yuchiro的个人专页

好熱，喺深水埗街頭行到一身汗，諗住搵個地方hea下，見呢度間樓上舖又轉左手，不如上去試下佢啦。店名叫食得開心，仲話總點喺元朗，作為一個元朗人居然唔認識呢間餐廳🤔店內裝修簡潔，冷氣十足。剛剛上到嚟嘅時候，全部卡位坐滿，旁邊嘅枱都有幾枱客，都唔少人喺度食緊嘢喎。係咪我哋比較晏上嚟呢，睇緊餐牌揀嘢食嘅時候，嗰幾枱卡位陸陸續續咁離座，不過店員未執枱，又費事搬過去。餐牌主要都係炒小菜同煲仔飯，午市套餐同下午茶套餐基本上一樣，只係價錢上嘅分別，最後我哋揀咗兩份下午茶餐，49蚊起真係平到笑。⭐蠔仔肉碎粥自己點左蠔仔粥，一大鍋上都幾足料，入邊蠔仔唔少，仲有好多芹菜同芫荽，同埋飯係超多嘅，呢鍋蠔仔粥食完真係飽到上心口😝⭐蘿蔔牛腩飯朋友點嘅牛腩飯賣相都唔錯，一碟入面一半係牛腩一半係蘿蔔，上枱嘅時候已經分得好清楚，乜啲蘿蔔同牛腩唔係一齊炆嘅，咩點解可以分開擺咁得意😆炆得軟腍入味都幾好食，仲有一大碗白飯，作為下午茶嘅份量真係唔少，食完都唔使食晚飯呀。⭐熱檸茶 & ⭐熱檸水正正常常嘅熱飲，有三片檸檬無苦澀味，收貨啦。而加啲餐廳真係唔興出單，又係去到收銀嘅時候畀個mon你望一望，就用電子支付，店員都唔係好樂意收現金添呀😅…查看更多

約左人到D2睇戲，睇前諗住食啲野，商場入面幾乎無店咁早開，到街上搵食吧，遠遠見到紅城，大大間茶記外觀唔錯，試呢間吧。無枱得返吧枱，ok啦求其食下啫，各自各掃code落單先。咦，原來仲有早餐喎，三十幾蚊係平嘅，唔怪得咁多人。⭐沙嗲牛肉公仔麵配西煎雙蛋&牛油多士自己落左呢份餐，經典港式早餐配撘😆沙嗲牛……幾失望，無沙嗲味之餘仲帶點酸酸辣辣？？奇奇怪怪的🤔前雙蛋無特別啦，牛油多士塗左好厚牛油，正。⭐沙嗲牛肉公仔麵配雞肉腸併炒蛋&牛油多士朋友點左呢樣，落完單發覺大家點差唔多嘅野😆哈哈。佢份滑蛋幾吸引，腸仔正常味啦。⭐熱杏霜心有靈犀居然一齊點咗熱杏霜😝但舖頭應該好少人飲呢樣，我覺得個水吧師傅唔識得沖，落咗勁多杏霜粉，兩杯嘢結他他程啫哩狀，似係食緊杏仁糊多過飲緊杏霜，某程度上嚟講係咪叫抵咗？畀咁多杏醬粉你飲😆食物味道一般，店內環境一般，但價錢夠平，所以人多都係有道理嘅。BTW，自助落單自助畀錢，除咗上菜有人手之外，幾乎全程見唔到伙記。…查看更多

