國，講真，呢間真係好一般，連最基本船麵要落嘅香料都無落，價錢都比較貴，非常失望，我地叫咗一碗安格斯牛肉金邊粉，另一碗係河粉，牛肉薄得可憐，只有兩三小片，蘿蔔有一小粒，粉麵都正常的，意外驚喜係有一條秋葵同兩粒魚蛋，但魚蛋唔太好食，有點梅嘅感覺。龍眼冰都算正常，另外一提係服務，有一位女員工非常無禮貌，總括嚟講，就算唔需要排隊，都唔會再去食！…查看更多

朋友介紹話呢間好食，上網見到評分都高，所以黎試下首先講下個板燒吉列牛，非常普通，牛肉好多筋好韌，亦一啲牛味都冇。之後個板燒黑松露吉列牛，都係好多筋好韌，最慘係一啲黑松露味都冇，跟埋餐差不多要成$200，好唔值！跟住叫左個芝士吉列豚肉，個吉列豚肉可以嘅，但個芝士醬一啲味都冇，冇芝士味亦冇鹹味。我地其中一個餐加$58蚊要左個金魚湯set，個湯同加$38蚊嗰個湯無分別，一樣味，只係多左一舊金魚造型嘅魚蛋，但條金魚食唔食都吧，實丁丁，唔好食！最後想講嘅係，入座起計食60分鐘，真係好趕，因為睇menu揀野食都睇左5分鐘，燒肉都要時間，員工可能見我哋枱面仲有嘢食，到50分鐘嘅時候已經想趕我地走，不停問我哋啲嘢食仲要唔要，其實出面好多燒肉火鍋店都比90分鐘客人食野，60分鐘真係太小，唔會有下次。…查看更多

今日同老公女兒一家三口去開尖沙咀搵食，記得網上介紹有個新商場裡面有個高檔food court ，所以就去睇下有咩食，一落去就見到有船麵，本身一家人都好鐘意食泰國野，所以行左個圈都係選擇食船麵，我地叫左兩大一細牛丸船麵，一黎到驚見細碗嘅麵竟然多過大碗，但無再深究，因為已經好餓了，先飲左啖湯，淡而無味嘅，再食麵，竟然係硬嘅。。。金邊粉麵質半生熟咁，煮得唔夠林，再食埋粒牛丸，梅嘅，總括黎講，成碗麵都非常難食！…查看更多

上次同奶奶去食過下午茶，叫左個奶油多士無落牛油嘅，侍應就咁比舊牛油我自己搽返，但個多士又唔熱，牛油又硬跟本搽唔到，都算！上星期又再同老公去試下佢地嘅午餐，侍應冇禮貌都算，我明明叫咗茶走，佢黎左杯熱奶茶，同返侍應講，佢哋話唔知咩叫做茶走，跟住我自己落糖算，老公叫左個咖喱牛腩飯，啲汁水汪汪嘅，又無味，好似滾水溝咖喱粉一樣，非常難食，我自己就叫咗個叉燒通粉常餐，個煎蛋ok嘅，但啲叉燒就鞋到食唔到，完全冇下次…查看更多

今日同個朋友去食下午茶，我地係門口等位時無人理我地，侍應見到當睇唔到，我以為係自己搵位，點知我地搵左位想坐底，侍應又叫我地坐第二度，一坐底張枱好多食物又油淋淋，叫侍應抹一抹枱但黑晒口面，未食已經感覺好趕客，之後我叫左個星洲炒米跟蘋果薯仔沙律，但沙律只有雜果同薯仔一粒蘋果都無，跟住個星洲炒米係幾好食嘅，但點知食到中途見到有一大張膠紙，我即時叫侍應想同佢講，但啲侍應又係扮睇我唔到，當時真係一肚氣，等左好耐終於有侍應理我，我比碟炒粉佢睇，佢只係問我咁你想換咩？我無可奈何話叫廚房炒過碟吧⋯⋯咁嘅價錢食啲咁嘅垃圾同有啲咁嘅服務，完全無下次！…查看更多

