xkxblog的个人专页

之前跑步經過深旺道舊舖，成日都話要搵機會幫襯，但結果都係無咗回事，呢次終於去利奧坊新店試試。星期日將近一點去到，剛好有最後一張二人枱。那個滷排骨便當（$76）炸豬扒超大塊，又厚切，炸衣夠脆唔油膩，表面淋上特製醬汁，咸香惹味，豬扒肉質爽口有質感，完全唔嚡唔韌，好滿意的一塊炸豬扒。如果想再提升味道層次，枱上有三樽調味粉，麻辣（唔算好辣）、鹽酥（因為已經有醬汁嘅咸味，所以唔突出）、海苔（個人覺得好夾），自行洒上豬扒增味。便當會有三款配菜，炒蛋（炒得不錯，唔老身，亦少許滑）、粉絲（調味不錯）、炒香菇椰菜（有蒜香味）。秘製嘉義雞肉便當（$66）呢個加咗$2由白飯轉黑米（其實係紅米糙飯）。秘製醬汁應該係黑蒜油，味道係幾好，再配咗啲炸乾蔥片，十分惹味，而且好啱撈飯。雞肉份量適中，味道就相對普通，係手撕雞肉，肉質有咬口，偏淡味，靠個秘製醬汁吊味。便當同樣有炒蛋、粉絲、炒香菇椰菜三款配菜。黑米口感豐富，唔算好硬。香酥臺南蝦卷（+$18）套餐加配小食，有兩條。呢個好食，腐皮包住蝦膠，炸得香口，但稍稍多油（“鯨”吓啲油或用索油紙索下啲油會更好），再加枱上嘅調味粉一齊食，更加好味。花壇蜂蜜翠玉（+$6）套餐加錢。其實唔知咩係翠玉所以叫嚟試吓，但結果即係蜂蜜綠茶嘅味道。正常，普通。檸檬冬瓜愛玉（+$9）套餐加錢。雙檸檬（鮮檸、咸青檸），酸酸甜甜少少鹹，幾得意，唔錯。…查看更多

葵廣呢間上海菜小店，成日都經過，好多時都有一班食客，但一直都無諗過幫襯。是日去開葵芳，經過幾間餐廳都無乜意慾，去到呢間門口，不如就試吓你啦。精美麵餐（$66）六選一麵食要咗炸醬麵，三選一肉類要咗上海排骨，二選一小食要咗鍋貼，送豆漿。炸醬麵有一咋醬汁冬菇豬肉碎，調味還可以。上海麵份量足，唔算好糊丁丁咬口。湯底接近清水無咩味。上海排骨有四件，即炸夠熱，頗厚身，無骨啖啖肉，肉質偏實，味道一般。鍋貼（2隻）係熱爐拎出嚟，但唔太熱，所以唔夠香口，皮偏糊口，餡料滿滿的豬肉碎。豆漿，味道偏甜。推薦套餐（$67）擔擔雲吞麵，擔擔醬唔得，淨係得花生醬味，仲要唔夠濃郁。湯底同樣清淡無味。四隻雲吞大隻，餃皮正常，餡料滿滿的菜及豬肉碎。呢碗嘅上海麵可能煮耐咗，所以口感糊咗啲。小籠包（4個），唔係平時食開嗰款，皮薄，肉餡超多超滿，但無肉汁，似食緊粒大版嘅乾蒸燒賣。豆漿，味道偏甜。PS：今日食嘅鍋貼、雲吞、小籠包，餡料都係同一隻味道嘅豬肉碎，估計生煎包、紅油抄手應該都一樣。老實講，唔難食但絕對唔係好食。份量足，夠哂飽肚，價錢公道，但味道一般，可惜應該沒有下次。…查看更多

鮮雜果單色綿綿冰（$46）綿綿冰口味可選：朱古力、芒果、豆腐，揀咗芒果。醬汁可選：朱古力、士多啤梨、焦糖，揀咗士多啤梨汁。配料可選：三色Q果、Oreo碎、爆珠、可可米、大西米、紅豆粒，揀咗爆珠+紅豆粒。太耐無食綿綿冰，雖然都知道口感及味道大致係咩，但食落仍然好有新鮮感。口感綿滑，無食刨冰嗰種凍到頭赤嘅感覺，配以芒果口味，酸酸甜甜，十分醒神，加埋士多啤梨汁同花奶，味道層次再提升。鮮雜果有芒果、西瓜、哈密瓜，清爽。爆珠“酸may may”，紅豆粉腍甜。補腦合桃糊（$27）合桃味是有的，但唔算太濃厚，味道還算可以，合格之作。…查看更多