約左舊同事出黎傾下偈，揀左K11附近的紅雞冰廳，貪佢晚上唔多人好易搵位。餐牌都幾多野揀，基本上飯/麵都跟熱餐飲，凍飲+$3，價錢好親民。⭐羅宋湯丹麥多士叫左份鐵板餐，個餐包埋餐湯同餐包，是晚個羅宋湯幾足料，不過個人就覺得鹹左少少。丹麥多士勁正，暖烘烘又重牛油，好好食😝⭐原條鰻魚蛋包飯同事叫左鰻魚飯，大大碟仲係原條鰻魚黎，上面嘅蛋超嫩滑，再加上甜甜地嘅鰻魚汁好正。⭐紐西蘭羊架鐵板餐自己就點左鐵板羊架，一上枱已經聞到香味，再張個蒜蓉醬倒落去，喳喳聲正呀😍羊架大大塊厚身，邊位有羊脂煎得好甘香，下層嘅薯角同紅蘿蔔仔吸左羊油好好食🤤個餐加$10可配意粉或白飯，勁飽呀。⭐炭燒豬頸肉配冬陰功撈麵仲叫左呢份出前一丁撈麵餐，比佢個冬蔭功吸引住🤤上面份豬頸肉燒得香口，丁麵有冬蔭功醬撈過酸酸辣辣，味道唔錯。仲有碗冬蔭功湯附送，碗湯都幾辣喎😝⭐凍檸檬利賓納 & ⭐奶茶紅豆冰 & ⭐凍檸茶餐飲轉左凍飲同特飲，紅豆奶茶夠香滑，檸茶茶底夠濃味，檸賓就淡左啲都ok嘅。食飽飽又傾下偈，寫意😆…查看更多

好想打邊爐，近近哋去咗荃灣大滿足火鍋冰室，$198人頭任飲任食，呢個價錢真係抵到冇朋友😝是晚湯底揀咗麻辣雞煲，雞煲要咗小麻小辣，煮滾一陣打開即刻聞到香噴噴，嗰陣麻辣味非常強烈睇見就流口水🤤雞件嫩滑啖啖肉，煲內仲有唔少三色椒、洋蔥、南薑、蒜頭等，十分足料。食完雞煲梗係加湯打邊爐啦，自助區應有盡有🤤牛肉有三款牛板腱、肥牛同手切牛，豬肉都有兩款黑毛豬肉片同埋豬腩片，另外仲有唔少海鮮，蜆、蠔、蝦、蟶子、九肚魚、魷魚等等。蔬菜亦是十分多款，唐生菜、西洋菜、娃娃菜等，仲有至愛嘅芫茜添🤤其他有粟米、南瓜、蓮藕片、豆腐、鴨血、蟹柳、各款丸子、腸仔等，多度數都數唔曬。如果覺得打邊爐都仲未夠，旁邊仲有一個熟食區，有新鮮炸起嘅韭菜雲吞、九肚魚、咖哩魚蛋、四季豆炒肉鬆等，仲有幾款涼拌菜同新鮮切嘅水果😋除咗多嘢食外仲有勁多款飲品，除左一般紙包無糖茶、罐裝汽水外，仲有餐廳自家製嘅冷泡茶、紅豆涼粉冰、雜果冰、檸檬茶、竹蔗茅根水等，當然唔少得啤酒添啦，罐裝啤酒都有好幾個牌子，哈哈，真係好強！甜品就有雪糕同芒果布甸，強烈推薦朱古力同焦糖咖啡口味雪糕，勁好食😋食到飽到上心口都係二百幾蚊，超抵食！！…查看更多

過完中秋，天氣依然炎熱，是日同朋友到左開心廣場附近買嘢，之後見有啲口渴又口痕，便去了一間茶飲店買嘢食，小店叫茶九里G9U，個名聽落幾潮咁喎😋飲品選擇幾多，小食就有台式炸物同港式腸粉魚蛋等。落完單等拎期間，都有四、五個人嚟買，仲有外賣員添，睇嚟小店都幾受歡迎，小食多人買自然新鮮好食啦。⭐黑糖珍珠鮮奶 & ⭐芝士奶蓋抹茶鮮奶點咗即沖嘅手搖茶，黑糖珍奶固定甜度，個黑糖味幾香，珍珠彈牙有咬口。另一杯芝士奶蓋抹茶鮮奶就可以揀少甜，抹茶味幾濃，芝士奶蓋後厚滑，幾好飲呀。⭐炸物拼盤炸物小食又好幾款一次過叫個拼盤就有齊哂，方便選擇困難症嘅客人。拼盤入面有海苔炸燒賣、蛋餃、台灣腸、花枝丸同鹽酥雞，即叫即炸熱辣辣香噴噴🤤個人至愛花枝丸，真係好彈牙好好食㗎。⭐腸粉三寶仲叫咗一份腸粉三寶，三寶就包括腸粉、咖哩魚蛋同燒賣。腸粉好新鮮，蒸得啱啱好唔過淋，甜醬、甜豉油同辣醬都落得多，上面仲灑左唔少芝麻更香口添，不過好似冇麻醬？蒸燒賣煙煙韌韌，同上面嘅炸燒賣食法唔一樣㗎😆咖哩魚蛋要咗辣味，不過其實都唔辣嘅，魚蛋有咬口都唔錯。⭐蒸粉果以前食街邊小食總會篤串魚蛋同叫隻蒸粉果多辣椒油，最近蒸粉果呢個小食已經漸漸消失😅見呢間有得食，叫返兩隻童年回憶先。粉果大大隻，皮雖然厚啲但入面都好足料，最正係加咗辣椒油同甜豉油，個味道出曬嚟。想買嘢飲同食下嘢又多個好選擇，下次口痕都可以嚟茶九里😋…查看更多