今晚同老公撐枱腳，諗住未試過呢間就去試下，平時見到都幾多人，今日亦唔例外，係門口等位時已經揀好心水食物，我地一坐底就即刻叫嘢食，但落單個侍應服務態度好差，全程黑面，落完單無口述多次我地聽就黑住面走左，我地叫左一個燒牛肉濛，一個生牛肉湯河，一碟芥蘭苗同一碟越南春卷！我同左侍應講個湯河要走牙菜，但黎到係有牙菜嘅！我想叫侍應跟返但見佢都係黑晒面所以都由佢無出聲啦，自己夾走算啦，心諗咁大間餐廳嘢食又唔算平，咁基本嘅嘢都做唔到有點失望，跟住講下食物，第一樣試係芥蘭苗，話明芥蘭苗，應該好幼好嫩，但係又粗又鞋，最失敗係碟菜，兩碗粉ok嘅，個湯幾好味，燒牛肉都好好食，春卷就麻麻地，裡面嘅紅蘿蔔餡料有啲硬！總括黎講我同老公都覺得無下次啦⋯⋯…查看更多

前日咁啱同朋友一齊放假，打算去旺角揾放題食，之前都試過好多間，有個朋友上網搵左呢間大家都未食過所以就去試下。個朋友book左位但都要等！見裡面D人做野好慢，慢慢汁台慢慢sat台，我地就咁等左15分鐘，天氣炎熱，一心諗住入到去第一時間叫飲品先，坐低後發覺揾唔到叫飲品既落單紙，就問職員，點知佢話飲品要另外叫每杯$6！嘩~真係從來無食過一間放題係無任飲的，連一杯半杯都無得送感覺好唔底！最後每人都叫左一杯飲品首先我地叫左D魚生，壽司，天婦羅。魚生ok新鮮，不過款式唔多！更有幾款職員話當日未能供應！天婦羅ok無乜特別，但個天婦羅汁好有問題，係好似滾水加左一點有怪味既豉油咁的，唔點好過壽司好難食，D壽司飯非常之淋，有點像爛飯一樣，還有點暖暖的，帆立貝好簿，師父刀功非常一流！蝦壽司同蛋壽司都還可以，最難食係那個叫芝士三文魚壽司，味道像嘔吐物的，我們叫左六件，五件退回廚房去，當初職員話我地唔要咁多唔得，但我地叫佢食一件試試，個職員都笑一笑擰頭話唔食，之後幫我地倒左，係街邊賣三蚊一件仲好食過佢，又係選擇唔多，因為又係有幾款當日未能供應的！之後叫串燒，雞軟骨好像無落油無落汁燒的！乾到好似食緊柴皮咁，雞翅都好乾，無味的，牛柳粒又有異味，以為蔬菜類會無事，點知翠玉瓜係唔熟的，生的只係有小許鹽味！燒三文魚頭算幾好，多春魚就咸到好似咸魚咁，其他唔再夠膽食啦！金菇牛肉卷，唔算得上好食，但可以入到口！壽司卷物，軟蟹卷幾好，之後叫左個佢話係招牌菜既＂瀧澤特卷＂，上面有小許海膽，但臭的，我本身好鐘意食海膽，未食過一間係又臭又有苦味的！都係嗰句，去爭X買三蚊件海膽壽司仲好食之後大家都唔係好開胃，叫左D炸豆腐，沙律同魚生食完就算！但個炸豆腐叫左兩次都無黎，跟住就埋單啦！六個人只係食左一個鍾頭就走啦！當初見到間野限時食1：45分鐘仲驚唔夠時間=.=埋單好肉赤！加一再加埋一杯飲品6蚊每人$190，肉赤係因為無乜食過野咁！以後唔會再黎！…查看更多