澳門豬扒包（$39）豬扒即煎，無骨，頗大塊，肉質正常，唔算軟腍亦唔太嚡，醃味普普通通，但太油油膩了，個豬仔包索哂啲油。豬仔包有稍稍烘過，輕微脆身。煎蛋正常，煎到脆邊。無骨豬腳米線（$39）豬腳大約有四五件，全部都無骨，滷水味的確唔錯，唔係死鹹，但豬腳煮得太腍了，肉同皮都軟pat pat，完全沒有口感。白蘿蔔大約有五六舊，無渣，但唔甜亦無咩味。最失敗係米線，淥到過哂火，又腍又碎，因為我睇住員工煮，佢放完啲米線落水之後，突然有幾單外賣，所以完全忘記咗，足足過咗十分鐘以上先撈返起啲米線。下午茶餐有配熱飲，但咖啡同奶茶都完全唔得，完全是沒有味道的，如果匿埋眼飲的話，仲以為飲緊清水。總括嚟講，除咗價錢稍為相宜之外，食物質素就比較遜色。…查看更多

外賣平台 X Dough Bros 推出限時優惠，指定薄餅買一送一，只要 $168 就有兩個10吋大嘅手工酸種薄餅​。咁啱去朋友屋企打牌，咁就啱哂嘞。指定薄餅有四款可揀：意大利辣肉腸薄餅​、夏威夷薄餅​、燒烤醬雞肉薄餅、黑松露薄餅。揀咗前者兩款。意大利辣肉腸薄餅：10" pizza 開六件，都有番咁上下大細。辣肉腸份量都多，茄醬底及水牛芝士味濃，手工酸種餅底好有咬口。夏威夷薄餅​：有火腿、脆皮腸、菠蘿，份量足，茄醬底及水牛芝士同樣味濃，手工酸種餅底𡁻勁一流。另外買多兩個爆醬冬甩，$38一個，有勁多醬可以揀，而且可選擇肉桂糖/白砂糖。Nutella 榛子可可醬：冬甩唔算好大個，同女士嘅拳頭差唔多。表面洒上大量肉桂糖，外層微脆，內裡十分鬆軟，中間唧咗不少醬，榛子可可醬味道濃，不錯。港式奶茶：港式奶茶醬味道唔太濃，比甜味冚哂啲味，麻麻。兩個薄餅 + 兩個冬甩，連埋其他手續費，又用埋啲優惠，都係$180，好抵食。…查看更多

青衣除咗「一粥麵」，終於開粥店了。呢排天氣稍涼，最啱食啲暖身嘅嘢。艇仔粥（$28），粥底頗綿滑，亦算"傑"身，已經有少少底味。水魷、碎牛、豬皮、花生份量適中，味道亦合格。豬紅粥（$26），大約有6-7粒豬紅，實身唔易夾碎，有豬紅味但唔腥。粥底同樣綿滑"傑"身。炒麵（$15），份量適中，微溫，麵條有咬口，味道正常，有些少椰菜絲，沒有肉絲。可惜得辣椒醬，無辣椒油。牛利酥（$10），係保溫櫃拎出嚟，微溫，仍脆身，夠實在，唔會的啖風一咬就扁。鹹煎餅（$10），係保溫櫃拎出嚟，室溫，少少脆身，好大個，中空。炸兩腸粉（$19），有分大細，要咗大，有三條，每條切開四件。腸粉滑，夠熱。油炸鬼仍脆身。整體食物質素不錯，味道、份量、價錢都中規中矩。…查看更多

豚軟骨高湯烏冬（$59）湯底濃厚夠味。豬軟骨得一舊，兩三啖就食完，煮得夠軟身，肉質腍，味道一般。半隻烚雞蛋，味道正常。烏冬份量合適，質素不錯，口感十分滑，咬落有𡁻勁。海苔竹輪天婦羅（$14）十分失望，凍的，唔脆身，軟淋淋。蕃茄牛肉烏冬（$59）湯底蕃茄味足，唔太酸。牛肉有三片，唔太肥，無乜牛味，稍稍過熟，另外附帶一堆洋蔥。烏冬份量合適，質素不錯，口感十分滑，咬落有𡁻勁。野菜魷魚（$19）雖然唔係凍，但室溫，都係唔熱的。座位區附近有一個自助 counter，提供天婦羅碎、醬汁、調味粉、水。老實講，除咗主打嘅烏冬外，配料、湯底都比較一般，而額外加錢嘅小食更加唔掂，十分失望。…查看更多