中秋節正日公司放早，夜晚會同屋企人做節，晏晝先來天龍咖哩食過午飯。大約兩點多來到，餐廳半滿座，下午茶時段都唔少人食緊咖哩飯喎。睇睇餐牌，都係叫返鍾意嘅咖哩牛筋牛腩飯同肉餅飯先，再加份小食share下。⭐咖哩牛筋牛腩飯滿滿一碗咖哩汁入面全部都係料，牛筋牛腩都好多，炆得入味，牛腩香口肉質鮮味，牛筋軟腍浧膠質狀，加埋咖哩汁撈飯真係好好食。⭐咖哩生煎肉餅飯呢碗咖哩入面竟然有三塊生煎肉餅，件件肉餅都厚身㗎，大大塊充滿肉感😋外面煎得香脆入面仲有肉汁，口感好正😋自己呢碗咖哩要咗加辣，我覺得夠辣先好食，入面嘅洋蔥碎加埋辣醬真係超啱我口味，成碗咖哩汁撈飯一啲都冇曬。⭐雞皮餃子煎得香脆嘅雞皮入面包住豬肉餡，一咬落去啲雞油爆出嚟勁甘香，邪惡又好食🤤⭐炸鮮奶朋友鍾意甜食，佢又加咗一份炸鮮奶，外面炸得脆,入面係甜甜嘅奶香餡料，正🤤⭐鹹檸碧 & ⭐柚子梳打呢度用雪碧所以係鹹檸碧唔係鹹檸七😆鹹檸檬鹹鹹酸酸，解辣解油啱曬😋朋友要咗柚子梳打，柚子醬下得多，甜甜哋帶有柚子香，都好好飲㗎，不過紙杯裝就略微細咗少少啦。呢間巴基斯坦風味咖哩真係好啱我口味，佢除咗咖哩，都有其他款式嘅碟頭飯嘅，唔食辣都有好多選擇㗎。…查看更多

呢間潮州店好幾年前都成日嚟食，以前覺得佢啲嘢好味又大碟，唔知從幾時開始，份量越來越縮水，加上又加價，嚟食嘅次數減少又減少。今年年頭幾個月，睇新聞好似話佢畀人罰停牌，之後又聽講佢大裝修。九月某日夜晚，親戚約嚟呢度打冷，先至覺得原來真係好耐冇食過。親戚先到一早霸定枱，人齊後不久，店員就送上角色潮州醬料，呢餐由親戚拍板，直接出去櫃位落單，原來而家唔再比手寫單，全部嘢電腦化。⭐韭菜花蜆肉鹹菜鹹鹹地辣辣地，呢個送白粥一流。⭐滷水墨魚併大腸&紅腸墨魚嘅比例出奇地少，正常嘅墨魚貴呀嘛😅滷得入味，豬大腸係中間仲有肥膏留低嗰種，我個人就唔介意嘅，不過其中一位親戚就係鍾意食清得非常乾淨嗰種大腸。下層嘅大豆芽吸咗滷水汁好好味，啲豆芽好爽口。⭐韭菜豬紅唔會一夾就散，質感同味道都好嘅豬紅，韭菜亦唔算太老身，唔會食到一口渣😋⭐潮州滷水鵝點少得潮州嘢名物滷水鵝，皮下唔肥，肉質鮮味，連啲骨都入哂味，仲墊咗啲鹵水豆腐都好正，花生就略嫌硬身咗。⭐炸蠔餅粉太多蠔太大隻，食落都唔似炸蠔餅，兼且真係好油😅⭐蠔仔粥蠔仔粥嘅蠔同樣係太大隻，煲熟咗都有半隻手掌size，點都唔係蠔仔嚟啦。入面仲有大大隻花菇，個蠔仔粥都幾鮮味嘅，唔落胡椒粉都唔會腥，但我覺得可以落返少少鹹雜，佢味道偏淡。呢餐食咗五百幾蚊，人均一舊水又唔係貴嘅，食物味道都keep到，但真係sorry講句唔會再黎，至少夏天唔黎😅間舖裝修後換咗個金碧輝煌嘅招牌，店內牆身掛咗好多寫簡體字有潮州特色嘅掛畫，餐具用上迷你膠碗筷，好有玩具嘅感覺，而檯面亦換上仿木嘅膠長枱，成間舖入面都充滿淘x嘅感覺。呢個都唔係最重要，係重新裝修完之後，店入面雖然開大冷氣同風扇，但都仲係熱到hi hi，全餐飯冇停過流汗，真係貼錢買難受。如果有機會，搵日冬天天氣涼啲先再嚟食啦😅…查看更多

