selenaleung's Profile

行過 N+ Burger 幾次都冇入去，今次見到門口幾多人排隊，就決定試吓。叫咗個 classic burger set，配薯條同自家製 lemonade。環境方面整體OK，有啲設計感，不過我l見到有啲枱凳同地下都幾污糟，好明顯係有人使用過又整污糟咗，冇人即時清潔，有啲扣分。講返食物，漢堡包用咗 Bakehouse 嘅 sourdough，咬落去軟熟唔會太乾，口感幾好。Beef patty 聲稱係 farm to table，食落真係 juicy，有肉汁但唔會漏到成手都係，整體味道平衡，唔會太鹹或太膩。薯條係用真薯仔切出嚟，唔係薯粉整出嚟，切得粗身，炸得香脆但唔油膩，食落去有薯仔味，幾驚喜。Lemonade 就夠晒酸，冇加太多糖，飲落清新解膩，配漢堡啱晒。整體嚟講，N+ Burger 嘅食物有誠意，絕對唔係一般 fast food 水準，價錢合理，環境都算舒服。下次會考慮試埋其他款式嘅 burger。值得一試！…Read More

陳茶館真係愈開愈多分店，啟德店人氣勁旺，見到長長人龍即刻轉戰外賣！不過原來外賣匙羹要加一蚊～今次試咗佢哋嘅「金枝玉糯」，賣相超吸睛，一粒完整冰凍壹農芒果放喺面，果香撲鼻，甜度啱啱好，不過超冰凍嘅要小心敏感牙齒。沙冰底下仲有滿滿椰汁米麻糬，份量十足，香口又軟糯，配埋芒果真係絕配！唯一小小美中不足係底部冰粒多咗啲，影響咗口感。芋圓大粒又煙靭，絕對係我心目中Top甜品店之一！…Read More

聽網上好多人讚，最近終於去咗好時沙嗲試咗佢哋嘅海南雞飯同喇沙湯麵，感覺有啲失望。海南雞肉質算嫩，但味道偏淡，冇乜雞油香，底下墊咗生菜，份量唔多。三款醬汁可以稍微補救返啲味道，辣椒醬較突出，薑蓉清新，甜醬油就普通。油飯外觀吸引，粒粒分明，但食落都係唔夠香，冇咗雞飯應有嘅油香。附湯亦比較平淡，好似味精水，完全唔掂！喇沙湯底椰香味重，但味道似開味粉，口味好大眾，冇乜特色。配料有豆卜、魚蛋同蝦：蝦係普通雪藏貨，好細隻，完全冇味；豆卜吸湯尚可；魚蛋就正路野。麵唔係摻摻，麵質偏軟，唔太啱我口味。總結：以尖東地段嚟講，價錢算平，但味道方面未達預期，唔推薦！但如果純粹想醫肚，又唔講究嘅話，可以照食。…Read More

舖面貼滿唔同菜式，真係多到眼花撩亂，最後揀咗佢哋嘅蜆肉蝦蝦湯拉麵，結果完全冇失望！蝦湯濃郁到癲，應該用咗大量蝦頭慢煲，鮮味爆棚，平時唔飲湯底都忍唔住飲到差唔多清晒。湯底香濃得嚟唔會過鹹，層次分明，真係飲得出心機。拉麵入面有三隻大蝦，啖啖肉，鮮甜好食；蜆都唔少，令整碗麵更添海鮮鮮味同口感。麵質適中，唔會太淋，整體配搭非常出色。以呢個價位嚟講，性價比真係高。唯一美中不足係舖頭只有企位，人來人往食得有啲趕，但味道絕對值得忍耐一下。鍾意超濃蝦湯嘅朋友，呢碗拉麵你一定要試！…Read More

喺極尚章魚燒試咗佢哋嘅松葉蟹羔皇章魚燒，叫咗大份有8粒，即叫即整，要等大約10分鐘。章魚燒本體真係唔錯，外皮微脆，粉漿比例啱啱好，唔會太粉，入面仲有兩粒章魚，口感豐富，食落幾滿足。但係蟹羔就有啲失色，質地偏水，食落唔夠濃郁，仲流晒落個兜度，搞到成個章魚燒濕濕哋，口感怪怪哋。整體嚟講，章魚燒本身值得一試，但就唔好揀蟹羔味。…Read More