近排好想食乳豬，既然出開佐敦，記得 社交平台燒味關注組不少成員提及過，上海街嗰頭有間燒腊舖啲乳豬唔錯，一於買外賣，斬料晚飯加餸。燒腊舖係舊式類型，以外賣為主，除咗斬料亦有燒味飯。乳豬每份$220，份量大約有四分一隻乳豬，已經斬好一份份掛起，自己揀啱邊份，手指指同師傅講就可以了。因為夜晚先食，費事太早斬件，所以要求師傅原份免斬入盒。俾錢（收八達通），收貨，成盒拎上手十分有重量，摸個盒 feel 到份乳豬仲係微暖。晚飯前自已用廚房剪刀分件，估唔到相隔咗一段時間，個乳豬皮仲十分脆。因為揀咗上半部份（即是頭以下至腩中間），所以近頸位比較多肥膏，係可接受程度，而腩位就接近零肥膏。乳豬調味正常，不會太鹹略帶少甜。乳豬皮屬芝麻皮，硬身鬆脆，個人覺得比玻璃水皮更有口感。乳豬肉質軟嫩，沒有豬騷味。整體非常滿意，掂呀。…查看更多

新疆菜，香港真係好少。呢間小店係今年年頭，去文英街食飯時經過見到，有留意及記底，咁啱出開佐敦，決定試試。A01 大羊腿抓飯（$68）本來想食細羊腿，但店員話得大羊腿，現在做緊特價（餐牌原價$88）。羊腿係小腿位，都算大隻，呢度嘅羊係以清燉形式烹製，羊肉聞落有羊騷味，但食落接近零羊騷味（對本人來說有啲可惜），羊腿肉好軟腍，骹位軟骨及筋有𡁻口。因為味道偏清淡，所以自行加枱面嘅辣椒粉提味（但唔係好辣的）。抓飯（可能）係第一次食，飯偏濕，但帶有羊味，估計係用清燉羊嘅湯汁煮，幾特別。A08 羊排+羊腩雙拼抓飯（$88）羊排兩件，羊腩約八小件。羊排軟熟嫩滑，三款羊之中最好味；羊腩有瘦有唔瘦（無肥的），瘦嘅比較嚡，唔瘦嘅連埋筋膜位唔錯。抓飯跟涼菜（醃蘿蔔）及湯（應該係羊湯，帶淡淡羊味）。本來想試飲奶啤，但無，飲品得返汽水。…查看更多

上網見到呢間南非餐廳有鴕鳥扒食，印象中好似未食過，所以去試試，點知貨源問題，未能提供，殘念。午市套餐（$139）有前菜、主菜、甜品/咖啡，另可加錢（+$10）要配菜，另收加一服務費。前菜：奶油卡宴焗蝦配香蒜包醬汁好味，味道有啲似帶辣味嘅濃版蘑菇湯，點香蒜包食非常夾，三隻蝦都大隻，有彈性兼且有蝦味，好食。前菜：牛油果沙律牛油果軟熟，沙律菜爽脆，洒係面嘅黑胡椒亦香。主菜：南非烤雞肉串即燒，雞肉外層微微焦香，內裡仍軟嫩。調味醬汁十分惹味，有孜然、紅甜椒、霹靂椒、乳酪，微酸少辣。配菜沙律菜正常。主菜：香煎鱸魚柳即煎，煎得好靚，係用牛油慢慢煎香，魚柳表面微微焦香，所以少少脆，魚肉肉質紮實，有魚味。配菜青豆同樣用牛油煮，無好重嘅草青味。配菜：黃薑飯份量唔算多，過口癮還可以，味道亦普通。甜品：南非傳統焦糖布丁蛋糕中間有杏桃醬，表面淋上吉士椰棗醬，口感鬆軟濕潤，味道不錯。咖啡：Americano正常普通的即磨咖啡。…查看更多

椰子珍珠奶茶 700ml（$34）勁差勁失望，椰子味接近零，成杯嘢味道淡而無味，同清水無咩分別（雖然要求咗少甜，但都唔係淡味到咁吖）。珍珠份量一般，但極之軟pat pat，無咩口感。招牌珍珠奶茶 700ml（$24）呢一杯同樣唔掂，味道偏淡，茶味欠缺層次，珍珠無口感。老實講，本人絕對唔會再幫襯。好明顯賣得呢個價錢，深水埗一定大把台式飲品店好過佢，而且售價可能仲平啲，我諗到佢唯一取勝嘅理由應該只係位置比較方便。…查看更多