趁住國慶假期去元朗大馬路度攞月餅先，廢事等到中秋節前夕嗰日大排長龍又好多分店冇貨啦。唔知係咪關假期事，今日條小食街特別暢旺，間間都排曬隊買。係雞地悄悄結業嘅阿媽豆腐花，原來搬咗過嚟呢邊，而家仲多咗小食賣添。⭐凍豆花天氣咁熱叫返杯凍豆花飲下先，係呀～你冇聽錯唔係豆漿係豆腐花，一杯可以飲嘅豆腐花😋杯豆花本身無糖，你可以要求加黃糖嘅，甜度仲可以自由選擇添。甜甜地又滑溜，咁樣飲豆腐花又幾好味喎。⭐麻辣魚蛋仲叫咗份麻辣魚蛋，一份有20粒😋雖然顏色好紅但係食落其實只係小小辣，而且完全冇麻嘅感覺，我覺得叫香辣魚蛋可能會貼切啲。⭐粢飯原來佢仲有粢飯賣，咁可以早餐嚟呢度買喎😋粢飯加豆漿咪啱啱好囉。講返件粢飯，都幾大舊㗎，有手掌size。入面包咗油炸鬼肉鬆同榨菜粒，味道正正常常，飯就硬咗少少，不過可能放到三點幾先嚟買啫，早餐時段新鮮做應該會好食啲。⭐芝麻卷最後就係芝麻卷，突然間文藝復興多咗好多街舖做呢個失傳嘅小食，呢間個芝麻卷都幾香芝麻味，入口煙煙韌韌滑捋捋，都唔錯呀😋幾十蚊食到咁多嘢😋間唔中出嚟掃下街，心情都好啲。…查看更多

西九龍中心咁多嘢食，今晚食咩好？見有朋友介紹過八樓有間高質蹄花湯，就走嚟望下🤔店名叫面珠墩，由於美食廣場店舖太多，小店真係唔易搵，行到較後嘅位置先至見到。見前面食客點咗招牌蹄花湯，真係幾吸引，仲可以配飯配菜加飲品，成個套餐都係六十幾蚊，真係平過北上。⭐牛腩飯朋友話佢想食牛腩飯，一碗牛腩飯有成五、六件牛腩，仲有一粒牛丸同一隻鹵水蛋，加上涼拌土豆絲同兩條青菜拌下碟，顏色好睇又營養均衡。牛腩炆得很入味，有筋有肉半肥瘦，咬落牛脂甘香勁正喎😋⭐沙薑豬手飯自己就點就沙薑豬手飯，豬手係炆到軟腍嗰種，口感就係滿滿骨膠原嘅感覺，仲有淡淡嘅沙薑香味。豬手清理得好乾淨，無雜毛無異味，真係化咗唔少功夫😋一碗有四大件豬手，食完啲豬手都爆咗嚕。⭐蹄花湯附上一碗例湯，其實等同佢哋嘅招牌蹄花湯，不過呢度就無蹄花，但入面都有雲豆㗎，雲豆蹄花湯就係傳統嘅美味🤤雲豆綿軟入味，湯汁香濃有黏口嘅感覺，哈哈，骨膠原呀～⭐炸魚薯條只係食飯覺得有啲平淡，於是加多咗份小食炸魚薯條，大大份炸魚薯條都係35蚊，下午茶時段仲送嘢飲添😳魚肉非常嫩滑，炸漿香脆，咬落鮮味唔油膩，估唔到小店都用上咁靚嘅魚肉去做炸魚薯條😍⭐原味烏龍茶 & ⭐白桃烏龍茶加六蚊可以有一罐原片茶葉嘅無糖冷泡茶，有原味同白桃烏龍兩款口味揀，喺台灣出品寫繁睇字㗎👍好好味又價錢貼地，仲份量十足添，真係抵食到喊出嚟😆…查看更多