第一次試全日雞實驗所，叫咗menu推介嘅1號餐，一次過試晒溫泉雞唔同部位：雞翼、雞胸、上脾。平時唔太鍾意食蒸雞，怕鞋又多骨，但呢度嘅溫泉雞（即係海南雞）真係有驚喜！雞脾超滑又夠味，雞胸都唔鞋，雞翼就中規中矩，但配埋佢哋嘅醬汁，味道即刻升級。香飯係油飯，香而不膩，配海南雞一流。加咗3件桑拿瑤柱肉餅，入口有屋企煮飯嘅感覺，瑤柱味突出，口感紮實，絕對值得一試。整體體驗好滿足，記得叫溫泉雞之餘，唔好錯過桑拿瑤柱肉餅！…Read More

一直都好想試皇甘栗嘅栗子雪糕，終於俾我食到！原來軟雪糕版本只限星期六日供應，今日咁啱有，當然即刻試！雪糕質地好滑，栗子味非常濃郁，每一啖都好似食緊打爛咗嘅冰凍栗子，真材實料，唔係嗰啲人工香精味。配埋朱古力脆筒，口感層次更豐富。店內仲有好多乾果可以試食，環境乾淨企理，店員亦都好有禮貌又熱情。栗子迷絕對唔可以錯過！…Read More

最近見到網上有人推介鍾記粉麵店，決定親身去試下。未行到門口已經聞到陣陣冬菇香，真係令人期待！我叫咗兩碗車仔麵，一碗係米粉底配五香牛腩同牛筋，另一碗就揀咗蘿白底，加咗招牌冬菇、咖喱魷魚同鹵水大腸。值得一讚係佢可以轉菜底，我揀咗蘿白底，份量多到嚇親，粗俗數過有七至八舊！冬菇真係必叫，彈牙又入味；牛腩唔鞋，食落幾有口感；牛筋就有少少漂白水味，略為扣分。至於魷魚雖然有咬口，但味道偏淡；大腸就中規中矩，唔算突出。整體味道還好，價錢合理，但就未至於令人驚喜。…Read More

茶咖里藏身西營盤一條靜巷尾，係無意中喺Google Map發現嘅小店，感覺幾有特色，啱晒我哋啲一邊想食茶餐廳經典、一邊想歎返杯靚咖啡嘅人，所以就決定去試吓。今次叫咗叉燒通粉常餐，忌廉湯底濃郁滑順，炒蛋夠香，火腿厚多士份量足夠，但叉燒就有啲乾同鞋，有啲失色。加錢升級嘅意式咖啡用公雞碗呈上，好有趣，不過拉花完全睇唔出拉咩，味道一般，感覺似咖啡機出品。另一款炒蛋餐肉菠蘿包，外脆內軟，炒蛋鋪滿包包，好豐富，但餐肉得半塊略為失望。港式咖啡味道平衡，係茶餐廳嘅高水準。整體嚟講，茶咖里係一間用心結合港式同西式元素嘅小店，希望食物質素可以再進一步提升！…Read More

初試新蒲崗秋拾米線真係有啲驚喜。炭燒豬頸肉米線係佢哋嘅招牌之一，豬頸肉燒得啱啱好，外脆內嫩，咬落去有炭香又唔會太油膩，配埋酸辣醬汁，真係開胃到不得了。加左魚腐試下，簡直眼前一亮，因為魚肉香濃又彈牙，食得出係手工製作唔係嗰啲行貨，誠意十足。米線係豬骨湯底，味道唔錯，但冇乜特別。下次想要試埋酸辣湯底，應該會更惹味。蝦多士方面，外皮炸得金黃香脆，蝦肉夠爽口，不過塊多士略嫌油膩，食完有少少滯。整體嚟講，唔使排隊嘅，性價比幾高；不過，如果要排一個鐘隊嘅，我覺得未係好值得。…Read More