牛腩肥腸幼麵（$40）牛腩及肥竹腸各有五舊，份量大小適中。牛腩近崩沙腩位，有筋膜，彈牙gel口，牛腩肉質軟腍但有咬口，亦有肉味，不錯。肥竹腸夠哂肥，腸衣有𡁻口但唔黐牙，肥膏肥而不膩，牛脂甘香，正，大愛。湯底雖然偏清淡，但味道足（飲咗大半碗，事後沒有勁口渴感覺），附上蔥花、芫茜、乾蒜，增加味道層次。幼麵爽口彈牙，但鹼水味偏重（個人覺得問題不大）。另外仲有一片生菜。牛雜河粉（$32）有4片金錢肚，4舊肺，3舊粉腸，1件膀。金錢肚大片有𡁻口，肺唔夠彈性，粉腸夠粉好味，膀偏細件味道正常。河粉味道亦正常。另外仲有一片生菜。凍檸檬茶（+$8）單點$15，三片檸檬，茶味一般，味道正常。…查看更多

沙嗲王嘅白咖喱可以話係佢嘅主打，但都有一段長時間無食，之前行新都會見到佢嘅副線「白咖喱公司」開咗，今次就走去回味一吓。白咖喱香茅豬扒飯（$68）三塊香茅豬扒，兩塊正常厚度，有一「片」好薄，香茅味醃得幾香，煎得亦不錯。白咖喱已經唔記得係咩味了，但食返都幾好食，香、濃、微辣，而且唔孤寒，足夠撈哂啲飯。白咖喱厚切吉列豬扒飯（$74）一大塊厚切吉豬，都真係幾厚，炸衣厚薄適中，脆口唔油膩，厚切豬扒有咬口，唔嚡唔乾身，口感不錯。呢碟啲白咖喱同樣俾得夠，唔錯。5：30前落單，送無糖綠茶或咖啡。自助落單，送餐機械人上菜，自助埋單俾錢，不收加一。…查看更多

上次去鄰近 Gate 35 嗰間「環亞機場貴賓室」無魚蛋粉，今次去鄰近 Gate 60 呢間。其實 Gate 60 呢間比 Gate 35 只係行前少少再上一層就到。去到門口無人排隊（可以太早，因為未夠6點），搞好手續，即入勁快脆。呢間同樣唔多人，有室內同室外兩個區域，但室內位置冷氣唔多夠比較悶熱。食物選擇OK咁啦（一般早餐嘢，魚肉燒賣、腸粉、腸仔、炒麵、茄汁豆、滷蛋、蘿蔔糕...），但終於試到魚蛋粉（要早上6點後才會供應）。另外有啤酒、粟米片、果仁提供，食哂早餐，坐係度慢慢 hea 到夠鐘。…查看更多

食完燒雞，又食埋甜品，尾站斬料今晚做餸。點解專登嚟呢度斬料？因為前排睇谷導嘅「消失的味道」，其中有一集講金錢雞（回想最後食呢味嘢已經係廿幾年喺旺角食過，但間燒臘舖亦已經執咗N年了）。另外節目中亦介紹另一款懷舊菜：鴨腳札，於是記低有機會搵日去買嚟回憶一吓。既然去開紅磡，當然順道去買啦。金錢雞（$98/斤），買咗一份；鴨腳札（$98/斤），買咗兩札，接近兩斤，總共$190。金錢雞，有冰肉（2件）、叉燒（2件）、鵝肝（1個）。冰肉，即係肥膏，爽口，但只可淺嚐一小口。叉燒，瘦叉，乾身。鵝肝，一大個，粉嫩軟滑。鴨腳札，比想像中大舊，份量比一個成年男子嘅拳頭還要大。材料有數條鵝腸札住鴨腳（1隻）、叉燒（4件）、燒排骨/燒腩肉（1件）、燒鴨（2件）、燒雞（2件）、鵝肝（1個）、火腿（1件）、芋頭（2舊）。老實講，味道全部都係一種味，就係蜜汁叉燒嘅味，裡面啲材料嘅質素都極之普通，係個鵝肝OK啲，同金錢雞嗰件一樣，粉嫩軟滑。食完今次，之後會唔會再（想）食？機會應該低啲嘞。因為呢類食品，味道及口感真係唔算好食，況且年紀再大啲的話，接受呢味嘢（膽固醇）嘅能力又再低啲。兒時回憶的味道，有時候保留在記憶中不失為一個好嘅選擇。…查看更多