超強颱風要來了，梗係要去超市掃下貨，順便食埋嘢添啦。是晚就嚟到灣景廣場嘅天米，聽人講話呢間啲手握飯糰好好食，見佢有餐有散點價錢合理就試下先😋餐牌有十二款飯團同三款小食，叫餐可以跟湯跟甜品或者全部都要😆小店只有一名員工，由排隊落單到出餐都真係需要啲時間。點咗兩份最豐富嘅Set D，包括飯糰兩個加湯品加甜品，見薯仔沙律同玉子燒咁平，又每人加咗一客。朋友話望落個飯團唔大，於是佢又追加多一件，我心諗你係咪真係食到咁多嘢㗎😝⭐明太子沙律 & ⭐醬油漬芝士明太子先試明太子口味嘅飯團，明太子鹹香鮮味，下得很多，每一啖飯都食到明太子🤤朋友仲要加埋醬油芝士，嗰份鹹味更有層次，軟綿綿有香口，朋友話醬油漬芝士唔知點解感覺有啲似腐乳添😆⭐香蔥醬油牛肉 & ⭐醬油漬蛋黃 & ⭐醬油漬蛋黃雞肉碎第二件就係醬油漬蛋黃，味道濃鬱鹹香，有醬油同埋麻油味，蛋黃仲有蛋香添㗎。朋友就食佢升級版有埋雞肉碎，雞肉碎甜甜地，同鹹鮮嘅蛋黃混埋一齊又幾好食喎。最後就係試埋個香蔥牛肉，味道感覺有啲似得吉x家，好食都好食，但因為牛肉比較大塊，咬飯團嘅期間啲牛肉好容易鬆開，而跌到一碟都係😅呢款口味食得比較狼狽。⭐味噌豬肉湯湯品係味噌豬肉湯，入面除咗豬肉片，仲有洋蔥、薯仔、紅蘿蔔，飲到蔬菜嘅鮮甜，而且飲完唔口渴👍⭐薯仔沙律好喜歡食日式嘅薯仔沙律，鍾意佢個沙律醬混埋蛋黃，軟綿綿起曬沙，淡淡薯仔蓉好正，沙律醬唔酸又唔會水流流，好味又飽肚😋⭐明太子玉子燒玉子燒口感一般，正在上面有明太子醬，明太子醬真係配咩都特別好食。⭐QQ餅最後甜品係蕨餅，黑糖口味配上黃豆粉，口感Q彈香軟，甜度只係微甜，無日式和果子嗰種甜到膩嘅感覺，呢款啱口味，黃豆粉好香啊😋飯糰雖然望落唔大，但其實份量十足，一個都有成碗飯咁上下，呢餐真係超級飽，咁好食好滿足😍…查看更多