今次嚟Wow Pasta試咗佢哋嘅下午茶，啱晒唔太肚餓但又想食啲嘢嘅時候。除咗飲品之外，呢度上菜偏悠閒，我哋等咗一段時間先有食物。牛肉咖喱角一上枱就聞到陣陣香料味，聞落幾吸引，但個皮偏淡色，冇咩金黃酥脆感，望落有啲似中東酥餅。咬落去個皮幾脆，咖喱味牛肉餡味道一般，有啲啲似預製品多過即製。忌廉芝士菠菜酥就好啲，外皮鬆化，咬落去有少少牛油香，芝士味濃郁但唔會膩，菠菜帶少少清新感，整體口感算係幾平衡。環境方面就加分，落地玻璃窗令成間餐廳好開揚，陽光灑入嚟，坐低歎杯茶真係幾寫意。呢個下午茶set唔算驚喜，但勝在輕盈，適合hea下、傾偈或者等人嘅時候食返少少嘢。…Read More

第一次試兩姊妹涼皮，鋪頭枱唔多但翻枱快，等咗一陣就入得。叫咗佢哋出名嘅涼皮加雪花雞絲，仲試埋青瓜木耳椒麻雞。涼皮一上枱已經好吸引，條條又闊又厚，晶瑩剔透。口感滑溜彈牙，吸晒酸辣汁，食落去爽口又爽彈。最驚喜係入面有爆脆豌豆，粒粒香脆，加唔少分！調味汁酸辣開胃，層次分明，刺激得嚟唔會太搶味，食到停唔到口。不過雞絲就真係非常失望，完全同想像唔同：一舊舊好似免治雞肉再黏埋一齊，睇落似貓糧咁⋯冇咩味，又唔夠嫩滑，好似食緊難食嘅雞胸咁，食落去同涼皮完全冇得比，簡直係格格不入。反而椒麻雞有驚喜，雞肉幾嫩滑，青瓜同木耳都爽口又入味，麻香唔會太搶，整體味道幾討好。…Read More

麵家嘅招牌櫻花蝦雲吞麵真係有啲驚喜！佢唔走傳統大地魚湯底，反而用咗雞白湯，足足熬咗八個鐘！我都反傳統，第一啖唔係食麵，而係飲湯，湯底濃郁得嚟又唔會太油膩，入口鮮甜有層次感，食到尾都差唔多飲咗大半碗。粒招牌櫻花蝦雲吞就更加出色，皮薄餡靚大大粒，蝦肉爽口彈牙，咬落去仲有櫻花蝦同蝦籽嘅粒粒口感，味道超正！佢個辣椒油都值得一讚，入面有蝦米，好惹味。不過因為個湯底太好飲，食到尾先諗住加少少嚟試，結果一試愛上。…Read More

夜晚喺尖沙咀行完街，成日都煩緊搵唔到開到夜嘅餐廳。不過爸B燒就啱晒啲夜鬼，喺正K11隔離又開到凌晨兩點，真係夠貼心。佢新開張搞緊優惠，鹽燒海蝦只係$8一隻，抵到癲！蝦隻隻夠大隻，肉質爽口彈牙，啖啖肉。椒鹽雞軟骨份量唔少，炸得香脆，咬落去咔咔聲，椒鹽味夠惹味，配埋杯冰凍啤酒就一流。潮式牛餅係今次最大驚喜，外皮微脆，入面牛肉餡彈牙又多汁，食落幾有潮汕風味。雞扒串就有啲可惜，雖然肉嫩又夠味，但份量偏少，食完有種「未夠喉」嘅感覺，好似俾人偷食咗咁。燒豬腩肉方面，調味適中，肉質唔算韌，算係穩陣之選。總括嚟講，爸B燒係一間性價比高、選擇多、氣氛輕鬆嘅深夜燒烤店，啱晒夜晚想搵個地方慢慢食、慢慢傾嘅人！…Read More

德島主打奶茶同鴛鴦，聲稱獲獎無數，令我哋好期待試吓佢嘅水準。餐牌設計顛覆傳統，以飲品為主角，配食品有優惠，顯示對飲品充滿信心！熱奶茶嘅茶底香濃且幼滑，入口順口；鴛鴦咖啡與茶嘅比例調得恰到好處，平衡度好。沙嗲牛肉出前一丁竟然唔使額外加錢，牛肉味道幾好，但炒蛋直接放入湯底感覺有啲怪怪的。香脆雞扒炒蛋印尼撈麵嘅雞扒好香口酥脆，撈麵口感豐富。多士用咗厚方包，牛油都搽得好均勻，即烘即脆！整體食物質素令人幾滿意，環境都舒適。…Read More