升職加薪去食餐好嘅，揀左朗屏站的The Central，睇相幾吸引😋店很大，燈光昏暗再點上蠟燭，氣氛唔錯👍咁大間舖其實得一位店員，見佢超忙但都好有禮貌，我地隨意落完單便一邊傾偈一邊等食。逢星期二有買一送一，星期三酒品半價，唉呀，可惜今晚星期一無得用優惠添。⭐Nutty Treat & ⭐Liquid Salad餐廳勁多酒類選擇，紅酒白酒cocktail 應有盡有🍸我地唔飲酒啦，揀左兩杯mocktail，兩杯都係香蕉底，前者加朱古力花生醬豆漿，後者加雜莓椰子水，各有各好飲😋⭐Crab Fries 朋友點的蟹肉薯條，炸薯條上放了芝士碎、蟹肉、蟹籽，再加上是拉差辣醬，鮮味微辣幾開胃😋⭐Parmesan Truffle Fries 再點左黑松露薯條，本想係漢堡配薯條的，但誤會了😂黑松露味勁香，配上沙律醬好好味，雖然有兩盤薯條，但食晒無難度。😝⭐Salmon Skewer 點左份小食串燒三文魚，意外地大份😳三文魚燒熟左都有咁大件，燒得香軟嫩滑，一啲都唔鞋口。再加上三色椒、蕃茄、洋蔥等，好睇又好味，啲香草味勁正😍⭐Angus Beef Burger主食方面朋友點左安格斯牛肉漢堡，完全無留意個餐本身有薯條，以為係sides配菜個邊upgrade，於是我地迎來第三份薯條，哈哈。講返個漢堡包，包面用牛油煎香過，又香又軟熟😋牛肉漢堡扒肉嫩多汁，再加上大量芝士、蕃茄同生菜等經典配搭，好食又飽肚👍⭐Chicken Yuzu Carbonara另外仲點咗一碟溫泉蛋柚子雞肉卡邦尼扁意粉，呢份卡邦尼意粉係近期食過最驚喜最好食嘅！醬汁濃厚包住每一條意粉，芝士味好重，上面仲有隻溫泉蛋，用蛋汁撈埋落意粉更香口，另外醬汁本身仲加咗柚子，清新得嚟又可以去膩，真係勁好味😍大推！⭐Tiramisu & ⭐Carrot Cake最後梗係要點埋甜品啦，點咗一份提拉米蘇同一份甘筍蛋糕，提拉米蘇香軟濕潤，甜中帶苦味道中和，好好食🤤甘筍蛋糕味道同喺外國食嘅一模一樣，唔知係咪可以叫做話好正宗呢？忌廉部分甜而不膩，蛋糕厚實有飽腹感，食出紅蘿蔔碎嘅口感，而蛋糕仲帶有玉桂味，香甜好食🤤呢件真係好飽，建議二人share一下😝成餐飯每一樣嘢都好食，價錢定位相宜，完全無嘢好投訴，哈哈😆…查看更多

又到左德福美食廣場搵食，上次試過陳仔花甲粉嘅香辣湯底唔錯，今次就嚟試下佢嘅沙嗲湯底。落完單攞住飛仔等叫號，美食廣場一如以往嘅熱鬧，依然係一枱難求，隨意搭枱啦😅⭐陳仔招牌沙嗲花甲粉叫咗份沙嗲花甲粉再加肥牛片，面底有粉絲或米線選擇，亦可以加八蚊轉稻庭烏冬，上次就試咗粉絲喇，今次就試下米線啦。湯底好香，有花生醬味鹹鹹鮮鮮仲帶少少辣，入面仲有唔少生蒜同炸蒜，令到個湯底更香口。花甲大大隻幾鮮甜，我呢碗有九隻😋米線夠滑又爽口，整體感覺唔錯🤤⭐麻辣雞腎主食加配小食可以正價減十蚊，叫咗一份麻辣雞腎，雞腎碎上賣相一般。呢份雞腎都幾辣，辣椒籽超多，留返畀愛辣嘅朋友搞掂佢啦😆⭐香辣蓮藕片另外仲加咗份藕片，呢個香辣對我嚟講辣度就啱啱好，蓮藕片好爽脆，辣得過引。⭐蜂蜜綠茶麵食免費跟紙包飲品或者罐裝汽水，仲可以加八蚊揀新出嘅鴨屎香檸檬茶沙冰，是晚想飲下蜂蜜綠茶就揀咗呢款道地嘅紙包飲品😝眼闊肚窄叫太多食唔曬😅兩份小食大部分都畀曬朋友搞掂佢，哈哈，幾時有個包底嘅朋友都好重要。…查看更多

是日黎個Late lunch兩點先食晏，行左去連文記度食，過左午市高峰期唔使等位😆雖然晏左，但店內仲有唔少打工仔食緊，我地都快快落兩份午餐先，好餓😂⭐蔥油雞扒飯同事叫左2號餐蔥油雞扒飯，雞扒碎上方便食，對趕時間嘅打工仔黎講係件好貼心嘅事😊雞扒香脆調味正，蔥油夠香，一大碗飯份量十足！⭐杞子豬潤雞米線自己點左S餐杞子豬潤雞米線，豬潤數十片再加雞件同雞全翼，雞肉勁滑雞皮唔肥，豬潤有咬口無異味，處理得好，米線爽口，最正係湯底，唔油又香仲有杞子嘅甜味，好味到飲晒成碗😝⭐瑞士雞翼併薯角意猶未盡又加份下午茶雞翼薯角，雞翼好入味，一咬已離骨😋薯角即炸熱辣辣，正！⭐一口西多士同事話想食甜野又叫左份西多，鮮牛油！中間仲夾左花生醬餡！淋埋糖漿真係邪惡又好味，食完想再食，點算先😍⭐鹹檸七 & ⭐凍檸樂天氣熱要飲冰飲，大罐裝汽水加鹹檸底同檸檬底，爽！好食得黎價錢又親民，打工仔勝地👍唔怪得日日爆場。…查看更多

約左朋友食飯，揀左近期好多人讚嘅海山板神，併音名加上勁國内feel嘅餐牌，唔知係咪過江龍呢😆坐低掃code落單，唔知點解換左三張code都話唔work，換到第四張ok啦😆店員態度良好，換咁多次都唔會黑你面。⭐芝士瀑布咖哩牛肉飯朋友先點左份咖哩飯，要左極量牛肉😋真係好多牛肉片呀，旋風蛋再加上芝士汁同咖哩汁，勁多汁撈飯正呀。⭐鐵板芝士牛肉漢堡包配薯條自己點左漢堡包，超超超多芝士汁！！漢堡扒香口多肉汁，麵包鬆軟，好食呀。⭐特選漢堡扒牛肉飯朋友話唔飽再加單，今次要左漢堡扒牛肉飯，呢份感覺似pepper午餐個種食法，呢份無汁食落較乾身，朋友話應該兩份餐一齊叫中和下，一份勁多汁一份無，哈哈哈哈🤣⭐牛肉米紙卷最後仲叫左米紙卷因為想食下菜，全個餐牌唯一一樣有菜嘅食物😋生菜、紅蘿蔔、青瓜絲再包入牛扒條，清爽香口，點埋個酸酸鹹鹹嘅醬汁勁好食。⭐凍檸七 & ⭐熱檸茶估唔到杯凍檸七有擺盤喎😆幾靚仔。熱檸茶要左走甜，店員係放低包糖其間勁猶疑，最後佢都有比糖🤣食左咁多野都係三百蚊多啲，幾抵食吖。…查看更多

朋友話訂左枱在荃新天地的渝川廷食火鍋放題，佢話掃到廣告見$268一位勁多野食，咪黎試下囉。個餐包一份烤魚或雞煲、海鮮併盤、龍蝦每位半隻，仲有燒味、點心、火鍋料任食，除加一外無其他雜費😋⭐燒味 & ⭐燉湯落完單最快上係燒味同燉湯，正常燒味店貨式啦，好味係幾好味，但同打邊爐有啲唔夾🤣燉湯勁好飲，是晚係蟲草花燉雞，推薦😍⭐蒜蓉粉絲蒸龍蝦龍蝦可選堂灼或粉絲蒸，都幾好，蝦肉爽口彈牙。⭐香辣烤魚我地揀左烤魚，一大條魚，配料有豆卜、大荳芽、紅薯粉等，食到呢度基本上都飽左大半。⭐麻辣湯併清湯湯底揀左鴛鴦鍋，清湯幾鮮味，麻辣湯略微不夠辣。⭐海鮮盤自選六樣海鮮，點左白鱔片、龍躉片、鮑魚、北極貝、蟶子、台山蠔，上到枱送多左兩隻元貝🤔全部都好鮮甜🤤食得出係新鮮貨，個人至愛白鱔片同龍躉片，魚肉超正😍⭐各式火鍋料火鍋料選擇都算幾多，相反自助區蔬菜同丸腸就偏少😂朋友狂點海鮮食，個人則覺得牛肉片同羊肉片正。⭐飲品一般罐裝飲品都有嘅、茶、汽水、啤酒等，雪櫃自取，想飲唔凍可問店員拎。晚市客人唔多店員亦只有一人，不得不讚那位當值員工，勁好服務態度做野爽手，有救必應👍直頭想挖角度自己公司添😆…查看更多